ПЕРЕЙТИ на главную страницу творений
АКАФИСТ блаженному Августину, епископу Иппонийскому
КАНОН блаженному Августину Иппонийскому
АКАФИСТ блаженному Августину, епископу Иппонийскому
Кондак 1
Возбранный святителю и изрядный учителю Церкви Божия, миру всему источаяй твоих учений дарование и многочисленное писаний познание, восхваляем тя любовию, святителю Августине; ты же, яко имеяй дерзновение ко Господу, от всяких нас бед свободи, да зовем ти:
Радуйся, Августине, учителю благодати, по дару Христа подаваемыя.
Икос 1
Ангела образом, земнаго суща естеством, яви тебе всея твари Создатель, егда крещение от святаго Амвросия в Медиолане прияти тя сподобил есть, Августине блаженне, научи всех пети тебе сице:
Радуйся, по молитвам матери твоея Моники ко Христу пришедый;
радуйся благодатию от купели крещения просвещенный.
Радуйся, от святителя Амвросия Евангелию наученный;
радуйся, силу духовную абие по святом просвещении явивый.
Радуйся, саде премудрости Божественныя;
радуйся, цвете священного учения.
Радуйся, лозо добродетельная Церкви Христовой;
радуйся, древо богомудрое Рая мысленного.
Радуйся, крине Райского благоухания;
радуйся, миро Христова познания.
Радуйся, яко тобою отгонится заблуждение;
радуйся, яко тобою приносится научение.
Радуйся, Августине, учителю благодати, по дару Христа подаваемыя.
Кондак 2
Видяще в твоих писаниях спасительное назидание, Богомудре, просвещаемся сердцем и умы, дивнаго тя Учителя Церкви, Августине, разумеюще; поученьми бо, яко водами, благодатию Божиею изливающимися, напаяеши верно вопиющих Богу: Аллилуиа.
Икос 2
Разум неуразуменный вразумляя о Святей Троице, был еси во Иппоне пред лицем паствы твоея поборник исповедания православныя веры: равну бо Отцу Сына и Духа исповедал еси, единосущну и сопрестольну, Максимина же арианина безумнаго обличил еси. Сего ради вернии научишася воспевати тебе:
Радуйся, великий богословия столпе;
радуйся, верным поучение.
Радуйся, непреоборимое православия укрепление;
радуйся, честное Пресвятыя Троицы носило и похваление.
Радуйся, Отцу равночестных Сына и Духа проповедавый;
радуйся, Максимина возбесившагося от паствы твоея отгнавый;
Радуйся, отче, отцев славная красото;
радуйся, всех богомудрых премудрая доброто.
Радуйся, благодатная словеса испущаяй;
радуйся, добре паству твою поучаяй.
Радуйся, яко тобою вера утверждается;
радуйся, яко тобою ересь низлагается.
Радуйся, Августине, учителю благодати, по дару Христа подаваемыя.
Кондак 3
Силою, данною ти свыше, слезу всяку отъял еси от лица люте страждущих, блаженне отче Августине: алчущим бо явился кормитель, в пучине моря житейского сущей пастве твоей судия праведный, стяжателем вразумление и всем всяк помощник показался еси, вопиющим Богу: Аллилуиа.
Икос 3
Имеяше воистину, отче Августине, с Небесе песнь тебе поспеваема быти, а не от земли: како бо кто от человек возможет твоих учений величие проповедати? Но мы, любовию твоею побеждаеми, вопием ти сице:
Радуйся, образе агнцев и пастырей;
радуйся, святое училище покаяния.
Радуйся, добродетелей Христовых вместилище;
радуйся, премудрости чистое и честное жилище.
Радуйся, светильниче всем светящий и вся просвещающий;
радуйся, свете богомудрый и непорочный.
Радуйся, достойный Павла собеседниче;
радуйся, добрый вселенныя наставниче.
Радуйся, правило веры православныя;
радуйся, образе кротости духовныя.
Радуйся, яко тобою от тщеславия избавляемся;
радуйся, яко тобою смирения истинного исполняемся.
Радуйся, Августине, учителю благодати, по дару Христа подаваемыя.
Кондак 4
Буря недоумения смущает верныя, како достойно пети труды твоя, блаженне Августине? Никтоже бо может вся глубины я постигнути, аще бы и по вся дни жизни в поучении сем подвизатися восхотел; но мы, дивно благодати в тебе прославляющейся, дерзаем воспети: Аллилуиа.
Икос 4
Слышаша, богомудре Августине, ближнии и дальнии величие поучений твоих, яко по воздуху легкими благодатными словесы твоими навыкл еси в недоумении сущих вразумляти, скоро от тех избавляя всех, вопиющих к тебе таковая;
Радуйся, избавление от печали;
радуйся, дарование благодати;
Радуйся, заблуждений прогонителю;
радуйся, ведения насадителю.
Радуйся, скорый утешителю в уныние впадших;
радуйся, праведный обличителю обидящих.
Радуйся, поучений пучино, Богом излиянная;
радуйся, богословия Церкви скрижали, Богом начертанныя.
Радуйся, крепкое сомневающихся возведение;
радуйся, в вере стоящих утверждение.
Радуйся, яко тобою всякая ересь обнажается;
радуйся, яко тобою всякая истина совершается.
Радуйся, Августине, учителю благодати, по дару Христа подаваемыя.
Кондак 5
Боготечная звезда явился еси, наставляя по морю лжеучений плавающих люте, имже смерть духовная предстояше вскоре иногда, аще не бы ты предстал еси призывающим тя в помощь, Учителю святый Августине; уже бо нестыдно еретиком вещающим и погрузити разум хотящим запретив, отгнал еси их, верныя же научил еси спасающему тобою Богу взывати; Аллилуиа.
Икос 5
Видеша вернии, на посмеяние язычникам Рима ради падения уготованныя, великое твое судеб Божиих разумение, преблаженне отче Августине, егда Марцеллину боголюбивому книги твоя О Граде Божием начертал еси, самаго и вся верныя избавляя от падения мысленнаго. Того ради слышиши от всех сице:
Радуйся, ведения превеликаго сокровище; радуйся, попечения о людех приятелище.
Радуйся, пище и питие тебе вопрошающих; радуйся, наставление неоскудеваемое правды алчущих.
Радуйся, богатство, кротцым, сущим на земли, Богом данное; радуйся, взыскание скорое заблуждающих.
Радуйся, скорое неведущих услышание; радуйся, унывающим благодатное попечение;
Радуйся, православных учителю; радуйся, благонравных утешителю.
Радуйся, нетвердых укрепление; радуйся, вселенныя научение.
Радуйся, Августине, учителю благодати, по дару Христа подаваемыя.
Кондак 6
Проповедует мир весь тебе, преблаженне Августине, великаго вселенныя учителя: яко многажды во едином часе, Бога вопрошающим и от еретиков смущаемым, предваряя писаньми твоими пособствуеши, купно от всякого смущения сохраняя, вопиющих к Богу: Аллилуиа.
Икос 6
Воссиял еси свет разума, просвещение нося христианом, от ереси манихейския смерть духовную прияти имущим, тебе, добрый пастырю Августине, вопрошающим, егда вскоре писаньми твоими лжеучителей посрамил еси, верных же в православии сохранил еси. Сего ради с ними купно, и мы благодарственно вопием ти:
Радуйся, усердно вопрошающим тя отвещаваяй;
радуйся, от смерти духовныя избавляяй.
Радуйся, от прельщения сохраняяй клеветы;
радуйся, еретиков разрушаяй советы.
Радуйся, растерзаяй лжу яко паучину;
радуйся, возношаяй славно истину.
Радуйся, заблудших от уз разрешение;
радуйся, мертвецев духовных оживление.
Радуйся, проявителю правды;
радуйся, помрачителю неправды.
Радуйся, яко тобою заблудшии избавлени от мрака;
радуйся, яко тобою насладишася света.
Радуйся, Августине, учителю благодати, по дару Христа подаваемыя.
Кондак 7
Хотя богохульное еретическое отгнати злосмрадие, сокровище воистину богословия, таинственное явился еси, Августине: люди Иппонийския упасл еси и всю вселенную ученьми твоими исполнил еси. И от нас убо богомерзкое греховное злосмрадие отжени, да благоприятно Богу вопием: Аллилуиа.
Икос 7
Новаго тя Павла, наставника Церкви Христовой разумеем, отче святый Августине, бурю заблуждений разгоняющего богомудрием своим, благодать же Божественную приносящаго вопиющим таковая:
Радуйся, верным тихое пристанище;
радуйся, монашествующим известное хранилище.
Радуйся, плавающих посреде мирских искушений добрый кормчий;
радуйся, треволнения монашеская уставляющий.
Радуйся, смирение влекомых гордынею;
радуйся утешение сущих в унынии
Радуйся, сияние благодарения, скобрный мрак разгоняющее;
радуйся, светило богопознания, вся концы земли просвещающее.
Радуйся, от бездны тщеславия человеки избавляяй;
радуйся, бездне смирения, сатану отгоняяй.
Радуйся, яко примером обращения твоего бездну милосердия Христова призываем;
радуйся, яко образом покаяния твоего мир с Богом обретаем.
Радуйся, Августине, учителю благодати, по дару Христа подаваемыя.
Кондак 8
Дивные чудеса являются притекающим к тебе, блаженне Августине, священные твоя мощи: пред ними бо и малое моление пред ними приносяще, великих бед приемлем избавление, аще токмо по Бозе упование на тя возложим, верно вопиюще: Аллилуиа.
Икос 8
Весь еси всем воистину помощник, богоносе Августине, собираеши бо вкупе вся прибегающия к тебе, во священном Граде Павии, идеже мощи твоя почивают, на похвалу всех подвизая вопити к тебе сице:
Радуйся, всякаго вспомоществования источниче; радуйся, страждущим многоразличный помощниче.
Радуйся, заре наставления, в нощи греховней блуждающим; радуйся, росо неботочная, в последняя времена живущим.
Радуйся, подаваяй требующим утешение; радуйся, уготовляяй просящим изобилие.
Радуйся, многих заблуждших на путь истинный возвратителю; радуйся, Таин Божиих верный возвестителю.
Радуйся, яко тобою гордость попираем; радуйся, яко тобою благодать улучаем.
Радуйся, Августине, учителю благодати, по дару Христа подаваемыя.
Кондак 9
Всякия избави нас страсти душевныя и телесныя, великий наш заступниче Августине, растворяя благодатная поучения, услаждающая души наша, сердца же веселящая всех усердно к благодати твоей прибегающих, Богу же вопиющих: Аллилуиа.
Икос 9
Витии многовещанныя еретиков и расколов многих видим тобою поверженных, богомудре отче Августине: Доната бо, раскольника, разделяюща Церковь Божию, и Пелагия, благодать отрицающа, препрел еси нас же в Православии укрепил еси. Сего ради вопием ти сице:
Радуйся, щите, защищаяй благочестие; радуйся, мечу, посецаяй злочестие.
Радуйся, учителю Божественных велений; радуйся, губителю богопротивных учений.
Радуйся, лествице, Богом утвержденная, еюже восходим к Небеси; радуйся, покрове, Богом зданный, имже покрываются мнози.
Радуйся, немудрых умудривый твоими словесы; радуйся, ленивых подвигнувый твоими нравы.
Радуйся, светлосте толкования Писаний Божественных неугасимая; радуйся, луче благодати познания пресветлая.
Радуйся, яко учением твоим сокрушаются еретическия главы; радуйся, яко тобою побеждаются расколы.
Радуйся, Августине, учителю благодати, по дару Христа подаваемыя.
Кондак 10
Спасти хотя душу, плоть твою духови покорил еси, дух же Богу, воистину, отче Августине; покаянием бо прежде и отречением жизни прежния, деянию богомыслие приложил еси, богомыслием же разум смирен стяжал еси, имже дерзновенно с Богом и Ангелы беседовал еси, всегда вопия: Аллилуиа.
Икос 10
Стена еси, похваляющим, преблаженне, словеса твоя и всем к поучениям твоим прибегающим; темже и нас, в добродетели убогих, от гордыни, напасти, бед, болезней, губительных поветрий, войн свобождай, вопиющих ти с любовию таковая:
Радуйся, от убожества гордыни изымаяй; радуйся, богатство смирения подаваяй.
Радуйся, брашно негиблющее алчущим правды; радуйся, питие неисчерпаемое жаждущим благодати.
Радуйся, от нестроений и бед свобождаяй; радуйся, от пленений и войн соблюдаяй.
Радуйся, преславный в бедах заступниче; радуйся, превеликий в недоумении наставниче.
Радуйся, многих от прелести исхитивый; радуйся, безчисленных от ересей неврежденно сохранивый.
Радуйся, яко наставлениями твоими гордыни монахи избегают; радуйся, яко поучении твоими жизнь вечную вернии получают.
Радуйся, Августине, учителю благодати, по дару Христа подаваемыя.
Кондак 11
Пение Пресвятей Троице паче иных принесл еси, преблаженне Августине, егда видения Ангела бездну морскую исчерпати хотящаго сподобился еси: многим бо испытанием Тайну Божию исчерпати немощным есть немощно, токмо верою, надеждею и любовию Триединому Богу воспевати: Аллилуиа.
Икос 11
Светозарную лучу, во мраце мира языческого неугасимую видим тя, Богом избранне отче Августине: с Павлом бо Апостолом и Ангельскими Светы беседуеши, и верных души просвещаеши, вопиющих ти таковая:
Радуйся, озарение Трисолнечного Света; радуйся, деннице незаходимого Солнца.
Радуйся, свеща, сиянием благодати возженная; радуйся, яко угасил еси бесовский пламень гордыни в сердцы своем.
Радуйся, светлое православия проповедание; радуйся, благодатного света евангельского сияние;
Радуйся, молние ереси пожигающая; радуйся, громе, расколы устрашающий соблазняющия.
Радуйся, истиннаго учителю богословия; радуйся таинниче небесного познания.
Радуйся, яко тобою попрася служение идолом; радуйся, яко тобою научихомся веровати Святей Троице.
Радуйся, Августине, учителю благодати, по дару Христа подаваемыя.
Кондак 12
Благодать, данную ти от Бога, сведующии, радующеся, твою память радостно празднуем с любовию, преславный отче Августине, и к благодатному заступлению твоему едиными усты и единым сердцем притекаем; преславных же твоих писаний, поучений и деяний, яко песка морскаго и множества звезднаго исчести не могуще, недоумением объяти бывше, вопием к Богу: Аллилуиа.
Икос 12
Поюще дивная твоя словеса, восхваляем тя, всехвальне Августине: к тебе бо Бог, в Троице прославляемый, усты Павловы в вертограде дивно провещал есть. Но аще и со тщанием составленныя от души песни и пения приносим ти, Учителю Церкви Божия, ничтоже творим равно чудесем благодати, в житии твоем явленным, имже удивляющеся, вопием к тебе таковая:
Радуйся, Царя царствующих и Господа господствующих служителю; радуйся, служителей Его небесных сожителю.
Радуйся, Иеронима Стридонского в разумении Писаний единомысленниче; радуйся, Амвросия Медиоланского учениче.
Радуйся, Иоанна Златоуста в попечении о пастве своей соревнительниче; радуйся, Кирилла Александрийского усердный соратниче.
Радуйся, о Граде Божием написавый; радуйся, тайну благодати по дару Христа нашего познавый.
Радуйся, поучения верным оставивый; радуйся, наставления в подвизех монахом предложивый.
Радуйся, исповедание грехов твоих прежних Церкви Христовой воспевый; радуйся, вторый Павел, паче всех отцев писаньми твоими потрудивыйся.
Радуйся, Августине, учителю благодати, по дару Христа подаваемыя.
Кондак 13
О премудрый и пречудный отче Августине, утешение всех христиан православных, нынешнее наше приими приношение, и умоли Господа даровати нам укрепление веры, умножение благодати и постоянство в подвизе богоприятным твоим ходатайством, да с тобою воспеваем: Аллилуиа.
Сей кондак глаголи трижды.
И паки чтется 1-й икос:
Икос 1
Ангела образом, земнаго суща естеством, яви тебе всея твари Создатель, егда крещение от святаго Амвросия в Медиолане прияти тя сподобил есть, Августине блаженне, научи всех пети тебе сице:
Радуйся, по молитвам матери твоея Моники ко Христу пришедый; радуйся благодатию от купели крещения просвещенный.
Радуйся, от святителя Амвросия Евангелию наученный; радуйся, силу духовную абие по святом просвещении явивый.
Радуйся, саде премудрости Божественныя; радуйся, цвете священного учения.
Радуйся, лозо добродетельная Церкви Христовой; радуйся, древо богомудрое Рая мысленного.
Радуйся, крине Райского благоухания; радуйся, миро Христова познания.
Радуйся, яко тобою отгонится заблуждение; радуйся, яко тобою приносится научение.
Радуйся, Августине, учителю благодати, по дару Христа подаваемыя.
Кондак 1
Возбранный святителю и изрядный учителю Церкви Божия, миру всему источаяй твоих учений дарование и многочисленное писаний познание, восхваляем тя любовию, святителю Августине; ты же, яко имеяй дерзновение ко Господу, от всяких нас бед свободи, да зовем ти:
Радуйся, Августине, учителю благодати, по дару Христа подаваемыя.
Молитва
О всеблаженный и всехвальный святителю и угодниче Божий, отче Августине! Предстояй на небеси Престолу Пресвятыя Троицы с лики Ангел и со всеми святыми, призри милостивно на нас, молящихся Тебе и Твоея помощи просящих. Моли о нас Христа Бога нашего, да ниспослет нам, усердно к Тебе прибегающим, богатыя милости Своя. Озари нас светом дарованныя Тебе благодати и молитвами Твоими помози во святей вере православней твердо стояти, дух ведения, мира и любве не угашати. Молитвами праведныя матере твоея Моники искреннее покаяние стяжавый, помози и нам покаяние от сердца Богу выну приносити, да, очистившись от мирских искушений, плотских похотей и духов тьмы злаго действия, духом и истиною покланяемся Святей, Единосущней, Животворящей и Нераздельней Троице, единым сердцем и едиными усты славяще Отца и Сына и Святого Духа во веки веков. Аминь.
Канон блаженному Августину Иппонийскому
Глас 6
Песнь 1
Ирмос: Яко по суху пешешествовав Израиль, по бездне стопами, гонителя фараона видя потопляема, Богу победную песнь поим вопияше.
Припев: Святый блаженне Августине, моли Бога о нас.
Приидите, вернии, препрославленную память святителя великаго и вселенныя учителя Августина блаженнейшаго согласно празднуим, еретиков посрамителя и покаяния проповедника.
Слава Отцу, и Сыну, и Святому Духу.
Избран Господем быв служение святительское восприяти, в правоверии и любви божественней учении твоими премудрыми паству Христову упасл еси, святителю.
И ныне и присно, и во веки веков. Аминь.
Премудрость Божественную свыше прияв, учение животворное источил еси, души, страстьми попаленныя, исцеляющее, святителю славне Августине.
Богородичен: Яко Вселенныя сокровище великое чтем Тя, Дево Пренепорочная, Ты бо миру от Троицы Единаго родила еси, Ему же молися, да спасет ны.
Песнь 3
Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Припев: Святый блаженне Августине, моли Бога о нас.
Воспоим, вернии, днесь пастыря и святителя и вселенныя учителя, правило веры и образ, и Божественнаго Пастыреначальника подражателя.
Слава Отцу, и Сыну, и Святому Духу.
Божиим изволением произбран быв, святитель великий Церкве Христовы явился еси, бескровную Тайную Жертву Агнцу Божию принося, мира грехи на Ся вземлющему.
И ныне и присно, и во веки веков. Аминь.
Сеяние молитвы слезныя матере твоея святыя явился еси и плод сторичный Творцу Господу верою принесл еси, Августине славне.
Богородичен: Дверь Небесная нам еси, Богородице, / еюже Царь славы к нам вниде, Его же моли спастися нам.
Седален, глас 7
Еретическая злокозненная шатания посрамил еси, Христову же Церковь верно управил еси, темже, в селениих горних водворяяся, блаженне, святе Августине, молися о душах наших.
Слава Отцу, и Сыну, и Святому Духу, и ныне и присно, и во веки веков. Аминь.
Богородичен: Клятвы древния разорение и обетований Божиих всеспасительных исполнение, Богородице, явилася еси. Темже молися Рождшемуся от Тебе, да избавит ны от силы вражия.
Песнь 4
Ирмос: Христос моя сила, Бог и Господь, честная Церковь боголепно поет взывающи, от смысла чиста о Господе празднующи.
Припев: Святый блаженне Августине, моли Бога о нас.
Непреоборимь явился еси, святителю Августине, по Бозе Вседержителе воинствуя и во всем веления Того исполняя.
Слава Отцу, и Сыну, и Святому Духу.
Ограда твердая церковная явился еси, святе, словесы и делы исправляя правая, Августине, великий учителю.
И ныне и присно, и во веки веков. Аминь.
Меч воистину божественный на ереси явился еси и гром, нечестивыя устрашаяй, души же верных словом истины укрепляеши, Августине.
Богородичен: О Благословенная, Чистая, молимтися: молися к Рождшемуся от Тебе, да избавит души наша от искушений и обстояний.
Песнь 5
Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.
Припев: Святый блаженне Августине, моли Бога о нас.
Свещу пресветлу яви тя миру Христос, блаженне, светом неизреченным осияв и святительства правило всем показав.
Слава Отцу, и Сыну, и Святому Духу.
Божественне дело Божие совершая и чистым умом прикасаяся чистейшим, непорочен обрелся еси, Богу службу творя; темже и нас словом твоим освяти и научи благая творити.
И ныне и присно, и во веки веков. Аминь.
Прикровенное Закона Ветхаго пастве твоей уяснил еси, от Божественных сокровищ Духа сказуя, небоявленне Августине.
Богородичен: Тебе, Содетеля плотию рождшей и клятвы древния Разрешительнице, восклицающе молимся: спаси осуждения верою Тя блажащия.
Песнь 6
Ирмос: Житейское море воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Припев: Святый блаженне Августине, моли Бога о нас.
Души, гладом тающия, напитал еси и жаждущия веселия божественнаго исполнил еси, проповедуя и вещая, всехвальне Августине.
Слава Отцу, и Сыну, и Святому Духу.
Медоточныя капли добродетели всякия любомудренно собрал еси и от них вселенную усладил еси, отче блаженнейший.
И ныне и присно, и во веки веков. Аминь.
Благодатию Божественною осиян быв, худшая на лучшая пременил еси и сокровище некрадомое обрел еси, святителю всехвальне.
Богородичен: Слово Божественное во чреве вмещшая и миру всему Спасение рождшая, не премолчи за ны моляся ко Господу.
Кондак, глас 4
Церкве Вселенския столпе непоколебимый, на недвижимем камени веры утвержденный, веры православныя учителю неленостный и покаяния проповедниче велегласный, истины возвестителю, прехвальне Августине, святителю Христов, просвети ны учением твоим.
Икос
Премудрости уста, целомудрия чаша, Православия учитель Августин блаженнейший всем сияет мысленне. Приидите, уподобимся того смирению, вере же и любви, имиже дом Божества показася, и в радости тако возопиим: радуйся, прехвальне Августине, святителю Христов, просвети ны учением твоим.
Песнь 7
Ирмос: Росодательну убо пещь содела ангел преподобным отроком, халдеи же опаляющее веление Божие, мучителя увеща вопити: благословен еси Боже отец наших.
Припев: Святый блаженне Августине, моли Бога о нас.
Премудрости светлостьми осиян, темиже паству твою облистал еси и пети Творцу всех подвигл еси: благословен еси, Боже отец наших.
Слава Отцу, и Сыну, и Святому Духу.
Ум во глубины непостижныя вперив и бисер разума многоценный стяжав, мир премудростию исполнил еси, взывая: благословен еси, Боже отец наших.
И ныне и присно, и во веки веков. Аминь.
Гордаго силу пресекл еси, блаже, смирением твоим, к Богу разумом чистым возносимый, Ему же пети научил еси: благословен еси, Боже отец наших.
Богородичен: Купину Тя огнегорящую Господь Моисею в Синаи древле прообразова, Ты бо огнь Божества невещественнаго прияла еси, мира спасения начало устроивши. Молися ко Святей Троице спасение нам даровати, мир и велию милость.
Песнь 8
Ирмос: Из пламене преподобным росу источил еси, и праведнаго жертву водою попалил еси: вся бо твориши, Христе, токмо еже хотети, Тя превозносим во вся веки.
Припев: Святый блаженне Августине, моли Бога о нас.
Богоприятен святитель показался еси, отче Августине, Духом Божественным паству твою просвещаяй, да взывают вси: благословите вся дела Господня Господа.
Слава Отцу, и Сыну, и Святому Духу.
Сердца, недугом ереси пагубныя уязвленная, благодатными словес твоих лечбами уврачевал еси, сего ради тая благодарне воспеша: благословите вся дела Господня Господа.
И ныне и присно, и во веки веков. Аминь.
Праведниче, якоже финикс в дому Господни, отче, процвел еси и правды плоды принесл еси, имиже тя чтущии питаются, восклицающе: благословите вся дела Господня Господа.
Богородичен: Глаголом благодатных устен Твоих последующе, ублажаем Тя, Присноблаженную и взываем: благословите вся дела Господня Господа.
Песнь 9
Ирмос: Бога человеком невозможно видети, на Негоже не смеют чини ангельстии взирати; Тобою же, Всечистая явися человеком Слово воплощенно, Егоже величающе, с небесными вои Тя ублажаем.
Припев: Святый блаженне Августине, моли Бога о нас.
Слава твоя, святе, во веки пребывает и память со всеми праведными, с ними же и нам вселитися моли, Августине, великий молитвенниче.
Слава Отцу, и Сыну, и Святому Духу.
Зарю Утешителеву, блаженне, приял еси, тою ны облистая и словом Божественным питая; воистину бо источника непрестанна благодать миру тя показа, Августине, во веки.
И ныне и присно, и во веки веков. Аминь.
Яко солнце светозарное миру память твоя возсия, отче Августине, в пристанище немятежное небесное световодящи верою тя восхваляющия.
Богородичен: Отроковице Пречудная, прежде век Сущаго приявшая, за крайнее благосердие Свое нам уподобившееся, и миру Спасение рождшая, спаси ны, верою Тя блажащия.
Светилен
Истины ведения ревнителю, святе Августине, ереси всегорькия мечем уст твоих посекл еси и, ныне на Небесех Престолу Троицы Святыя предстоя, прилежно о нас молися, верою и любовию память твою совершающих.