Канон преподобному Иоанну Лествичнику, игумену Синайскому

ПЕРЕЙТИ на «Лествицу»

Глас 8

Песнь 1

Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Припев: Преподо́бне о́тче на́ш Иоа́нне, моли́ Бо́га о на́с.

Во Свет невеще́ственный и у́мный/ от се́тования веще́ственных восте́к, Иоа́нне преподо́бне,/ моли́твами твои́ми, су́щими ко Го́споду, просвети́ мя.

Припев: Преподо́бне о́тче на́ш Иоа́нне, моли́ Бо́га о на́с.

Я́ко воздержа́ния сла́дость ссав,/ отри́нул еси́ го́ресть страсте́й,/ те́мже па́че ме́да и со́та услажда́вши, о́тче, чу́вства на́ша.

Сла́ва Отцу́ и Сы́ну и Свято́му Ду́ху.

Возше́д на высоту́ доброде́телей/ и долере́вностныя поплева́в сла́сти,/ сла́дость яви́лся еси́ спасе́ния, преподо́бне о́тче, па́стве твое́й.

И ны́не и при́сно и во ве́ки веко́в. Ами́нь.

Богородичен: Прему́дрость и Сло́во О́тчее несказа́нно ро́ждшая,/ души́ моея́ лю́тую уврачу́й я́зву/ и се́рдца боле́знь укроти́.

Песнь 3

Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Припев: Преподо́бне о́тче на́ш Иоа́нне, моли́ Бо́га о на́с.

Попали́л еси́ у́глем поще́ния, преподо́бне, страсте́й те́рние/ и гре́еши мона́шествующих состоя́ния.

Припев: Преподо́бне о́тче на́ш Иоа́нне, моли́ Бо́га о на́с.

Ми́ро освяще́ния,/ от по́стнических, преподо́бне, арома́т ве́сь сложи́лся еси́/ в воню́ благоуха́ния Бо́жия.

Сла́ва Отцу́ и Сы́ну и Свято́му Ду́ху.

В зако́нех обуче́ния поуча́лся,/ стра́сти погрузи́л еси́, я́коже ины́я ны́не фараони́ты,/ тече́нием слез твои́х.

И ны́не и при́сно и во ве́ки веко́в. Ами́нь.

Богородичен: Уста́ви мое́ нестоя́нное по́мыслов, Чи́стая, смуще́ние, Ма́ти Бо́жия,/ к Сы́ну Твоему́ направля́ющи движе́ние.

Седален, глас 8

Виде́нием и дея́нием преесте́ственне просия́в, облиста́еши уче́ньми,/ зако́ны нам положи́л еси́ Богому́дрыя, блаже́нне,/ доброде́телей добро́ты степе́ни поста́вль/ и зло́бы ле́сти показа́в и ловле́ния./ Отону́дуже возво́диши твои́м после́дующия Боже́ственным уче́нием/ от страсте́й к безстра́стию, Иоа́нне равноа́нгельне,/ моли́ Христа́ Бо́га прегреше́ний оставле́ние пода́ти/ чту́щим любо́вию святу́ю па́мять твою́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ О́гнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Песнь 4

Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Припев: Преподо́бне о́тче на́ш Иоа́нне, моли́ Бо́га о на́с.

Я́ко цветни́к благово́ннейший и доброде́телей рай одушевле́нный,/ воздержа́ние процве́л еси́,/ и́мже вся пита́еши, чту́щия тя.

Припев: Преподо́бне о́тче на́ш Иоа́нне, моли́ Бо́га о на́с.

3аконоположи́теля обуче́ния и мона́хов пра́вило кротча́йшее,/ я́ко Моисе́я тя и Дави́да, и́стинно стяжа́вше, о́тче, ублажа́ем.

Сла́ва Отцу́ и Сы́ну и Свято́му Ду́ху.

Насажде́н на вода́х воздержа́ния,/ яви́лся еси́, блаже́нне, розга́, о́тче, благоцве́тнейшая,/ благоче́стия гро́зды произнося́щая.

И ны́не и при́сно и во ве́ки веко́в. Ами́нь.

Богородичен: Под ле́том бы́вша,/ от Отца́ безле́тно возсия́вша, Богома́ти, нам родила́ еси́,/ Его́же моли́ спасти́ пою́щия Тя.

Песнь 5

Ирмос: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя е́сть чужда́я тьма́, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Припев: Преподо́бне о́тче на́ш Иоа́нне, моли́ Бо́га о на́с.

Погаси́в вся стра́сти росо́ю по́двигов твои́х, о́тче блаже́нне,/ оби́льно вжег огне́м любве́ и ве́ры воздержа́ния свети́льник,/ и просвеще́ние безстра́стия, и дне сын был еси́.

Припев: Преподо́бне о́тче на́ш Иоа́нне, моли́ Бо́га о на́с.

Ве́ры грозд Боже́ственным земледе́ланием твои́м, о́тче, воспита́л еси́,/ и в точи́ла вложи́л еси́, и изгне́л еси́ труды́ обуче́ния,/ и, ча́шу испо́лнив духо́вную воздержа́ния, весели́ши се́рдца па́ствы твоея́.

Сла́ва Отцу́ и Сы́ну и Свято́му Ду́ху.

Претерпе́в до́блественно прило́ги и я́звы неви́димых враго́в,/ яви́лся еси́ столп терпе́ния,/ утвержда́я па́ству твою́ па́лицею Боже́ственною на па́житех воздержа́ния/ и на воде́ воспитова́я, блаже́нне.

И ны́не и при́сно и во ве́ки веко́в. Ами́нь.

Богородичен: Рече́м Твои́х усте́н, Всечи́стая, после́дующе, Тя ублажа́ем:/ с Тобо́ю бо вои́стинну вели́чия сотвори́вый Госпо́дь возвели́чи Тя,/ и и́стинную Бо́жию Ма́терь рожде́йся из чре́ва Твоего́ показа́.

Песнь 6

Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Припев: Преподо́бне о́тче на́ш Иоа́нне, моли́ Бо́га о на́с.

Собра́л еси́ в души́ Боже́ственное бога́тство Ду́ха,/ непоро́чную моли́тву, чистоту́, че́стность,/ бде́ние всегда́шнее, воздержа́ния труды́,/ и́миже дом позна́лся еси́ Бо́жий.

Припев: Преподо́бне о́тче на́ш Иоа́нне, моли́ Бо́га о на́с.

Вещества́ до́льняго, прему́дре, прете́кл еси́ ху́дость,/ невеще́ственною же моли́твою ум впери́в,/ и Вы́шняго упокое́ния яви́лся еси́ насле́дник соверше́нством жития́.

Сла́ва Отцу́ и Сы́ну и Свято́му Ду́ху.

По́тами по́стническими у́глие стрел вра́жиих угаси́л еси́ вои́стинну/ и, о́гнь ве́ры вжег, попали́л еси́ неве́рия ересе́й шата́ния.

И ны́не и при́сно и во ве́ки веко́в. Ами́нь.

Богородичен: Возсия́ от Сио́на вы́шняго благоле́пие/ предложе́нием пло́ти по соедине́нию неизрече́нному,/ из Тебе́, Неискусобра́чная, обложе́нное, и мир просвети́.

Кондак, глас 4

На высоте́ Госпо́дь воздержа́ния и́стинна тя положи́,/ я́коже звезду́ неле́стную, световодя́щую концы́,/ наста́вниче Иоа́нне, о́тче наш.

Икос

Дом Бо́жий я́ко вои́стинну тебе́ сама́го соде́лал еси́, о́тче,/ Боже́ственными твои́ми доброде́тельми/ я́ве украси́в, я́ко зла́то све́тлое, ве́ру, наде́жду и любо́вь и́стинную,/ Боже́ственныя зако́ны излага́я, воздержа́нием обучи́вся, я́ко безпло́тен,/ ра́зум, му́жество, целому́дрие стяжа́в,/ смире́ние, и́мже возвы́сился еси́./ Те́мже и, просвети́вся моли́твами непреста́нными,/ виде́нии та́йными впери́лся еси́ и Небе́сный прия́л еси́ селе́ния,/ наста́вниче Иоа́нне, о́тче наш.

Песнь 7

Ирмос: От Иуде́и доше́дше, о́троцы/ в Вавило́не иногда́/ ве́рою тро́ическою пла́мень пе́щный попра́ша, пою́ще:/ отпев Бо́же, благослове́н еси́.

Припев: Преподо́бне о́тче на́ш Иоа́нне, моли́ Бо́га о на́с.

На зла́це Вы́шняго Ца́рствия ста́до, о́тче, воспита́л еси́/ и, жезло́м догма́тов зве́ри отгна́в ересе́й, воспе́л еси́:/ оте́ц на́ших Бо́же, благослове́н еси́.

Припев: Преподо́бне о́тче на́ш Иоа́нне, моли́ Бо́га о на́с.

В Го́рний вшел еси́ неве́стнический черто́г Ца́рства Христо́ва,/ оде́ждею облече́н, досто́йною зва́вшаго,/ в не́мже и возле́гл еси́, вопия́:/ оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху.

Невла́жная грехми́ река́ яви́лся еси́ воздержа́ния, о́тче,/ по́мыслы потопля́я и скве́рну очища́я вопию́щих ве́рою:/ оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Из чре́ва Твоего́ про́йде воплоти́выйся, Де́во, всех Госпо́дь./ Те́мже Тя, Богоро́дицу, му́дрствующе правосла́вно, Сы́ну Твоему́ зове́м:/ оте́ц на́ших Бо́же, благослове́н еси́.

Песнь 8

Ирмос: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Припев: Преподо́бне о́тче на́ш Иоа́нне, моли́ Бо́га о на́с.

Столп тя одушевле́нный я́ко вои́стинну/ и о́браз воздержа́ния, о́тче, стяжа́вше,/ вси твою́ па́мять почита́ем, Иоа́нне.

Припев: Преподо́бне о́тче на́ш Иоа́нне, моли́ Бо́га о на́с.

Мно́жество ра́дуется мона́хов,/ и лику́ет преподо́бных собо́р и пра́ведных,/ вене́ц бо досто́йно с си́ми прия́л еси́.

Сла́ва Отцу́ и Сы́ну и Свято́му Ду́ху.

Укра́шен доброде́тельми,/ в неве́стник неизрече́нныя сла́вы возше́л еси́,/ пе́снь воспева́я Христу́ во ве́ки.

И ны́не и при́сно и во ве́ки веко́в. Ами́нь.

Богородичен: По́мощи я́же от Тебе́ тре́бующия не пре́зри, Де́во,/ пою́щия и превознося́щия Тя во ве́ки.

Песнь 9

Ирмос: Чи́стую сла́вно почти́м,/ лю́дие, Богоро́дицу,/ о́гнь Божестве́ прии́мшую во чре́ве неопа́льно,/ пе́сньми велича́ем.

Припев: Преподо́бне о́тче на́ш Иоа́нне, моли́ Бо́га о на́с.

Врач боля́щих в прегреше́ниих от Бо́га, блаже́нне,/ губи́тель же яви́лся еси́ и прогони́тель лука́вых духо́в,/ те́мже тя ублажа́ем.

Припев: Преподо́бне о́тче на́ш Иоа́нне, моли́ Бо́га о на́с.

Зе́млю, я́коже тли жили́ще, оста́вил еси́, о́тче,/ и в земли́ всели́лся еси́ кро́тких,/ и с ни́ми весели́шися, Боже́ственный наслажда́яся сла́дости.

Сла́ва Отцу́ и Сы́ну и Свято́му Ду́ху.

Дне́сь де́нь пра́зднственный/ вся бо созыва́ет мона́шествующих ста́да в лик духо́вный,/ трапе́зу и сне́дь нетле́нныя жи́зни.

И ны́не и при́сно и во ве́ки веко́в. Ами́нь.

Богородичен: В Тебе́ всели́вся, Всенепоро́чная,/ пре́жде родонача́льники злонравнаго прельсти́вшаго человекоуби́йцу низложи́вый роди́ся/ и вся ны спа́се.

Светилен

Ми́ра пристра́стия, я́ко от скве́рны уклони́лся еси́/ и, а́лчбою пло́ть увяди́в, обнови́л еси́ души́ кре́пость, преподо́бне,/ и сла́вою обогати́лся еси́ Небе́сною, приснопа́мятне./ Те́мже не преста́й моля́ся о нас, Иоа́нне.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Госпо́дственно Богоро́дицу Тя испове́дуем, Влады́чице, Тобо́ю спа́сшиися,/ и́бо Бо́га неизрече́нно родила́ еси́, разо́ршаго Кресто́м сме́рть,/ к Себе́ же привле́кшаго преподо́бных собо́ры,/ с ни́миже Тя восхваля́ем, Де́во.

Тропарь, глас 8

Слез твоих теченьми пустыни безплодное возделал еси, / и иже из глубины воздыханьми во сто трудов уплодоносил еси, / и был еси светильник вселенней, / сияя чудесы, Иоанне, отче наш, // моли Христа Бога спастися душам нашим.

Ин тропарь, глас 4

Яко Божественную лествицу, обретохом, Иоанне преподобне, / твоя Божественныя добродетели, / к Небеси возводящия ны: добродетелей бо ты был еси воображение. // Тем моли Христа Бога, да спасет души наша.

Кондак, глас 1

Плоды присноцветущия, /от твоей книги принося учения, премудре, / услаждавши сердца, сим с трезвением внемлющих, блаженне: лествица бо есть, души возводящая от земли к Небесней и пребывающей славе // верою чтущих тя.

Ин кондак, глас 4

На высоте Господь воздержания истинна тя положи, / якоже звезду нелестную, световодящую концы, // наставниче Иоанне, отче наш.

Величание

Ублажаем тя, преподобне отче Иоанне, и чтим святую память твою, наставниче монахов и собеседниче ангелов.