ПЕРЕЙТИ на главную страницу творений
Акафист святителю Кириллу, епископу Туровскому
Канон святителю Кириллу, епископу Туровскому (первый)
Канон святителю Кириллу, епископу Туровскому (второй)
Акафист святителю Кириллу, епископу Туровскому
Конда́к 1.
Избра́нный уго́дниче Христо́в и за́поведей Ева́нгельских изря́дный ревни́телю, всея́ Ру́сския земли́ златослове́сный учи́телю, прославля́ем тя́, хода́тая о все́х, с ве́рою усе́рдно к тебе́ прибега́ющих, я́ко ты́ предстои́ши со дерзнове́нием Святе́й Тро́ице, моли́ о на́с, недосто́йных ча́дех твои́х, да в тве́рдости Правосла́вныя ве́ры и доброде́тели поживе́м и со умиле́нием тебе́ воспое́м:
Ра́дуйся, Кири́лле Златоу́сте, покая́ния наста́вниче богому́дрый.
И́кос 1.
А́нгельскому житию́ от младе́нчества науча́лся у боголюби́вых роди́телей ро́да зна́тнаго, оба́че не любля́ше ни бога́тства, ни сла́вы тле́нныя, ни уте́х ми́ра сего́, вся́, я́ко уме́ты, вмени́л еси́; разуме́ние прему́дрости кни́жней от изря́дных учи́телей гре́ческих восприя́в, и па́че же у́м сво́й от ю́ности приле́жно к уче́нию Боже́ственнаго Писа́ния и кни́г свяще́нных устреми́в, моли́тву же, уедине́ние и поще́ние, возлюби́л еси́, Кири́лле. Ны́не и на́с к доброде́телем таковы́м подви́гни, благода́рно пою́щих ти́:
Ра́дуйся, гра́да Ту́рова о́трасль чу́дная, прине́сшая пло́д до́брый; ра́дуйся, я́ко Еди́наго Го́спода и за́поведи Его́ от ле́т ю́ных возлюби́л еси́.
Ра́дуйся, я́ко благочести́вых роди́телей свои́х прилежа́нием к уче́нию уте́шил еси́; ра́дуйся, я́ко от учи́телей, имени́тых гре́ков, кни́жный ра́зум восприя́л еси́.
Ра́дуйся, в кни́жней му́дрости и богомы́слии преуспе́вый; ра́дуйся, от Святы́х Писа́ний прему́дрость Бо́жию получи́вый.
Ра́дуйся, творе́нии Златоу́стаго Иоа́нна и святы́х отце́в Византи́и у́м сво́й пита́вый; ра́дуйся, целому́дрие, смиренному́дрие и кро́тость от ю́ности храни́вый и чрез все́ житие́ свое́ пронесы́й.
Ра́дуйся, Кири́лле Златоу́сте, покая́ния наста́вниче богому́дрый.
Конда́к 2.
Ви́дя печа́льный коне́ц жития́ плотска́го, ми́ра мяте́ж презре́л еси́, ско́рби же и тесноту́ и́ноческия возлюби́, во оби́тель свята́го Никола́я от до́ма роди́тельскаго прише́л еси́, и та́мо а́нгельский о́браз восприя́вши, послуша́ния игу́мену до́брый рачи́тель бы́л еси́, непреста́нно в моли́твах Бо́гу взыва́я: Аллилу́иа.
И́кос 2.
Ра́зум соверше́н и безстра́стие стяжа́ти жела́я и вся́ земна́я презира́я, безце́нный би́сер, Христа́, во оби́тели святе́й обре́л еси́. Та́мо же и са́м вско́ре са́н свяще́нный и бре́мя игу́менства подъя́л еси́; и́ноков же взаи́мной бра́тской любви́ и тве́рдому послуша́нию и самоотрече́нию науча́л еси́. Мы́ же, ре́вности по Бо́зе твое́й умиля́ющеся, я́ко богому́дрому наста́внику воспева́ем си́це:
Ра́дуйся, посто́м, слеза́ми и бде́нии моли́твенными ду́шу свою́ удобри́вый; ра́дуйся, самоотрече́нию и послуша́нию и́ноков ре́вностно учи́вый.
Ра́дуйся, во основа́ние доброде́телей и́ноческих стра́х Бо́жий полага́вый; ра́дуйся, непреста́нную моли́тву усты́ и се́рдцем твои́ми глаго́лавый.
Ра́дуйся, я́ко да́ром разсужде́ния бра́тии оби́тели удивля́л еси́; ра́дуйся, я́ко словопре́ний и праздноглаго́лания удаля́тися поуча́л еси́.
Ра́дуйся, я́ко стро́гостию и увеща́нии безчи́нных и неради́вых исправля́л еси́; ра́дуйся, я́ко о миролю́бцах и празднолю́бцах неуста́нно рыда́л еси́.
Ра́дуйся, Кири́лле Златоу́сте, покая́ния наста́вниче богому́дрый.
Конда́к 3.
Си́лою свы́ше укрепля́емь, сокро́вище нетле́нное для души́ свое́й обре́л еси́, попече́ние же не то́кмо об и́ноцех, но и о су́щих в ми́ре име́я: оба́че все́м блужда́ющим во тьме́ бы́л еси́ духо́вный наста́вниче и и́стины пропове́дниче, ны́не же и на́с от суеты́ жите́йския изба́ви твои́ми к Бо́гу моли́твами, Ему́же в простоте́ серде́чней вопие́м: Аллилу́иа.
И́кос 3.
Име́я вели́кое тща́ние о устрое́нии о́бщаго жития́ мона́шескаго во игу́мены влады́чния оби́тели Борисогле́бския епи́скопом Гео́ргием поста́влен бы́л и та́мо не то́кмо и́ноком, но и все́м приходя́щим к тебе́ лю́дем гра́да Ту́рова ко спасе́нию наста́вник ста́л еси́, се́рдцем за ни́х боле́знуя и слеза́ми со умиле́нием Вседержи́теля и Благу́ю Цари́цу Богоро́дицу о проще́нии грехо́в умоля́я. Та́мже и све́том благода́тнаго дерзнове́ния испо́лнился еси́, ны́не же и на́м ми́лости Бо́жия исхода́тайствуй и научи́ с любо́вию взыва́ти ти́:
Ра́дуйся, я́ко кла́дезь воды́ живы́я, духо́вную жа́жду утоля́л еси́; ра́дуйся, я́ко о спасе́нии ка́ющихся гре́шников неусы́пно Бо́га проси́л еси́.
Ра́дуйся, я́ко покая́нием обетша́вших страстьми́ к обновле́нию побужда́л еси́; ра́дуйся, я́ко утопа́ющих в по́хотех из пучи́ны грехо́вныя извлека́л еси́.
Ра́дуйся, все́х ско́рбных и печа́льных при́сное утеше́ние; ра́дуйся, мона́хов наста́вниче и подви́жников благоче́стия сла́во.
Ра́дуйся, и ны́не и́ночество и уедине́ние лю́бящим благода́тное вдохнове́ние; ра́дуйся, рачи́телей благоче́стия изря́дное обогаще́ние.
Ра́дуйся, Кири́лле Златоу́сте, покая́ния наста́вниче богому́дрый.
Конда́к 4.
Бу́рю вра́жиих искуше́ний отри́нув и подви́жником христиа́нскаго Восто́ка подража́я, игу́менство свое́ оста́вил еси́ и, на сто́лп возше́д, затвори́лся, и та́мо в те́сней ке́ллии дни́ и но́чи в моли́тве проводи́л еси́, сугу́бым посто́м и богомы́слием себе́ от суеты́ ми́ра огражда́я, мно́гая Богодухнове́нная творе́ния та́мо написа́л еси́, Бо́га прославля́я а́нгельскою пе́снию: Аллилу́иа.
И́кос 4.
Слы́ша пти́ц небе́сных пе́ние и Бо́жия творе́ния красоту́ ви́дя, в столпе́ твое́м за ве́сь ми́р моли́лся еси́, му́дрствуя го́рняя и испыту́я, что́ е́сть во́ля Бо́жия; собесе́дник А́нгелом бы́л еси́, чистоты́ добро́тами озари́вся, Бо́жиим Ду́хом вдохнове́н, све́тлыя уче́ния Богоразу́мия своего́ и моли́твы источа́л еси́, и́миже земля́ Ру́сская просвети́шася. Мы́ же по́двиги и труды́ твои́ ублажа́ем и лику́юще рце́м:
Ра́дуйся, блаже́нне сто́лпниче, затво́рниче преди́вный и прехва́льный; ра́дуйся, де́нно и но́щно в покая́нии и моли́тве пребыва́вый.
Ра́дуйся, мно́гии писа́ния и моли́твы в назида́ние на́м оста́вивши; ра́дуйся, златослове́сный учи́телю па́ствы Ту́ровския и всея́ земли́ Ру́сския.
Ра́дуйся, я́ко на кре́ст, те́ло твое́ на сто́лп возне́сл еси́; ра́дуйся, в по́двизех твои́х по́мощь от Го́спода прия́вый.
Ра́дуйся, среди́ молвы́ жите́йския ду́ха пусты́ннаго в себе́ не угаси́вый; ра́дуйся, тала́нт, от Бо́га да́нный, стори́цею преумно́живый.
Ра́дуйся, Кири́лле Златоу́сте, покая́ния наста́вниче богому́дрый.
Конда́к 5.
Звезду́ но́вую на Свято́й Руси́ восходя́щую ви́дя в тебе́ Госпо́дь, ко святи́тельскому служе́нию предугото́ви тя́ и по преставле́нии архиере́я Гео́ргия люде́й мно́жество с кня́зем Ту́ровским приведе́ ко столпу́ твоему́ моли́ти тя́ епи́скопом гра́да сего́ дре́вняго бы́ти. Ты́ же, о́тче Кири́лле, сле́зно моля́ся, всего́ себе́ на во́лю Христу́ Бо́гу преда́л еси́, и от Него́же отве́т получи́в, со благодаре́нием воспе́л еси́: Аллилу́иа.
И́кос 5.
Ви́дя в тебе́ чи́стыя ве́ры свети́льник горя́щий и И́стины учи́теля прему́драго проразумева́я, архипа́стырь Ки́евский Константи́н по проше́нию кня́зя Ю́рия и боя́р Ту́ровских, я́ко досто́йный сосу́д Бо́жией благода́ти, поста́ви тя́ на ка́федру дре́внюю гра́да Ту́рова и всея́ земли́ Поле́сския, да просвети́ши та́мо люде́й, во тьме́ язы́честей пребыва́ющих. Мы́ же, дивя́щеся чу́дному о тебе́ промышле́нию Бо́жию, прино́сим ти́ благохвале́ния сицева́я:
Ра́дуйся, я́ко святи́телем блаже́нным и пра́ведным во епи́скопа нарече́н бы́л еси́; ра́дуйся, я́ко от свята́го иера́рха и са́м святы́м соде́лался еси́.
Ра́дуйся, са́н вы́сший церко́вный со смире́нием прия́вый; ра́дуйся, архипа́стырем и па́стырем и́стинный о́браз кро́тости яви́вый.
Ра́дуйся, со́нм иера́рхов Це́ркви Ру́сския украси́вый; ра́дуйся, ду́хом живы́я ве́ры и благоче́стия мно́гих воспламени́вый.
Ра́дуйся, я́ко Христо́ва виногра́да де́латель неусы́пный яви́лся еси́; ра́дуйся, я́ко в ра́дость Го́спода твоего́ вше́л еси́.
Ра́дуйся, Кири́лле Златоу́сте, покая́ния наста́вниче богому́дрый.
Конда́к 6.
Пропове́дник и́стиннаго благоче́стия и покая́ния яви́лся еси́, о́тче Кири́лле, егда́ не терпя́ безсту́дныя пра́зднества во гра́де твое́м, и я́ко до́брый во́ин Христо́в, облича́л еси́ вся́кия и́грища бесо́вския и плясова́ния язы́ческая, сло́вом прему́дрым вразумля́я заблу́ждшия о́вцы, ве́рныя же науча́л еси́ взыва́ти Еди́ному И́стинному Бо́гу: Аллилу́иа.
И́кос 6.
Возсия́л еси́, о́тче Кири́лле, я́ко пресве́тлое со́лнце па́стве Ту́ровския и всея́ земли́ Ру́сския, уче́нием правосла́вным озаря́я сердца́ христиа́нския, разгоня́я тьму́ суеве́рия и нече́стия. И ны́не же, о златослове́сный Боже́ственный ри́торе и учи́телю, твои́х писа́ний сла́достию вси́ а́лчущии и жа́ждущии пра́вды насыща́ются и благода́рно взыва́ют ти́:
Ра́дуйся, учи́телю Правосла́вия и Златоу́сте земли́ Ру́сския ко пути́ спасе́ния на́с наставля́яй; ра́дуйся, вождю́, все́х осле́пших душе́вными очи́ма к Христу́ приводя́й.
Ра́дуйся, се́ятелю пра́вды, ве́рных от пре́лести грехо́вныя свободи́вый; ра́дуйся, адама́нте, и́стинный ду́х ве́ры и благоче́стия утверди́вый.
Ра́дуйся, от суеве́рий, ересе́й и раско́лов ста́до церко́вное блюсти́телю; ра́дуйся, куми́ров язы́ческих потреби́телю и пия́нства искорени́телю.
Ра́дуйся, отпа́дших и заблу́ждших ко пра́вой ве́ре обраща́яй; ра́дуйся, усты́ твои́ма, благода́ти испо́лнени, словеса́ злата́я возвеща́яй.
Ра́дуйся, Кири́лле Златоу́сте, покая́ния наста́вниче богому́дрый.
Конда́к 7.
Хотя́ сохрани́ти еди́нство Це́ркви Ру́сския, святи́телю Никола́ю Мирлики́йскому подража́я, ты́, блаже́нне Кири́лле, еретика́-епи́скопа и раско́льника Су́здальскаго Феодорца́, за укори́зну та́ко нарица́емаго, я́ко А́рия безу́мнаго на собо́ре Ки́евском обличи́л еси́ и вку́пе со все́ми иера́рхами ана́феме того́ пре́дал еси́, Бо́гу же, Ду́хом Святы́м соде́йствующу в де́ле пра́вом, благода́рне воспе́л еси́ побе́дную пе́снь: Аллилу́иа.
И́кос 7.
Но́ваго стра́жа чистоты́ Правосла́вия для все́й земли́ Ру́сской поста́ви тя́ Госпо́дь, Ду́хом И́стины лжи́вое уче́ние и нече́стие ерети́ческое победи́в, вели́каго кня́зя Андре́я боголюби́вым и́стинно бы́ти призыва́л еси́, о́тче Кири́лле; в духо́вней му́дрости того́ окормля́я я́ко ча́до церко́вное, те́мже и мы́ укрепля́емы моли́твами твои́ми, смире́нно взыва́ем ти́:
Ра́дуйся, еди́нства Святы́я Руси́ благода́тное охране́ние; ра́дуйся, святы́х оте́ц на́ших похвало́ и на́ше утеше́ние.
Ра́дуйся, благостоя́ния хра́мов Бо́жиих усе́рдный ревни́телю; ра́дуйся, наро́дных треволне́ний и церко́вных разделе́ний усмири́телю.
Ра́дуйся, миротво́рче наро́читый, миролю́бия наста́вниче; ра́дуйся, Це́ркви Ру́сския неме́ркнущий и́стины и любви́ свети́льниче.
Ра́дуйся, прави́телем и судия́м му́дрыми и безкоры́стными бы́ти внуша́вый; ра́дуйся, за умилостивле́ние вражду́ющих моли́тву Бо́гу, я́ко фимиа́м, приноси́вый.
Ра́дуйся, Кири́лле Златоу́сте, покая́ния наста́вниче богому́дрый.
Конда́к 8.
Стра́нное чу́до и боголе́пное зри́тся, я́ко усе́рдием твои́м но́вый хра́м вели́кий на горе́ Замко́вой созида́ется, и Ве́ра Правосла́вная не то́кмо в гра́де Ту́рове, но и на все́й Бе́лой Руси́ укрепля́ется. Мы́ же, усе́рдно ча́юще устрое́ния в сердца́х на́ших оби́телей Ду́ха Свята́го, то́кмо с тобо́ю, богому́дре Кири́лле, от усте́н скве́рных дерза́ем Зижди́телю на́шего спасе́ния еди́ным гла́сом вопи́ти: Аллилу́иа.
И́кос 8.
Ве́сь зако́н, я́же по Бо́зе жития́ в себе́ явле́н име́я, наста́вник и пропове́дник преди́вен и иску́сен, ты́, блаже́нне Кири́лле, вои́стинну Златоу́стом всея́ Руси́ яви́лся еси́. Мно́гия душеполе́зныя поуче́ния на Писа́ния Ева́нгельская и проро́ческая, и́же чту́тся на пра́здники Госпо́дни, та́кожде к Бо́гу моли́твы на вся́к ча́с и де́нь седми́цы, кано́н покая́нен, святы́м похвалы́, наставле́ния мона́хом и па́стырем и и́на мно́жайшая написа́л еси́ и Це́ркви Ру́сской преда́л еси́ во вре́мя свое́; те́миже и ны́не все́м ве́рным показу́еши пра́вы стези́ ко Ца́рствию Христо́ву, да тебе́ я́ко учи́телю богому́дрому благода́рно взыва́ют:
Ра́дуйся, церко́вныя про́поведи неуста́нный блюсти́телю; ра́дуйся, вели́кий ри́торе Правосла́вия и Богопозна́ния духо́внаго на Руси́ насади́телю.
Ра́дуйся, я́ко о благочи́нии служе́ния церко́внаго усе́рдно ревну́еши; ра́дуйся, я́ко река́ разу́мнаго рая́, спаси́тельным уче́нием всю́ Ру́сь напоя́еши.
Ра́дуйся, я́ко уста́ зми́я лука́ваго при́сно загражда́еши, а ве́рных на духо́вныя по́двиги вдохновля́еши; ра́дуйся, я́ко осле́пшим душе́вныма очи́ма пу́ть и́стины указу́еши.
Ра́дуйся, неради́вых служи́телей Це́ркви ко трезве́нию и до́брой со́вести призыва́еши; ра́дуйся, слове́снаго ста́да Христо́ва па́стырей ду́хом любви́ горя́щих благослове́нием твои́м укрепля́еши.
Ра́дуйся, Кири́лле Златоу́сте, покая́ния наста́вниче богому́дрый.
Конда́к 9.
Вси́ ско́рби и поноше́ния ты́, о́тче Кири́лле, претерпева́л еси́ пра́вды ра́ди, по Писа́нию: Не́сть бо проро́ка без че́сти, но в дому́ свое́м то́кмо, оба́че же в пропове́даниих твои́х неотсту́пно увещева́л и наставля́л еси́ па́ству твою́, да вси́ в покая́нии призову́т и́мя Творца́ и Бо́га, Ему́же со дерзнове́нием пе́снь умиле́нно прино́сим: Аллилу́иа.
И́кос 9.
Вити́йства сугу́баго недоста́нет, во е́же сказа́ти о терпе́нии твое́м, егда́ словесе́м твои́м златы́м лю́дие неразу́мнии не внима́ху, оба́че суему́дрием и лжеве́рием челове́ческим омрача́хуся, в пия́нстве, блуде́ и про́чих страсте́х, а́ки в ти́не плотско́й утопа́юще; мы́ же, ча́да твоя́, глаго́лы му́дрости твоея́ в сердца́ на́ша прия́вше, тебе́ со слеза́ми взыва́ем:
Ра́дуйся, честолю́бия и человекоуго́дия обличи́телю; ра́дуйся, безчи́нных и ху́льных стро́гими вразумле́нии исправи́телю.
Ра́дуйся, я́ко ско́рби за пасо́мых претерпева́л еси́; ра́дуйся, я́ко за враги́ Го́спода со слеза́ми кро́тко умоля́л еси́.
Ра́дуйся, любо́вию Христо́вою вся́кую вражду́ и противле́ние победи́вый; ра́дуйся, свои́м незло́бием и простото́ю окамене́нная сердца́ покори́вый.
Ра́дуйся, я́ко терпе́нию и кро́тости мно́гия лю́ди житие́м твои́м научи́л еси́; ра́дуйся, я́ко в доброде́телех ве́ры, наде́жды и любве́ мно́гих утверди́л еси́.
Ра́дуйся, Кири́лле Златоу́сте, покая́ния наста́вниче богому́дрый.
Конда́к 10.
Спасти́ хотя́ ве́рных мно́жество, яви́ Госпо́дь в земли́ Поле́сской на кресте́ о́браз Купя́тицкий Ма́тери Своея́; ты́ же, о́тче Кири́лле, мно́ги ско́рби претерпе́в на скло́не ле́т жития́ пра́веднаго, получи́л еси́ свы́ше вразумле́ние и на поко́й отше́д в ро́дную оби́тель твою́, иде́же по́стриг и́ноческий прия́л еси́; мы́ же восхваля́юще по́двиги и труды́ твои́ та́мо, всено́щныя бде́ния, сле́з излия́ния и боле́зней терпе́ние, Милосе́рдному Пра́ведному Воздая́телю Бо́гу воспева́ем: Аллилу́иа.
И́кос 10.
Стена́ заступле́ния и по́мощи правосла́вным лю́дем яви́лся еси́, пла́менною моли́твою и слеза́ми лука́выя ду́хи попаля́я, му́дрыми сове́тами от заблужде́ний огражда́я, Боже́ственною любо́вию се́рдца согрева́я; мно́гих спа́сл еси́ от рабо́ты вра́жия, светоза́рным све́точем духо́внаго наста́вничества князе́м и лю́дем яви́лся еси́; мы́ же мо́лим тя́, о́тче, да и в сия́ после́дняя времена́ не оскуде́ют свети́льницы ве́ры и благоче́стия в земли́ Ру́сстей, ты́ же, на небесе́х живы́й, приими́ от на́с недосто́йных пе́снь сию́:
Ра́дуйся, несокруши́мый сто́лпе Правосла́вия и о все́м ми́ре сле́зный моли́твенниче; ра́дуйся, в разсужде́нии духо́внем подо́бный блаже́нным и му́дрым ста́рцем и о ча́дех свои́х печа́льниче.
Ра́дуйся, я́ко лука́выя ду́хи от ве́рных отгоня́еши; ра́дуйся, я́ко о неиспра́вно живу́щих сокруше́нно рыда́еши.
Ра́дуйся, па́че своея́, по́льзы бли́жних иска́вый; ра́дуйся, мно́жество мона́хов и свяще́нников наста́вивый и украси́вый.
Ра́дуйся, от обще́ния церко́внаго удаля́тися ве́рным возбрани́вый; ра́дуйся, лю́бящих хра́мы Бо́жия и святы́ни восхвали́вый и благослови́вый.
Ра́дуйся, Кири́лле Златоу́сте, покая́ния наста́вниче богому́дрый.
Конда́к 11.
Пе́снь достохва́льную прино́сите, мо́лим ти́ ся́, преподо́бие Кири́лле, да возроди́тся Ру́сь Свята́я, земля́ на́ша многострада́льная и гра́д тво́й к но́вой богоуго́дней жи́зни, те́мже умоли́ за ны́, ча́да твоя́; да не яви́мся неблагода́рни за мно́гия ми́лости Госпо́дни к на́м гре́шным, и да не предади́мся уны́нию и нераде́нию, оба́че усе́рдно воспое́м Бо́гу побе́дную пе́снь: Аллилу́иа.
И́кос 11.
Све́тлым твои́м равноа́нгельским и многоско́рбным житие́м всю́ зе́млю Ру́сскую озари́л еси́, святи́телю Кири́лле. Егда́же приспе́ вре́мя отше́ствия твоего́, А́нгели святи́и ду́шу твою́ блаже́нную в небе́сныя оби́тели вознесо́ша: те́ло же честно́е прее́мником твои́м святы́м Лавре́нтием обре́тено бы́сть нетле́нно, свя́тость твою́ свиде́тельствоваша; оба́че по́зде Бо́жиим Про́мыслом мо́щи твои́ святы́я до вре́мени лю́дие сокры́ша, да от поруга́ний ага́рян сохраня́тся; мы́ же всеусе́рдно про́сим у Бо́га оставле́ния грехо́в и беззако́ний на́ших и тебе́ вопие́м:
Ра́дуйся, уго́дниче Христо́в, тече́ние жития́ своего́ благоче́стие сконча́вый; ра́дуйся, со все́ми святы́ми на ве́ки соедини́выйся и ве́чную сла́ву насле́дивый.
Ра́дуйся, по труде́х стра́нствия земна́го в селе́ниих небе́сных почи́вый и тле́ния телесе́ своего́ не позна́вый; ра́дуйся, святы́ми моща́ми твои́ми до вре́мени сокрове́нными благогове́ние пред святы́нями все́м внуши́вый.
Ра́дуйся, я́ко да моли́твами благочести́вых те́ло свято́е твое́ для поклоне́ния ве́рным яви́ши; ра́дуйся, я́ко тогда́ во и́стине Правосла́вия мно́гия несумне́нно уве́риши и зе́млю свою́ расцве́том духо́вным па́ки просла́виши.
Ра́дуйся, я́ко да златоза́рными словесы́ твои́ми заблу́ждшия сы́ны ко правове́рию направля́еши; ра́дуйся, я́ко и ны́не оте́чество свое́ гра́д дре́вний Ту́ров и всю́ Ру́сь Бе́лую от нестрое́ний при́сно заступа́еши и утвержда́еши.
Ра́дуйся, Кири́лле Златоу́сте, покая́ния наста́вниче богому́дрый.
Конда́к 12.
Благода́ть прему́дрости кни́жныя и мно́гия да́ры небе́сныя прия́л еси́, преблаже́нне Кири́лле. Сего́ ра́ди святи́телие и вси́ боголюби́вии лю́дие просла́виша тя́, я́ко уго́дника Бо́жия и пресла́внаго Златоу́ста земли́ Ру́сския, непреста́нно дивя́ся о чу́дных дарова́ниях и по́двизех твои́х, и Бо́гови восклица́я: Аллилу́иа.
И́кос 12.
Пою́ще пресла́вную па́мять твою́, богоно́се о́тче на́ш Кири́лле, досто́йно ублажи́ти тя́ жела́ем и я́ко к предста́телю за наро́д Белору́сский и за всю́ Правосла́вную Ру́сь взыва́ем: бу́ди приле́жный хода́тай о спасе́нии все́х ве́рных, лю́бящих злата́я словеса́ твоя́ и моли́твами твои́ми моля́щияся, ны́не же вку́пе велегла́сно в ра́дости восхваля́ем тя́ си́це:
Ра́дуйся, я́ко ду́хом твои́м и ны́не незри́мо с на́ми пребыва́яй; ра́дуйся, я́ко богоно́сный о́блаче живоно́сными ка́плями благода́ти сердца́ на́ша напоя́яй.
Ра́дуйся, я́ко в сие́ вре́мя тя́жкое безбо́жная заблужде́ния искореня́ти помога́еши; ра́дуйся, я́ко сожже́нныя су́хостию грехо́вною сердца́ на́ша боже́ственною росо́ю ороша́еши.
Ра́дуйся, я́ко богодви́жимы пе́рсты твои́ми па́ки наро́ду твоему́ пу́ть от и́га грехо́внаго указу́еши; ра́дуйся, я́ко с про́поведию богодухнове́ннаго уче́ния Христо́ва, я́ко со́лнце, Ру́сь Святу́ю обхо́диши.
Ра́дуйся, за ду́ши на́ша гре́шныя у Царя́ Небе́снаго предста́телю; ра́дуйся, я́ко о тебе́ ра́дуются А́нгели и веселя́тся лю́дие.
Ра́дуйся, Кири́лле Златоу́сте, покая́ния наста́вниче богому́дрый.
Конда́к 13.
Опресла́вный и пречу́дный о́тче на́ш Кири́лле, святи́телю честны́й и Златоу́сте, па́че все́х на Руси́ возсия́вый, святы́м и пресве́тлым уче́нием Христо́вым вся́ концы́ ру́сския просвети́вый. Приими́ сие́ похва́льное пе́ние от на́с недосто́йных, и твои́м те́плым предста́тельством у Престо́ла Бо́жия испроси́ на́м отпуще́ние грехо́в, в ве́ре и до́брых де́лех утвержде́ние, избавле́ние от бе́д и скорбе́й, да во благоче́стии про́чая ле́та живота́ на́шего поживе́м, взыва́юще Бо́гу: Аллилу́иа.
Этот конда́к читается трижды, затем и́кос 1-й и конда́к 1-й.
И́кос 1.
А́нгельскому житию́ от младе́нчества науча́лся у боголюби́вых роди́телей ро́да зна́тнаго, оба́че не любля́ше ни бога́тства, ни сла́вы тле́нныя, ни уте́х ми́ра сего́, вся́, я́ко уме́ты, вмени́л еси́; разуме́ние прему́дрости кни́жней от изря́дных учи́телей гре́ческих восприя́в, и па́че же у́м сво́й от ю́ности приле́жно к уче́нию Боже́ственнаго Писа́ния и кни́г свяще́нных устреми́в, моли́тву же, уедине́ние и поще́ние, возлюби́л еси́, Кири́лле. Ны́не и на́с к доброде́телем таковы́м подви́гни, благода́рно пою́щих ти́:
Ра́дуйся, гра́да Ту́рова о́трасль чу́дная, прине́сшая пло́д до́брый; ра́дуйся, я́ко Еди́наго Го́спода и за́поведи Его́ от ле́т ю́ных возлюби́л еси́.
Ра́дуйся, я́ко благочести́вых роди́телей свои́х прилежа́нием к уче́нию уте́шил еси́; ра́дуйся, я́ко от учи́телей, имени́тых гре́ков, кни́жный ра́зум восприя́л еси́.
Ра́дуйся, в кни́жней му́дрости и богомы́слии преуспе́вый; ра́дуйся, от Святы́х Писа́ний прему́дрость Бо́жию получи́вый.
Ра́дуйся, творе́нии Златоу́стаго Иоа́нна и святы́х отце́в Византи́и у́м сво́й пита́вый; ра́дуйся, целому́дрие, смиренному́дрие и кро́тость от ю́ности храни́вый и чрез все́ житие́ свое́ пронесы́й.
Ра́дуйся, Кири́лле Златоу́сте, покая́ния наста́вниче богому́дрый.
Конда́к 1.
Избра́нный уго́дниче Христо́в и за́поведей Ева́нгельских изря́дный ревни́телю, всея́ Ру́сския земли́ златослове́сный учи́телю, прославля́ем тя́, хода́тая о все́х, с ве́рою усе́рдно к тебе́ прибега́ющих, я́ко ты́ предстои́ши со дерзнове́нием Святе́й Тро́ице, моли́ о на́с, недосто́йных ча́дех твои́х, да в тве́рдости Правосла́вныя ве́ры и доброде́тели поживе́м и со умиле́нием тебе́ воспое́м:
Ра́дуйся, Кири́лле Златоу́сте, покая́ния наста́вниче богому́дрый.
Моли́тва.
Опреди́вный подви́жниче, пресла́вный святи́телю, златослове́сный Росси́йския земли́ учи́телю, вели́кий уго́дниче Бо́жий, Кири́лле! Измла́да Вы́шних бла́г взыску́я, зна́тность ро́да и земна́я бога́тства, я́ко уме́ты, вмени́л еси́, блаже́нне, возлюби́л же еси́ все́м се́рдцем нищету́, бде́ние, поще́ние, смире́ние, ско́рбь и тесноту́ и́ночества, еще́ же и вя́щший Христа́ ра́ди по́двиг подъя́л еси́, восше́д на сто́лп, досточу́дне! Му́дрствуя Го́рняя, испыту́я, что́ е́сть во́ля Бо́жия, блага́я, уго́дная и соверше́нная, непреста́нно ду́шу и се́рдце пита́л еси́ Боже́ственными уче́ньми. Умоле́н бы́в архипа́стырем бы́ти, вои́стинну до́бре упа́сл еси́ Ту́ровскую па́ству твою́, пита́я ю́ здра́выми уче́ньми Правосла́вныя ве́ры и приводя́ к Ца́рствию Небе́сному. Те́мже яви́лся еси́ и́ноков во́ждь, подви́жников сла́ва, Правосла́вия сто́лп, Це́ркви росси́йския свети́ло, па́стырем и архипа́стырем о́браз, все́м ве́рным до́брый руководи́тель к и́стине и пра́вде. Ве́лиим показа́лся еси́ в Ца́рствии Бо́жием, вся́ бо запове́данная Бо́гом са́м неле́ностно сотвори́в, и пре́дков на́ших научи́л еси́ твори́ти. Сего́ ра́ди, к тебе́, Богому́дре Кири́лле, воспева́я просла́вльшагося в тебе́ Бо́га, прибега́ем и, чту́ще твою́ па́мять, мо́лимся: бу́ди хода́тай за на́с, недосто́йных, пред Го́сподом Бо́гом. Твои́ми моли́твами и заступле́нием да утверди́тся в на́с и́стинный ду́х живо́й ве́ры и свята́го благоче́стия, да сохрани́мся все́ мы́ благода́тию Бо́жиею от неве́рия, неправове́рия и суеве́рия, от нра́вственнаго шата́ния и духо́вной не́мощи. Вели́кий уго́дниче подви́жниче Христо́в! Моли́ Ми́лостиваго Бо́га, да издре́вле изоби́льно обита́вшия в Росси́и стремле́ние к вы́сшему нра́вственному соверше́нству, любо́вь к и́ночеству, забо́та о благостоя́нии церкве́й и благоле́пии хра́мов, ре́вность о благочи́нии богослуже́ния церко́внаго вы́ну пребыва́ют достоя́нием на́шим не ослабева́я, не умаля́ясь, но укрепля́ясь, возраста́я и преуспева́я. Святи́телю Кири́лле! Да бу́дут моли́твами твои́ми в оте́честве твое́м па́стыри слове́снаго ста́да Христо́ва ду́хом горя́щии, Го́сподеви рабо́тающии, а не себе́ угожда́ющии, па́ству, а не себе́ пасу́щии. Да бу́дут они́ до́брыми па́стырями, ду́шу свою́ полага́ющими за о́вцы па́ствы свое́й, а не нае́мниками, небрегу́щими о овца́х и при ви́де во́лка бе́гающими и оставля́ющими о́вцы на расхище́ние. Ты́, блаже́нне Кири́лле, и сло́вом и писа́нием учи́л еси́ дре́вле князе́й и все́х люде́й Росси́йския земли́ ходи́ти досто́йно зва́ния своего́. При́зри и на на́с, пото́мков твои́х, ча́д и ученико́в, и умоли́ Бо́га, да ниспо́слет стране́ на́шей тве́рдость и благоустрое́ние, зако́нам на́шим свя́тость и си́лу, прави́телем и судия́м му́дрость, усе́рдие, безкоры́стие и нелицеприя́тие. Испроси́ у Всеще́драго Бо́га все́м на́м и коему́ждо по́рознь благопотре́бная, я́же к животу́ и благоче́стию: немощны́м в ве́ре и до́брых де́лех укрепле́ние, па́дшим восста́ние, подвиза́ющимся до́бре преуспе́яние. Да не оскудева́ют в роди́телех согла́сие, любо́вь, взаи́мное уваже́ние, дру́г о дру́зе благопопече́ние, в рожде́нии ча́д Бо́жие благослове́ние. Ча́да, воспита́нныя в стра́хе Госпо́днем, да уразуме́ют прему́дрость Бо́жию и да младе́нствуют зло́бою, а не умо́м. Детоводи́тели и наста́вники да избы́точествуют в ве́дении и во вся́ком чу́встве, па́че же да изоби́луют благоче́стием и о бла́ге и́стиннем дете́й попече́нием. Пречу́дный святи́телю Кири́лле! Са́м зри́ши страну́, в не́йже роди́лся еси́ и в не́йже мно́го потруди́лся еси́; зри́ши наро́д, его́же дре́вле просвети́л еси́. Са́м ве́си, я́же тре́буем, ве́си на́ша не́мощи и согреше́ния. Бу́ди же на́м помо́щник, покрови́тель, засту́пник и упра́витель жи́зни на́шея. Да под твои́м покро́вом и заступле́нием досто́йно бу́дем сла́вити Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.
Канон святителю Кириллу, епископу Туровскому (первый)
Припев: Святи́телю, о́тче на́ш, Кири́лле, моли́ Бо́га о на́с.
Пе́снь 1.
Ирмо́с: Сече́ное сече́тся мо́ре Чермно́е, волнопита́емая же изсуша́ется глубина́, та́яжде ку́пно безору́жным бы́вши проходи́ма, и всеору́жным гро́б. Пе́снь же богокра́сная воспева́шеся: сла́вно просла́вися Христо́с, Бо́г на́ш.
Тро́ичен: Смы́сла Пода́телю Триипоста́сный Бо́же, Ты́ да́ждь на́м ра́зум и сло́во, да, отве́рзше недосто́йная уста́, воспои́м святи́теля Кири́лла, Ту́ровския земли́ па́стыря и учи́теля и всея́ Руси́ свети́льника.
Весели́ся ны́не и ра́дуйся, гра́де Ту́рове, ни чи́мже ме́ньший ты́ еси́ в зе́млях Белору́сских, но па́че сла́вою и че́стию возвели́ченный изря́дных уго́дников Бо́жиих, от ни́хже мы́ святи́теля Кири́лла дне́сь благогове́йно прославля́ем.
Я́коже уме́ты вмени́л еси́ бога́тство тле́нное и сла́ву скороги́бнущую, избра́нниче Бо́жий Кири́лле, от ю́ности яви́вый ума́ твоего́ боже́ственная устремле́ния, я́же ко спасе́нию, во объя́тия О́тча пу́ть указу́ющая.
Богоро́дичен: Ти́хое Приста́нище к Тебе́ прибега́ющих, Преблагослове́нная Влады́чице, моли́ из Тебе́ воплоще́ннаго Христа́ Бо́га на́шего, во е́же бежа́ти на́м суеты́ ми́ра сего́, и во вся́ком ме́сте и зва́нии небе́снаго Ца́рствия удосто́итися.
Пе́снь 3.
Ирмо́с: Госпо́дь, Сы́й, все́х и Зижди́тель Бо́г, созда́нное, Безстра́стный, обнища́в, Себе́ соедини́, и Па́сха, за я́же хотя́ше умре́ти, Са́м Сы́й, Себе́ предпожре́: яди́те, — вопия́, — Те́ло Мое́ и ве́рою утверди́теся.
Измла́да прилежа́л еси́, о́тче, уче́нию кни́жному, и Боже́ственным Писа́нием свы́ше укрепля́емь и просвеще́н, прише́л еси́ во оби́тель и́ноческую порабо́тати Го́сподеви.
Те́ло твое́ посто́м и бде́нием сотвори́л еси́ прия́телище Ду́ха Свята́го, о́тче свяще́ннейший, Кири́лле богому́дре, и́ноком яви́лся еси́ о́браз и пра́вило, па́че все́х тружда́яся.
Е́же не и́мать послуша́ния ко игу́мену и все́й во Христе́ бра́тии, я́коже обеща́ся при постриже́нии, таковы́й мона́х спасе́н бы́ти не мо́жет, — взыва́л еси́ непреста́нно, преподо́бнейший, да не уло́вишися в бесо́вския се́ти.
Богоро́дичен: Лю́дие непокори́вии и суему́дреннии, почто́ в похоте́ниих свои́х косне́ете? Поревну́йте послуша́нию Богоотрокови́цы, Я́же Гаврии́лу рече́: Се́ раба́ Госпо́дня. И та́ко мы́сляще и де́юще смире́нию нелицеме́рному навыко́сте.
Конда́к:
В Ту́рове, свя́те, священноде́йствитель показа́лся еси́, Христо́во бо, о́тче Кири́лле, Ева́нгелие испо́лнив, положи́л еси́ ду́шу твою́ о лю́дех твои́х и соблю́л еси́ еди́нство Це́ркве Ру́сския. Сего́ ра́ди освяти́лся еси́, я́ко вели́кий таи́нник Бо́жия благода́ти.
И́кос:
Воспои́м ны́не святи́теля Кири́лла пе́сньми, Ту́ровским лю́дем па́стыря и учи́теля, и всея́ Ру́сския земли́ Златоу́ста, да предста́тельством его́ просвети́мся, и боже́ственных слове́с его́ поуче́нием отста́нем вся́кия ле́сти и суеты́, порабо́таим неле́ностно Го́сподеви и яви́мся чи́сти душа́ми и телесы́, я́коже и се́й уго́дник Христо́в и вели́кий таи́нник Бо́жия благода́ти.
Седа́лен:
От ю́ности взе́м кре́ст тво́й, благочести́во Христу́ после́довал еси́, увяди́в плотско́е мудрова́ние воздержа́нием. Те́мже на святи́тельском седа́лищи се́д, возвели́чил еси́ Влады́ку и Того́ Пречи́стую Ма́терь, о́тче Кири́лле богоблаже́нне.
Пе́снь 4.
Ирмо́с: Прови́дев проро́к та́йну Твою́ неизрече́нную, Христе́, провозгласи́: положи́л еси́ тве́рдую любо́вь кре́пости, О́тче Ще́дрый, Единоро́днаго бо Сы́на, Благи́й, очище́ние в ми́р посла́л еси́.
Ева́нгельских слове́с уче́нием после́дуя, о́тче Кири́лле, избра́л еси́ те́сный пу́ть и та́ко возше́л еси́ на ве́рх доброде́телей, на столпе́ еди́н затвори́вся, подвиза́яся в посте́ и богомы́слии.
Избе́г суесло́вия и пра́здности, Боже́ственными Писа́нии у́м сво́й просвети́л еси́, и во свяще́ннем безмо́лвии очи́стил еси́ от страсте́й ду́шу, я́же всего́ ми́ра вя́щше.
Изволе́нием Ду́ха Свята́го избра́ша вси́ лю́дие тя́, о́тче Кири́лле, во архипа́стыря Ту́ровскаго, ты́ же, неотсту́пному моле́нию и́х повину́яся, за послуша́ние са́н восприя́л еси́, не ра́ди себе́, но ра́ди сла́вы Бо́жия.
Богоро́дичен: Престо́ле о́гненный, ра́дуйся, Неве́сто неневе́стная, Ма́ти Пречи́стая, Пала́то преукраше́нная, Киво́те святы́й, Бо́га Невмести́маго Вмести́лище.
Пе́снь 5.
Ирмо́с: Сою́зом любве́ связу́еми, апо́столи, влады́чествующему все́ми себе́ Христу́ возло́жше, кра́сны но́ги очища́ху, благовеству́юще все́м ми́р.
Раче́ние о па́стве своея́ име́я, ко спасе́нию вы́ну все́х наставля́л еси́, сло́вом и житие́м бы́ти христиа́нскаго зва́ния досто́йны.
Едине́ние ду́ха в сою́зе ми́ра соблюда́л еси́, по апо́столу, богому́дре, и ра́спри тлетво́рныя и лука́вая разделе́ния пресека́л еси́.
Про́клят вся́к, и́же мы́слит зла́я, раздели́ти ма́терь на́шу Це́рковь Ру́сскую, таковы́й е́сть богоотсту́пник, — дерзнове́нно провозгласи́л еси́, святи́телю Кири́лле.
Богоро́дичен: Отсека́ют са́ми себе́ от Це́ркве Бо́жия, не чту́щия правосла́вно Пречи́стую Богоро́дицу, мы́ же ве́рнии немо́лчно Ю велича́ем, Засту́пницу на́шу усе́рдную.
Пе́снь 6.
Ирмо́с: Бе́здна после́дняя грехо́в обы́де мя́, и, волне́ния не ктому́ терпя́, я́ко Ио́на Влады́це, вопию́ Ти: от тли́ мя возведи́.
До́браго Па́стыря Христа́ стопа́м после́дуя, взыска́ти овча́ поги́бшее прише́дшаго, святи́телю Кири́лле, потща́лся еси́, да никто́же в па́стве твое́й от злове́рия поги́бнет.
Орга́н Уте́шителя Ду́ха и́стины бы́в, наста́вил еси́, о́тче, твои́ми писа́нии сыно́в земли́ Ру́сския пресека́ти ко́зни лука́внующих.
Боголю́бскому кня́зю Андре́ю мно́гая посла́ния душеполе́зная написа́в, яви́лся еси́, богодухнове́нный Кири́лле, среди́ бу́рь жите́йских путево́ждь ко спасе́нию.
Богоро́дичен: На небеса́ возвела́ еси́ естество́ челове́ческое, в ти́не страсте́й иногда́ лежа́вшее, Преблагослове́нная Ма́ти и Де́во, Христа́ Бо́га ро́ждшая.
Конда́к:
Бо́дрствуя в моли́твах, послуша́ния и благоче́стия до́брый рачи́тель бы́в, терпе́нию и смире́нию науча́л еси́ па́ству свою́, доброде́тельми преподо́бия и пра́вды ста́до Христо́во озаря́я, и медото́чными словесы́ всю́ зе́млю Ру́сскую пита́я, на пра́вый пу́ть за́поведей Госпо́дних си́лою ду́ха твоего́ наставля́л еси́ все́х, и ны́не просвети́, я́ко со́лнце, лю́ди омраче́нныя грехми́ и к покая́нию на́с приведи́.
И́кос:
Прииди́те дне́сь, лю́дие, похва́лим своего́ святи́теля, глаго́люще ему́: ра́дуйся, Кири́лле, святи́телю честны́й и учи́телю на́ш, други́й Златоу́сте, на Руси́ па́че все́х возсия́, святы́м и пресве́тлым уче́нием твои́м концы́ Ру́сския просвети́в; ра́дуйся, я́ко со́лнце, омраче́нныя и те́мныя богоразу́мием просвеща́еши и умудря́еши! Мо́лим ти ся, святи́телю, ма́лое сие́ моле́ние принося́ще: моли́ о на́с Вседержи́теля, Ему́же ны́не предстои́ши со дерзнове́нием, от належа́щих бе́д, скорбе́й, боле́зней и томле́ния вра́жия изба́витися, и от наше́ствия безбо́жнаго ага́рянскаго и междоусо́бныя бра́ни сохрани́тися на́м и во Правосла́вии все́м утверди́тися. Да улучи́м по ми́лости Бо́жией моли́твами твои́ми грехо́в отпуще́ние и присносу́щных бла́г наслажде́ние, с ве́рою и любо́вию, со умиле́нием при́сно тебе́ пою́щия: ра́дуйся, златослове́сный и кро́ткий Росси́йский учи́телю богому́дре Кири́лле, покая́ния, чистоты́ и благоче́стия усе́рдный ревни́телю и моли́твенниче о спасе́нии ду́ш на́ших.
Пе́снь 7.
Ирмо́с: О́троцы в Вавило́не пе́щнаго пла́мене не убоя́шася, но, посреде́ пла́мене вве́ржени, ороша́еми, поя́ху: благослове́н еси́, Го́споди, Бо́же оте́ц на́ших.
Испо́лнив служе́ние свое́, преше́л еси́ в жи́знь безконе́чную, подвиза́я все́х с тобо́ю взыва́ти: благослове́н еси́, Го́споди, Бо́же оте́ц на́ших.
Христолю́бцы, лику́йте, соверша́юще па́мять святи́теля Кири́лла, и в весе́лии подвиза́йте все́х пе́ти: благослове́н еси́, Го́споди, Бо́же оте́ц на́ших.
Оте́ческаго благоче́стия ревни́телие, держа́щии свята́го Кири́лла моли́твы и кано́ны, воспо́йте с на́ми вку́пе: благослове́н еси́, Го́споди, Бо́же оте́ц на́ших.
Богоро́дичен: Упова́ющии на Тя́, Богоро́дице, николи́же посра́млены су́ть, но под кро́вом Твои́м сохраня́еми, благословля́ют Твое́ пред Бо́гом предста́тельство.
Пе́снь 8.
Ирмо́с: За зако́ны оте́ческия блаже́ннии в Вавило́не ю́ноши, предбе́дствующе, царю́ющаго оплева́ша повеле́ние безу́мное и, совоку́плени, и́мже не свари́шася огне́м, Держа́вствующему досто́йную воспева́ху пе́снь: Го́спода по́йте, дела́, и превозноси́те во вся́ ве́ки.
Кири́лле святи́телю, реши́ти же и вяза́ти от Бо́га име́я вла́сть, вся́ разреши́ грехопаде́ния твою́ па́мять соверша́ющих, покая́ние те́плое принося́щих, к Ча́ше Безсме́ртия приступа́ющих, вопию́ще во умиле́нии: Го́спода по́йте, дела́, и превозноси́те во вся́ ве́ки.
Ра́дуйся, святе́йшая Митропо́лие, Це́рковь Белору́сская, я́ко труба́ возглаша́й в де́нь па́мяти святи́теля Кири́лла, и́бо Госпо́дь благослови́ и умно́жи тя́, архиере́и, свяще́нницы, и́ноцы и вся́ ча́да твоя́ ны́не велегла́сно взыва́ют: Го́спода по́йте, дела́, и превозноси́те во вся́ ве́ки.
А́нгелы и челове́цы вку́пе дне́сь лику́ют, прославля́юще святи́теля Кири́лла, па́ства Ту́ровская пра́зднует благогове́йно, я́ко христиа́ном подоба́ет, и хвалу́ Бо́гови воздае́т: Го́спода по́йте, дела́, и превозноси́те во вся́ ве́ки.
Богоро́дичен: Шата́нием язы́ческим и суему́дрием плотски́м ослепле́н, у́м гордели́вый не мо́жет пости́гнути та́инство рождества́ Твоего́, Присноде́во, но чи́ст и смире́н се́рдцем, Тя́ ве́дая и́стинную Богоро́дицу, взыва́ет: Го́спода по́йте, дела́, и превозноси́те во вся́ ве́ки.
Пе́снь 9.
Ирмо́с: Ве́чное обре́тше избавле́ние, от пра́отца Ада́ма свы́ше рожде́нное, ро́ду стра́шнаго изрече́ния, рождество́ со безпло́тными непостижи́мое славосло́вим, Богоро́дицу Тя́ пе́сньми велича́юще.
Ежеле́тняя па́мять твоя́, сла́вне, духо́вная весна́ все́м ве́рным яви́ся, зима́ грехо́вная упраздни́ся, и лику́ет дне́сь па́ства Ту́ровская, я́коже цвета́ми, пе́сньми Це́рковь Христо́ву украша́ющи.
Ны́не с на́ми веселя́тся святи́и му́ченицы Бори́с и Гле́б, и Лавре́нтий и Марти́н затво́рницы, и кня́зи Андре́й и Бори́с, и свяще́ннейшии страда́льцы Мака́рий, Иоа́нн и ини́и мно́зии, вку́пе со святи́телем Кири́ллом, Ту́ровския земли́ свети́льницы.
Иорда́нским струя́м подо́бящися, взыгра́й, реко́ При́пяте, ко свяще́нному Днепру́ и гора́м Ки́евским во́ды своя́ несу́щи и возвраща́ющи вспя́ть кресты́ ка́менныя, я́же и до ны́не зе́млю Ту́ровскую освяща́ют.
Богоро́дичен: Ея́же ра́ди просла́вися земля́ на́ша да́же и до Ки́ева, Пречу́дная Ма́ти Бо́жия, на кресте́ Купя́тицкий о́браз Сво́й яви́вшая и на́с гре́шных ми́лостивно утеша́ющая, при́сно хвале́бными гла́сы Тя́ велича́ем.
Свети́лен:
Све́тлым уче́нием богоразу́мия своего́ просвети́, блаже́нне о́тче, все́х соверша́ющих па́мять твою́.
Канон святителю Кириллу, епископу Туровскому (второй)
Припев: Святи́телю, о́тче на́ш, Кири́лле, моли́ Бо́га о на́с.
Пе́снь 1.
Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.
Ту́ровскаго святи́теля Кири́лла, земли́ на́шея вели́каго свети́льника, сподо́би, Го́споди, воспе́ти ми́ недосто́йному.
Устне́ имы́й нечи́стая, дерза́ю восхвали́ти архипа́стыря, яви́вшаго ча́дом церко́вным пра́вило ве́ры и о́браз смире́ния.
Река́ уче́ний боже́ственных яви́лся еси́, святи́телю Кири́лле, и напая́еши при́сно мое́ изсо́хшее се́рдце.
Богоро́дичен: Голуби́це Пренепоро́чная, Ма́ти Христа́ Бо́га, приведи́ мя́ жа́ждущаго ко исто́чнику жи́зни ве́чныя.
Пе́снь 3.
Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.
Оста́вив ми́ра сего́ тле́нная, и́го Христо́во на ра́мо возложи́в, поне́сл еси́ труды́ сугу́быя, на столпе́ в затво́ре те́снем.
Воздержа́нием и́стинным и моли́твою непреста́нною возше́л еси́ на ве́рх доброде́телей, подо́бно дре́вним вели́ким подви́жником.
Сто́лпника но́ваго тя́ ве́мы, о́тче на́ш Кири́лле, и ле́ствичника преди́внаго, наста́вника благоче́стия.
Богоро́дичен: Еди́ну Благослове́нную, Пречи́стую Влады́чицу, воспева́ем вси́ ве́рнии, я́ко одушевле́нное не́бо и престо́л херуви́мский.
Седа́лен:
Ю́же с высоты́ му́дрость уве́дев и благода́ть слове́с от Бо́га, просия́л еси́ на Руси́ я́ко вторы́й Златоу́ст, сло́во Бо́жие неле́ностно пропове́дал еси́, вся́кое беззако́ние и ле́сть попра́в словесы́ твои́ми. Те́мже по Бо́зе ре́вностию кня́зя обличи́в, и Федо́рца посрами́л еси́ ерети́ческое мудрова́ние. Святи́телю Кири́лле, моли́ Христа́ Бо́га прегреше́ний оставле́ние дарова́ти пра́зднующим любо́вию святу́ю па́мять твою́.
Богоро́дичен: От Тро́ицы Еди́наго неизрече́нно заче́нши, Де́во, и чу́дно Сего́ родила́ еси́ па́че сло́ва и мы́сли, и о́бщно Боже́ственнаго естества́ устро́ила еси́ челове́ческое естество́, дре́вле изгна́нное. Те́мже, соше́дшеся, Рождество́м Твои́м вси́ спа́сшиися, Всенепоро́чная, Твои́м словесе́м после́дующе, достодо́лжно Тя́ ублажа́ем, моля́ще Христа́ Бо́га прегреше́ний оставле́ние дарова́ти ве́рою Тя́ сла́вящим, Ма́терь Его́.
Пе́снь 4.
Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Кири́лла богому́драго, Боже́ственных Писа́ний рачи́теля, ко святи́тельскому служе́нию Вели́кий Архиере́й Христо́с призва́л е́сть.
А́ще и жела́л еси́ уклони́тися от сла́вы земны́я, но оба́че не возмо́гл еси́ презре́ти избра́ния Бо́жия.
Гла́с тво́й, о́тче Кири́лле, и до ны́не слы́шен е́сть: не пренебрега́йте, христиа́не, соверше́нием Боже́ственныя Евхари́стии.
Богоро́дичен: Освяще́нная Трапе́зо, на Не́йже Хле́б сла́дкий испече́ся, Богоро́дице Мари́е, помога́й пою́щим Тя́.
Пе́снь 5.
Ирмо́с: У́тренююще, вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве Тебе́, ино́го не ве́мы.
Оглаша́юся твои́ми словесы́ благода́тными, Ту́ровский святи́телю, я́же Це́рковь Ру́сская, а́ки би́сер многоце́нный сохраня́ет.
Златослове́сный учи́телю, па́че все́х возсия́вый на Руси́, о́тче на́ш Кири́лле, предста́тельствуй за па́ству твою́ пред Го́сподем.
Люде́й правосла́вных хода́тай, апо́столом подо́бник во благове́стиих и бде́ниих, вои́стинну, о́тче, яви́лся еси́.
Богоро́дичен: Роди́вся от Де́вы, ми́р просвети́л еси́, Христе́ Бо́же, и мене́ от прегреше́ний мои́х изба́ви, я́ко Человеколю́бец, и упра́ви живо́т мо́й, молю́ Тя.
Пе́снь 6.
Ирмо́с: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.
А́ще и не и́мамы, гре́шнии, еле́я до́брых де́л, но моли́твами святи́теля Кири́лла, Светода́вче, на́с просвети́.
Тме суеве́рия, отше́дшей иногда́ от па́ствы твоея́, не да́ждь ны́не поглоти́ти на́с, о́тче Кири́лле.
Ору́жием вооружи́вся сло́ва Бо́жия, отгна́л еси́ мглу́ бесо́вскую и посе́кл еси́ нечести́вое ерети́ческое те́рние.
Богоро́дичен: Госпоже́ Пречи́стая, не оста́ви мя́ во мра́це ги́блема, но умоли́ Сы́на Своего́ поми́ловати мя́ окая́ннаго.
Пе́снь 7.
Ирмо́с: В нача́ле зе́млю основа́вый, и небеса́ сло́вом утверди́вый, благослове́н еси́ во ве́ки, Го́споди, Бо́же оте́ц на́ших.
Уве́дев непотре́бное умышле́ние раздели́ти Це́рковь Ру́сскую, со дерзнове́нием, о́тче, обличи́л еси́ слепца́ и хромца́.
Сла́вным и кра́сным ми́ра сего́ не угожда́л еси́, святи́телю Кири́лле, но Еди́ному Го́споду со благогове́нием порабо́тал еси́.
Тро́ицы Пресвяты́я служи́телие, Единосу́щныя и Неразде́льныя, николи́же посра́мятся, ни в се́м ве́це, ни в бу́дущем.
Богоро́дичен: Иера́рхов похвало́, иере́ев украше́ние, люде́й Бо́жиих покро́ве ши́рший о́блака — Ты́ еси́, Ма́ти Де́во.
Пе́снь 8.
Ирмо́с: На горе́ святе́й просла́вльшася, и в купине́ огне́м Присноде́вы, Моисе́ови та́йну я́вльшаго, Го́спода по́йте и превозноси́те во вся́ ве́ки.
Апо́столом подо́бяся, благове́стниче преди́вный, изъясни́л еси́ ве́рным во вся́ком де́ле и сло́ве Боже́ственная Писа́ния.
Глаго́лы богодухнове́нныя, путеводя́щия в небе́сное Ца́рствие, пропове́дал еси́ пра́отцем на́шим, первоучи́телю Кири́ллу подража́я.
Освяще́нный богоно́сче, ми́ром пома́занный святи́телю Бо́жий, Тро́ицу во Еди́ном Существе́ пое́ши и превозно́сиши во вся́ ве́ки.
Богоро́дичен: Обра́дованная, ра́дуйся, с Тобо́ю Госпо́дь, со арха́нгелом Гаврии́лом и мы́ воспева́ем дерзнове́нно.
Пе́снь 9.
Ирмо́с: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.
Покая́ния наста́вниче, моли́твенниче преизя́щный, помоли́ся Христу́ Бо́гу о почита́ющих па́мять твою́.
О́тче Кири́лле, Ту́ровский Златоу́сте, восхваля́ем тя́ немо́лчно, пе́сньми свяще́нными велича́юще.
Ю́ноши и ста́рцы, вся́к во́зраст и сосло́вие, поуча́ются твои́ми, святи́телю, наказа́ньми и исправле́ньми.
Богоро́дичен: Сло́ва па́че сло́ва ро́ждшая, Пречи́стая, моли́ся приле́жно ко Влады́це, в небе́снем Оте́честве со святи́телем Кири́ллом и на́м водвори́тися.