ПЕРЕЙТИ на главную страницу творений преп. Стефана

Кондак 1

Избранный чудотворче и предивный угодниче Христов, земли Вятския похвало и радование, со умилением воспеваем труды и подвиги твоя, на ниве Христовой положенныя и всю землю Вятскую плодами духовными освятившия. Ты же, имея велие дерзновение ко Христу Царю, путеводствуй нас на путь спасения, и от всяких бед свобождай, да зовем ти: Радуйся преподобне отче наш Стефане, за землю Вятскую усердный молитвенниче.

Икос 1

Ангелы удивляхуся житию твоему, отче преподобне Стефане, яко от юности ко Господу всем сердцем устремился еси, и суету мирскую возненавидев, к молитве сокровенной и безмолвию усердно прилежал еси, сего ради вопием ти:

Радуйся, благочестивыя матере плод благоуханный.

Радуйся, издетска Господем предизбранный.

Радуйся, от юности точию Господа единаго всем сердцем возлюбивый.

Радуйся, вся красная мира сего нивочтоже вменивый.

Радуйся, слугою Господним быти преднареченный.

Радуйся, на подвиги монашескаго жития материю благословенный.

Радуйся, от грехопадений плотских Господем всегда хранимый.

Радуйся, благодатию Божиею укрепляемый и согреваемый.

Радуйся преподобне отче наш Стефане, за землю Вятскую усердный молитвенниче.

Кондак 2

Видя губительную суету мира сего, преподобне отче Стефане, достигнути пустынной иноческой обители в юных летех всем сердцем возжелал еси, ища уединения и безмолвия, идеже молитву непрестанную творя, воспоеши ко Господу со умилением и радостию: Аллилуия.

Икос 2

Разума духовнаго от юности исполнился еси, преподобне отче Стефане, и наставника духоноснаго ища, странствия по обителем земли Русския со тщанием и усердием предпринял еси, безмолвно терпя глад, хлад, тесноту и напасти от людей немилосердных. Молитву сокровенную ко Господу изливая и благодатию Его укрепляемь, тесным путем ко спасению шел еси, преподобне. Сего ради и мы, взирая на терпение и смирение твое в странствии сем, вопием ти:

Радуйся, яко волю свою отсекая, едину волю Божию искал еси.

Радуйся, яко предатися в послушание святым отцем возжелал еси.

Радуйся, яко иго Христово усердно понесл еси.

Радуйся, яко путь узкий и прискорбный, любви ради Христовой избрал еси.

Радуйся, яко крупицы мудрости духовной во обителех и скитах, яко пчела усердно собирал еси.

Радуйся, яко молитву Иисусову возлюбил еси.

Радуйся, яко молитвою, аки нектаром благоуханным, душу свою питал еси.

Радуйся, яко творя молитву непрестанную, сердце свое неизреченною радостию наполнил еси.

Радуйся преподобне отче наш Стефане, за землю Вятскую усердный молитвенниче.

Кондак 3

Силы небесныя укрепляху тя, преподобне, егда последуя благословению старца Нила, в землю Вятскую возвратился еси, и тамо близ веси, идеже родился еси, над Филейкой рекою, в месте, пустыннем и безлюднем, пещеру себе ископал еси, идеже молитве усердней и слезней во многая дни предавался еси, взывая чистым сердцем ко Господу: Аллилуия.

Икос 3

Имея ревность Божественную и велию любовь ко Господу, всякую молву мира сего возненавидел еси, преподобие отче Стефане. И безмолвие возлюбив и отшельническое житие избрав, в веси родной яко странен и безумен был еси, токмо материю своею на подвиги монашеския благословляем. Сего ради, поучаяся смирению твоему вопием ти:

Радуйся, преподобным киево-печерским в житии своем поревновавый.

Радуйся, в пещеру убогую вселитися возжелавый.

Радуйся, слезами многими пещеру свою оросивый.

Радуйся, вериги железныя на себе возложивый.

Радуйся, искушения и скорби Господа ради радостно принимавый.

Радуйся, укоризны и насмешки ближних кротко терпевый.

Радуйся, селения Филейская и всю землю Вятскую молитвою своею освятивый.

Радуйся, преподобие отче наш Стефане, за землю Вятскую усердный молитвенниче.

Кондак 4

Буря искушений врагом рода человеча многажды воздвизаема бяше на душу твою, преподобне, егда в пустыннем безмолвии молитву сокровенную творил еси. Но верою крепкою и упованием на Господа, слезами сокрушенными и покаянием сердечным ярость бури диавольския укрощал еси, вопия из глубины сердечныя ко Господу: Аллилуия.

Икос 4

Слыша слово Господа, чрез пророка глаголюща: «призови Мя в день скорби твоея, и изму тя», ты, подвижниче усердный, в скорбех и тяготех своих прибегал еси ко Господу, прося умножити и укрепити веру твою. Темже молимся ти: укрепи слабую веру и в нас немощных, зовущих ти тако:

Радуйся, нищету духовную, яко бисер бесценный взыскавый.

Радуйся, плакавший непрестанно о гресех своих ко Господу.

Радуйся, кротостию своею любовь Господню снискавый.

Радуйся, алчущий и жаждущий правды небесней.

Радуйся, милостию своею нищих и убогих питавый.

Радуйся, чистоту сердечную слезами умиленными стяжавый.

Радуйся, мир и радость духовную миру даровавый.

Радуйся, поругания и злословие Господа ради терпевый.

Радуйся, преподобие отче наш Стефане, за землю Вятскую усердный молитвенниче.

Кондак 5

Боготечный свет осия сердце твое, преподобне, егда узрел еси в нощи, в зимнем безмолвии, яко Ангели возношаху к востоку инока во мантии. Зря сие знамение Господне, желание сильное возымел еси обитель иноческую близ Филейския веси основати, и о сем усердно Господа молил еси, взывая Ему: Аллилуия.

Икос 5

Видя искреннее стремление сердца твоего обитель иноческую создати, промыслитель Господь помышление сильное в душу твою влагает, паки посетити обители иноческия, и тамо мудростию духовною напитатися и житие монашеское совершенне познати. Ты же, повинуяся влечению сердца твоего, странствие сие совершил еси, скорби велия, мраз, глад и болезни терпя, яко истинный раб и послушник Христов. Темже, поучаяся терпению твоему, зовем ти тако:

Радуйся, любовию ко Господу сердце свое уязвивый.

Радуйся, терпением страданий святому Симеону, Христа ради юродивому уподобивыйся.

Радуйся, обитель Саровскую в странствии своем посетивый.

Радуйся, послушания различныя в ней исполнявый.

Радуйся, святым киево-печерским поклонивыйся.

Радуйся иноками Глинския пустыни утешенный.

Радуйся, святую гору Афонскую, яко венец странствия своего имевый.

Радуйся небесных обителей достигнута подвигом монашеским пламенне вожделевый.

Радуйся, преподобне отче наш Стефане, за землю Вятскую усердный молитвенниче.

Кондак 6

Проповедником неложным учения Христова всем житием твоим был еси, преподобие отче Стефане, яко не стяжал еси сокровищ земных и тленных, а токмо к Богу всем сердцем устремлялся еси, и Ему единому воспевал еси со слезами: Аллилуия.

Икос 6

Возсиял еси яко добрый пастырь в земли Вятстей, подвижниче, святый Стефане, неустанно мудростию духовной, в Священном Писании и учении святых отцев сокровенной, людей простых назидая и чад их любити Слово Божие наставляя. Духовного ради назидания книги душеполезныя издавал и безмездно раздавал еси людем простым, да возлюбив чтение душеспасительное, и истинною мудростию духовную обогатившись, отвергнут лукавство и суету века сего и возревнуют о спасении душ своих. Научи убо и нас, неразумных детей века сего, возненавидети вся учения душевредная, землю Русскую наводнившия и ядом своим души наши напитавшия, и возлюбити точию истину Христову и Его Святое Евангелие. Сего ради паки и паки зовем ти:

Радуйся, яко в Законе Божием неустанно ходил еси.

Радуйся, яко Священное Писание всем сердцем возлюбил еси.

Радуйся, яко поучения и наставления из книг священных неустанно собирал еси.

Радуйся, яко премудростию святых отцев душу свою согревал еси.

Радуйся, яко духовному просвещению народа усердно послужил еси.

Радуйся, яко поучения духовныя для людей простых книгами малыми собранныя многим безмездно раздавал еси.

Радуйся, детей филейских любимый учителю.

Радуйся о целомудрии и добронравии их усердный попечителю.

Радуйся, преподобне отче наш Стефане, за землю Вятскую усердный молитвенниче.

Кондак 7

Хотя в уединении и безмолвии подвизатися, преподобне, и написанию книг душеполезных себе посвятити, смиряя себе, не дерзал еси чин ангельский восприяти. Но послушание преосвященному Апполосу, архипастырю Вятскому являя, и исполняя его благословение, в монашество во имя святителя Стефана Великопермского пострижен был еси, со благоговением воспевая Христу Богу ангельскую песнь: Аллилуия.

Икос 7

Новыя благодати исполнися душа твоя, преподобне, егда по принятии чина ангельскаго, в пустыню свою паки возвратился еси, и тамо в убозей келии твоей, трудами многими Господа прославлял еси, взывая к Нему со слезами: «Господи, Господи, пощади раба Своего!» Помози убо и нам немощным, житейскою гордостию исполненным, покаяние глубокое и страх Божий в сердца наша стяжати, темже паки вопием ти:

Радуйся, память смертную всегда имевый.

Радуйся, непрестанною молитвою и пламенною любовию ко Господу на небеса возносивыйся.

Радуйся, небесное превыше земнаго возлюбивый.

Радуйся, небесную тишину в душе своей стяжавый.

Радуйся, и на земли живя, небесныя радости сподобивыйся.

Радуйся, жилище свое убогое в небесный чертог преобразивый.

Радуйся, земный ангеле и небесный человече.

Радуйся народу Вятскому к отечеству небесному путеводителю.

Радуйся, преподобне отче наш Стефане, за землю Вятскую усердный молитвенниче.

Кондак 8

Страннаго видения сподобился еси, блаженне отче, егда во сне множество птиц черных нападе на тя, и в ярости и злобе исклеваша тя. Воспрянув от сна сего дивнаго, премногия раны на теле своем узрел еси, и нападение диавольское в сем уразумел еси. И паки воспел еси Господеви, хранящему раба Своего от злобы и козней вражиих, благодарственную песнь: Аллилуия.

Икос 8

Вся испытания и скорби жития пустыннаго претерпевый и многим опытом духовным преисполненный, восхотел еси, отче, храм в пустыни своей создати и скит монашеский тамо устроити. Благословение архипастыря испросив, с радостию к труду сему приступил еси. И иноков, ищущих безмолвия, в пустынь свою собрал еси, с отеческой любовью тех молитве сокровенней поучая. Помози убо и нам, недостойным чадом твоим, молитву искреннюю ко Господу стяжати и небесное паче земнаго возлюбити, да зовем ти:

Радуйся, земли Вятския пастырю добрый.

Радуйся, наставниче наш кроткий и богомудрый.

Радуйся творением молитвы Иисусовой чистоту сердечную стяжати научающий.

Радуйся к усердному исполнению молитвеннаго правила нас призывающий.

Радуйся, яко благотворити нищим и убогим примером жизни своея нас подвигаеши.

Радуйся, яко поучатися в чтении Слова Божия всех призываеши.

Радуйся, яко пример глубокаго покаяния нам показуеши.

Радуйся, преподобне отче наш Стефане, за землю Вятскую усердный молитвенниче.

Кондак 9

Всем приходящим к тебе, преподобне, отец чадолюбивый был еси, наставляя на путь спасения, советами утешая и укрепляя, отгоняя уныние бесовское от душ их. Тии же радости духовныя исполняяся, благодарне воспеваху ко Господу: Аллилуия.

Икос 9

Ветии суемудреннии века сего не возмогут уразумети сострадания твоего к падшим человеком, егда художника, во отчаянии крайнем пребывающа, словом мудрым и благодатным от греховныя жизни отвратил еси. Помози убо и нам, пастырю добрый, уныния и отчаяния бесовскаго избегнути и души своя от сетей вражиих избавити, воспевающим ти:

Радуйся, заблудших и падших в бездну греховную от жизни пагубныя отвращавший.

Радуйся, всею душею о них скорбевший.

Радуйся, любовию сердца своего, хладныя их души согревавший.

Радуйся, молитву слезную о них ко Господу возносивший.

Радуйся со скорбящими скорбевший и с плачущими плакавший.

Радуйся, милосердием своим Господа прославивший.

Радуйся, плоды духовныя: любовь, мир и долготерпение стяжавший.

Радуйся, пример смирения, кротости и воздержания подававший.

Радуйся, преподобне отче наш Стефане, за землю Вятскую усердный молитвенниче.

Кондак 10

Всем спасения душевнаго ищущим, был еси пред Господем ходатай усердный, отче наш Стефане. Не остави и нас, в суете мира сего утопающих и во гресех страшных погрязших. Помози нам молитвами твоими отвратитися от прельщений пагубных и греховнаго безчувствия, да очистившися от тины страстей, из глубины душевныя воспоим спасающему нас Богу: Аллилуия.

Икос 10

Стеною молитв твоих ограждал еси, отче, чад твоих от пагубных искушений и падений греховных. Сего ради обитель новую во имя благовернаго князя Александра Невскаго, защитника и молитвенника земли Русския воздвигнути возжелал еси, дабы была обитель сия нерушимою крепостию духа Православия и училищем благочестия новым духовным воином и подвижником. Научи и нас, отче, молитвою, смирением и покаянием отражати всякия душетленныя искушения диавольския, да с любовию призываем тя:

Радуйся, яко немощный телом, но духом истинный воин Христов и заступник земли Русския был еси.

Радуйся, яко мечем духовным вооружился еси.

Радуйся, оболкийся в броню правды Христовой.

Радуйся, яко щитом веры отражал еси нападения вражия.

Радуйся, яко противу козней диавольских оружием молитвы и доброделания противостал еси.

Радуйся, яко молитвою Иисусовой обращал еси в бегство полчища бесовския.

Радуйся, яко многих воинов духовных воспитал еси.

Радуйся, яко не устрашатися злобы сатининския, но уповати на Господа их призывал еси.

Радуйся, преподобне отче наш Стефане, за землю Вятскую усердный молитвенниче.

Кондак 11

Пение молитвенное, всеумиленное и тихое возлюбил еси, отче преподобне, и сим пением предивным исполняшеся храм обители твоея, идеже иноцы молитвы усердныя Господеви приношаху, воспевая Ему: Аллилуия.

Икос 11

Света небеснаго исполнися келлия твоя, преподобне Стефане, егда провидя близкую кончину твою, великий ангельский образ восприял еси и ежеденным причащением Святых Христовых Таин ко преселению во обители небесныя предуготовился еси. Сего ради зовем ти:

Радуйся, многия скорби в житии твоем претерпевый.

Радуйся, болезнь тяжкую пред кончиною своею безропотно понесший.

Радуйся, терпением мучений жестоких душу свою, яко злато в горниле, очистивый.

Радуйся, и за болезнь сию Господа благодаривый.

Радуйся, кончину свою братии своей предсказавый.

Радуйся, в день Успения Пресвятыя Богородицы в руце Господа душу свою предавый.

Радуйся, братиею обители твоея и всею Вятскою землею оплаканный.

Радуйся, близ алтаря Успенския церкви во обители твоей благоговейно погребенный.

Радуйся, преподобне отче наш Стефане, за землю Вятскую усердный молитвенниче.

Кондак 12

Благодать от Бога ти данную ведуще, прилежно молим тя, отче наш предивный: пролей теплую молитву о нас ко Господу, да дарует нам веру нелицемерную, дух покаяния и смирения, да воспоем Ему со умилением: Аллилуия.

Икос 12

Поюще братия твоя и вси ученицы твои, и многия людие Вятския земли у гроба твоего победную и торжествующую песнь, юже в житии своем паче всех воспевал еси, отче: «С нами Бог, разумейте языцы и покоряйтеся, яко с нами Бог!», умиления и радости исполнишася и твое неустанное ходатайство о них пред Господем познаша. Темже молим тя, преподобне отче, не забуди и нас, недостойных чад твоих, но всегда пребывай с нами, да твоим заступлением ограждаеми и от всех зол избавляеми, вопием ти до скончания века:

Радуйся, добропобедный воине Царя Небеснаго, яко с нами Бог, и полчища бесовския Его трепещут.

Радуйся, пастырю благий, яко с нами Бог, и вся злоба диавольская исчезе.

Радуйся, молитвенников похвало, яко с нами Бог, и мрак уныния отгонится.

Радуйся, монашествующих славо, яко с нами Бог, и вера православная в сердцах наших утверждается.

Радуйся, истинный друже Христов, яко с нами Бог, и прелесть еретическая сокрушается.

Радуйся, наставниче заблудших, яко с нами Бог, и вся ложная и душевредная учения посрамляются.

Радуйся, светильниче Вятския земли, яко с нами Бог, и ты в молитвах с нами пребываеши.

Радуйся, преподобне отче наш Стефане, за землю Вятскую усердный молитвенниче.

Кондак 13

О, преславный угодниче, преподобне отче Стефане! Приими сие малое моление наше, с любовию тебе возносимое, и даруй нам благоприятным ходатайством твоим избавитися от геенны огненныя и вечных адских мук, сподоби нас Царствия Небеснаго и блаженства святых, да воспоем с тобою сладчайшему Христу Богу нашему: Аллилуия.

Молитва преподобному Стефану Филейскому

О, священная главо, преподобне отче Стефане! Ныне предстояй пред престолом Святыя Троицы, не забуди нас, чад твоих, вознеси молитвы свои о нас, да испросиши нам у Бога грехов прощение, страстей оставление, сердца очищение, духовных очес просветление, и в житии сем вся полезная и довольная: церквам благостояние, градовом укрепление, народом умирение, воздухов благорастворение, немощным исцеление, младенцем воспитание, юным наставление, старым поддержание и всем вся благопотребная.

О, святче Божий, подавай нам образ жития богоугоднаго и научи оставляти блага временная вечных благ ради. Ныне молися о нас с собором святых земли Вятския, да возможем безпреткновенно внити в Царство Небесное и тамо воспевати со всеми святыми Живоначальную Троицу во веки веков. Аминь.

Тропарь преподобному Стефану Филейскому, глас 4

Иже отцем в добродетелех подражателем быв, вся красная мира сего оставил ecи, в уединении и безмолвии словесы Господни питался ecи, тем и других научал ecи приходящих к тебе. Нестяжанием обогативыйся и кротостию возвысивыйся, научи и нас подражати тебе и буди молитвенником о нас грешных, преподобне отче Стефане.

Кондак преподобному Стефану Филейскому, глас 8

От юности Христа возжелавый, приял еси подвиг иноческий, преподобнаго Трифона дух возымел ecи и основателем обители был ecи, собрал тамо множество учеников, с ними моли Христа Бога спастися душам нашим.

Величание преподобному Стефану Филейскому

Ублажаем тя, преподобне отче Стефане, и чтим святую память твою, наставниче монахов и собеседниче Ангелов