Стихи/вірші «Венец от дванадесят звезд…» Димитрий Ростовский (Туптало)

ПЕРЕЙТИ на главную страницу творений

ПЕРЕЙТИ на главную страницу сборника стихов свт. Дмитрия

1. Стихи предословныя к Господу нашему Ісусу Христу

— Ісусе, мой сладчайшій и преблагій Боже,
кто благодарити Тя достойно возможе,
— Яко изволил еси страсть и смерть подяти
и кров Свою нещадно о нас изліяти?
— Обаче должны есмы воздавати славу
Тебе, давшему за нас душу си избаву.

Начинает же сице:
Страсть Ісуса моего з жалем размышляю
и из глубины сердца сице возываю…

2. «Венец от дванадесят звезд…»

2.1. Венец главе церковной Ісусу Христу от звезд дванадесят, от молитв чрез праздники Его дванадесят

1. Спасенія нашего ради въплощенный,
Ісусе, дажд, да буду во плоти спасенный.
2. Обрезаніє плоти пріємый пречистой,
дажд, да страсть ся обрежет плоти ми нечистой.
3. Стретенный и пріятный старцем, ждущим смерти,
дажд и мне, непріємшу Тебе, не умерти.
4. Крестивыйся во Ієрдани, явлей в Бозе Тройцу,
дажд, крещисуся мне, да чист явлю Ти ся творцу.
5. Преображенія свет явлей на Фаворе,
дажд ми зрети Тя в свете на небеси горе.
6. В Іерусалим на царство вшедый на осляти,
смири ж плоть мою, внійди в душу царствовати.
7. Страдавый за грешных, мертв быв и погребенный,
дажд, да буду ко страстем греха умерщвленный.
8. С победою въскресый от мертвых тридневно
дажд ми побиждати смерть греха повседневно.
9. Со славою на небо вознесыйся в теле,
дажд таможде возыйти мне о Твоей силе.
10. Низпославый от Отца, Духа, в тройчном свети,
утешеніе дажд ми духовно имети.
11. Образ Твой оставлей нам нерукотворенный,
дажд, да лицем к лицу зрак узрю божественный.
12. Воздвиженіем крестным и днесь и в суд страшный
воздвигни мя от всех бед, да не паду страстный.

— Сим венцем венец всего лета,
от благости самаго создателя света.
— За сей венец в временной жизни молитвенный
Цар Неба венец в Небе даст вечно царственный.

2.2. Венец Богородици от звезд дванадесят, от молитв чрез праздники Ея дванадесят

1. Зачатая без греха, о Божія Мати,
Молю, дажд ми безгрешно житіе зачати.
2. Рожденная от ветхой утроби неплодной,
дажд души ми неплодной быти доброплодной.
3. Воведенная во церков, в трех летех, в дар Тройци,
дажд ми входом во церков вход в храм вышній Творци.
4. Заченшая Спаса в день благовещанія,
благовести зачатый мне день спасенія.
5. Рождшая Бога-Сына при девстве печати,
дажд, да буду печатлен в Сына благодати,
6. Очищенія закон творша в стретеніи,
очисти мя, стретенна в беззаконіи.
7. Стоявшая при кресте душею язвленна,
дажд ми о кресте мысль от сердца сокрушенна.
8. В успеніи безсмертном воставшая к Сыну,
дажд ми от сна греховна воставати выну.
9. Положеніе ризы чтущу ми Твоея,
облеци душу нагу в благодать ея.
10. Положеніе чтущу пояса Твоего,
препояши ми немощ силою от него.
11. Покрывающа верных честным омофором,
прійми мя под твой покров зде и к вышним двором.
12. Похвалная с победы даной над каганом,
дажд победу над бесом и над бесурманом.

— Сим венцем благословен венец всего лета,
от благости Матере Несозданна Света.
— За сей венец в временной жизни молитвенный,
Царици Неба помощ даст вечно царственный.

2.3. Венец от дванадесят звезд аггелскім силам, от молитв к ним о помощ нам к добрым делом

1. Архистратиже Божій святый МИХАИЛЕ,
кто, яко Бог, о сем ми дажд внимати целе.
2. ГАВРІИЛЕ, дажд радость, по Бозе кто, яко
Богородица, крепко внимати ми тако.
3. РАФАИЛЕ, настави на стезю спасенну,
слепоте дажд душевной целбу божественну.
4. СЕРАФИМИ, огнем мя любве раждезете,
да всем сердцем возлюблю Бога, помозете.
5. ХАРУВИМИ, светом мя разума о Бозе
просветите, да узрю свет в горнем чертозе.
6. ПРЕСТОЛИ, исправте мя правду исполняти,
да в суд страшный возмогу одесную стати.
7. ГОСПОДСТВІЯ, плоть мою духу покарайте,
да, раб, волю Господню творю, понуждайте.
8. СИЛЫ, Вышняго силу явете в мне чудну,
оживете умершу душу мою блудну.
9. ВЛАСТИ, сподобете мы над бесом победы,
да мною не владеють властей темных беды.
10. НАЧАЛА, да над страстьми ум мой началствует,
наставте тако, да грех во мне не царствует.
11. АРХАНГЕЛЫ, мне тайны спасенны вещайте,
глас архаггелскій, на суд зовущ, в мысль влагайте.
12. АГГЕЛИ, храняще на земли живущих,
молю, сохранете мя от всех бед грядущих.

— Сей венец кто приносить аггелом ко славе,
приймет неувядающ венец своей главе.
— Будет з аггелами зрети лице Бога выну,
кто в молитвах не презрит когождо их чину.

2.4. Венец от дванадесят звезд святой Варваре, от молитв к ней о крайнем доброи смерти даре

1. Варваром родителем рожденная дево,
терна злаго цвет благій, себе явлша живо,
Варваро, черна в титле, красна в вере, в деле,
дел злых варвар храни мя на душе и теле.

2. В высокой вере ради красоты телесной
храненная, ближайша красоте небесной,
Дажд ми горе имети сердце сохраненно,
небеси достойными делы украшенно.

3. Три окна повелевша в бане сотворити,
свет троичный вожделевша сердцем чистым зрети,
Мне память, ум и волю, душевны три силы
твори, троицы угодны, мысльми, словы, делы.

4. О твердейша над камень отца, тя гонивша,
в отверзшемся камене, дево, себе скрывша,
Мене в твердом покрове твоея молитвы
сокрый от гонящія вражія ловитвы.

5. Отец-варвар тя в нечесть влекл за власы главы,
а Бог-Отец союзом любве — к венцу славы.
Подножіе Господне землю отираху —
твои власи да отруть мя от грехов праху.

6. Яко елей, носяща кров многих ран в теле
и жженіе огненно в нем, яко в светиле,
Вніиде, мудрая дево, к Господню чертогу,
въведи тамо и мене мольбами ко Богу.

7. В темници светом міра Христом посещенна,
врачем души и тела от ран исцеленна,
Дажд ми в темном сем свете Господа предзрети,
ран греховных и смертной тми в души избыти.

8. За Христа ссавша девы сосца преблаженна,
девически ти сосца люте отсеченна,
Но благодать и славу вишній Сіон мати
даде ти; дажд ми тех вкушати.

9. Обнаженна безстудно водима по граде,
покров светлый аггелскій имевша в отраде,
И моей души нагой, Христова невесто,
одеяніе брачно дажд имети чисто.

10. Предасть же отец на смерть чадо: сіе яве
отец-варвар на твоей мечем списа главе;
Но Небесный Отец ти дал жизнь безконечну,
юже и мне умоли чрез твою смерть мечну.

11. Отец плотскій дерзал ти плоть и кров отяти,
а Христос ти плоть и кров дал свою даяти;
Да без тех невозможет всяк чтый тя умерти,
молю и аз тя о сей дар при моей смерти.

12. Блажен град Кіев, хранящ святое ти тело,
еже больни[ы]х врачует и хранит в нем цело.
Хранима телом в храме вожда сил небесных,
с ним мя всех бед душевных храни и телесных.

— Сице кто богомудру Варвару венчает,
победы на безбожных варваров да чает,
— На болезнь — целбы, на смерть — готовости дара
сподобить венчанная сим венцем ВАРВАРА.

2.5. Венец от дванадесят звезд архіерейскій (свт. Николай), от дел, чрез них же молим ест пастыр миррейскій

1. От рожденія чудный, в купели стоявый,
от сосец в среду и в пяток себе воздержавый,
Николае, подажд ми от грехов востати,
в воздержаніи постном тя наследовати.

2. Трех дев златом, втай данным, от скверн сохранивый,
милостію пред Троичным Божеством служивый,
Удиви во мне милость, скверны очищая,
любов ко Богу, и ближнему, и к врагом влагая.

3. Путешествіе ко гробу Христову творивый,
морю кротость, жизнь мертвецу тогда возвративый,
Скажи ми путь, да с Христом терпя спогребуся,
укроти страсть, дажд, да жив Богови явлюся.

4. До церкви к молбам утрним первый шед, избранный
на сан пастирский судом Вышняго венчанный,
Помози к молбам тем же мне утреневати,
да ускору в чертозе вышнем ся венчати.

5. За исповеданіе догмат христіянских
страдавый во узилищах от царей поганских,
Дажд, да буду союзом Христовым плененный,
а от уз царствующа греха раздрешенный.

6. Сокрушивший идолов поганских божници,
при царе Константине изшеді[ы]й с темницы,
Помози ми крушити гриховныя нравы,
да будет в мне храм токмо Христу, Царю славы.

7. Арія злочестива ересь победивый,
в Никеи Христа-Бога честь правословивый,
Помози ми бисовску прелесть побеждати,
правоверными делы Бога прославляти.

8. Неправедно сказанни[ы]х на смерть свободивый,
цареви Константину во сне ся явивый,
Мене, праведным судом достойна умерти,
явлся сердцу, в зле спящу, избави от смерти.

9. Явлся во сне купцеви, в залог злато давый,
призвав з житом здалече, в гладе град питавый,
Напитай и мне душу, не житопродавца,
но уснувша на кресте брашном Животдавца.

10. Во успеніи ти смертном аггелов видевый,
с ними же в жизнь безсмертну духом возлетевый,
Дажд ми, во гресех спящу, в чувстве жизнь кончити,
радующся и о мне зрак аггелскій зрети.

11. По успеніи твоем миро источаяй,
от мощей ти и гроба многих исцеляяй,
Многи раны мне, грешну, исцели, молюся,
твоим миром милости исцелен спасуся.

12. От востока на запад чтем тя пренесенна,
да зрить запад в восточной вери тя спасенна,
Моли той святой вере сохраненной быти,
в ней до запада смертна мне спасенно жити.

— Сице кто Мирликійска пастира венчает,
в благословеніи мир ликуя взымает,
Венчаніе милости от него испросит,
в нуждах тела и души отраду относит.

— В року тысяча шестсот осмдесятом,
декамврія по дню пятнадесятом,
Пред четвертком, днем НИКОЛЫ святаго,
в нощ знаменія звезднаго страшнаго
В монастыре то Николском списася,
типом в Печерском Кіевском издася.

2.6. Венец звезд дванадесят Христовой денницы, Предтечи святому, з молб дванадцяти

1. Зачатый от неплодных в концу ветхой сени,
в начале благодати, благостине,
Іоанне, дажд за мя глас к Богу-Слову,
да начну днесь измену дел злых в благость нову.

2. Взыгравыйся в матернем чреве освященный,
от Матере Божія в твоей посещенный,
Мне в печалех греховных от матерня чрева
умоли, да отраду дасть вторая Евва.

3. Рождеством ти радости многих исполнивый,
родителска языка узы раздрешивый,
Гласе слова, рожденна от Отца пред веки,
пригласи мя на радость с небесными лики.

4. Удаливыйся з детска на труд[ы] в пустыню,
растый телом и духом во всяку святыню,
Не удали растущой помощи твоея,
отпусты я в плод благих дел души моея.

5. Ризу остру от власов велбуждых имевый,
пояс тверд от ременя на чреслех носивый,
Тако зраком велбуда в узкость врат входити,
в жизни горней грядущу дажд ми плоть смирити.

6. Снедь акриды, верх зелій и мед дивый лесный
имевый, проходя путь к жизни вечной тесный,
Тако ни ядшій сластно, ни пивый сикери,
и мне постну готовость дажд к агнчей вечери.

7. Покаянія делом и словом учивый,
Христу готовляя путь многих крестивый,
В покаяніи и мне дажд слезы излити
и к души моей Христу путь уготовити.

8. В Іердане Ісуса безгрешна крестивый,
руку, к ногам не смевшу, на главу сложивый,
Сію простри в помощ мне, в грехах погруженну,
и омый ми от всех зол душу осквернену.

9. Отверзшимся небесем глас Отца слышавый,
Сына в теле, в голуба зраце Дух познавый,
Дажд, да и мне не будет Небо затворенно,
да будет ми и троично зреніе явленно.

10. Се агнец Божій, вземляй грехи всего мера,
сим крещшимся данная, яко спасет вера,
Крестителю, сіе всем показавый яве,
дажд ми от грех изяту быти в агнчей славе.

11. УСЕКНОВЕНІЕМ ти всечестныя главы,
отсеченны да будуть нечестій ми нравы,
З Христом, Церкви главою, живый непресечне,
дажд с темжде и з тобою и мне жити вечне.

12. Обретеніем главы твоея трикратным,
пред Троическим Лицем мя сотвори приятным,
Треблаженна ти глава, от Тройци венчана,
да будет же часть твоих блаженств и мне дана.

— Сим венцем кто венчает Іоанна главу,
в венцу жизни той пріймет благодать и славу.
— Седм даров и пять талант за звезды таковы
тому в руце Господней, с ним сущей, готовы.

2.7. Венец от дванадесят звезд страстем Христовым, от молб к страдавшому в венцу терновым

1. ІСУСЕ, за тридесят сребрников проданный,
им же ест искуплен мір, от Тройци созданный;
В честь Тройци заповеди дажд десят хранити,
умом, словом и делом: з грех ся искупити.

2. ІСУСЕ, в вертограде пот крове изливый,
прискорбен быв до смерти, трижди ся моливый,
Дажд ми слезы в молитве к Тройци изливати,
в скорбех противу греха и до крове стати.

3. ІСУСЕ, страждый в узах на руках и раму,
от уз адскіх подая свободу Адаму,
Дажд, да буду от плениц греховных свободен,
а не к тому раб греху, но Тебе угоден.

4. ІСУСЕ, на судищи біенный з ланиту,
за безстудіе моих уст студом покрыту,
Дажд ми на праведном Ти суде непостидно
зрети неотвращенно лице световидно.

5. ІСУСЕ, из риз Твоих на страсть совлеченный,
им же от страданія грешник покровенный;
Дажд ми, обнаженному, з незлобны одежды,
ризи спасенны веры, любве и надежды.

6. ІСУСЕ, язв премного при столпе терпевый
и тем же столпом немощ нашу укрепивый,
Столп той крепости щитом тисящ ми имущій
дажд, да будет з бед мірских в Небо мя ведущій.

7. ІСУСЕ, тернов венець носивый ужасный,
в нем кровію багрен быв, аки рож цвет красный,
Молю Тя, да греховный терн мне не унзает
и семени слов Твоих в мне не подавляет.

8. ІСУСЕ, осужденный бывый на смерть крестну,
тогда сущу безчестну, ныне зело честну,
Дажд ми, грешнику, лютой смерти жало стерти,
не пасти в безчестнейшій суд вечныя смерти.

9. ІСУСЕ, крест носивый на гору Голгофу,
бремя тяжко Господу силам Саваофу,
Дажд ми легкое бремя в[с]лед Тебе носити,
в силе креста Твоего к небу восходити.

10. ІСУСЕ, за наш дерзк грех кресту пригвожденный,
на горку смерть желчію со отцом нужденный,
Призвозди ми плоть страхом, не дажд в грех простерти,
да не вкушу горкія з горем адским смерти.

11. ІСУСЕ, душу твою за нас положивый,
разлученіем ея нас совокупивый,
Дажд и моей душе, от тела разлученной,
Тебе, Богови, быти присовокупленной.

12. ІСУСЕ, пят язв болших — в ребрах, в руку, в ногу —
пріемый, за пять чувств, в нас согрешших Ти Богу,
Тех язв пятми таланта пять приобретенны,
моя чувства да будуть вечно Ти врученны.

— Сице кто страсть венчает Христа, Церкве главы,
за терніе пріемша честный венец славы,
— Пріймет не терн греховный, на земле клятвенный,
но в небе венец вечных лет благословенный.

2.8. Венец [Христу], исплетенный от звезд дванадесяти, во Его вертоградном моленіи просіявших

1. Зри, человече, како Бог возлюби тебе,
Егда твоея ради любве даде себе
На смерть. Ныне ко Отцу сія отвещает,
Яко на раны готов, аще несть зла знает;
Не устрашися своей жизни оставити,
Дабы тя могл от смерти вечной избавити.

2. Преклонивше колене Ісус ко молитве,
Бодрствует, человече, о твоей ловитве,
Дабы тя могл от сети вражей исхитити,
В ней же тя враг душевный хоте поглотити.
Ты же твое серце к Нему и колене
Приклони, да будешы в руце Его ныне.

3. Во вертограде Христос егда приклонися
Ко молитве, се аггел с небесе явися,
Приносяще к Нему в руце своей чашу,
Дабы творил ко Отцу жертву за жизнь нашу,

4. Вся словом сотворивый ныне упадает
Во вертограде Христос, с небеси желает
Помощи. Како тяжко греховное бремя,
Еже на Христа вложи Адамово племя!

5. Напаяется земля усохшая ныне
Кровию, аки дождом: егда наедине
Молитствует Христос, паде пот крвавый от тела
На землю, дабы вместо терній крыне мела.

6. Огнь греха в человека враг во вертограде
Райском воверже, иже плода вкуси в саде,
Сей огнь Бог и человек егда угашает,
Во вертограде потом тело изливает.

7. Во вертограде Христос потом излияся:
Пот от крове Авеля на Нем показася;
Но егда пот во каплех крове истекает,
Человека от скверны Христос измывает.

8. Чашу приносит аггел Христу в вертограде,
Егда о своих овец Он бодрствует стаде.
Твоя, человече, милость Христа распалила,
Но Отчая чашею любов укрепила.

9. Тако истинная любов творит: человека
Хотяще в любви мети, устави от века
Зань умрети. Вся дает, вся и оставляет,
Егда тебе погибша к себе обретает.
Остави, человече, вся суетства ныне,
Да обрящет тя Бог твой во страждущем Сыне.

10. Благословится земля, проклятая ныне,
Егда Бог преклонился ко ней на колене;
Но и человек, земля, благословеніе
Пріят, за его-бо Бог страждет спасеніе.

11. Паде человек, паде и Бог на колене,
Дабы тя, упадшаго в беззаконной сене,
Воздвигл к Себе на лоно. Ты же, грехов бремя
Отвержше, внемли себе спасен[н]ое время.

12. Хотяще смоковницу паки украсити
Иссохшую цветами, зде потом кропити
Землю начат; но дабы сія окропила
Роса всех сердца, милость Христа усушила.

2.9. Венец [Христу страждущаму] от звезд дванадесяти, во страданіи просіявших

1.Делают, но зло дело на хребте Ісуса
Грешници, егда Его паче над Іруса
Обнаженна у столпа секут розги тело,
Страждет сія, человече, любяще тя зело.

2. Достойна біенію Ісуса предаша
Сего ради, понейже вины не познаша,
В нем жадноя; но страждет, дабы всех нас вины
Греховныя избавил, яко Своя сыны.

3. Вянет лоза: се лозу к столпу привязаша,
Егда во вертограде делаты начаша
Рабы злыи; добрыи рабы винограда
К сердцу привяжут божественна сада.

4. Язвы пріят у столпа Ісус привязанный,
Язвам нашим во врача со небесе данный.
К сему врачу прибегни, кождо уязвленный
Грехами человече! Будеш улеченный.

5. Одеваяй вся светом, ризы крином селным
Даяй, се ныне сам ест цело обнаженный:
Христос тя, человече, светом оздобити
Хощет, точію грехи изволь оставити.

6. Привязанный у столпа Христос пріят раны,
Кров тако излияти возлюбивый за ны.
Нест болезн, яко болезн, юже Ты терпиши,
Христе мой! Человеку врачевство твориши.

7. Делателіе злыи к столпу привязаша
Ісуса, вместо земли тело ископаша,
Кров Христова неплодну егда окропила
Землю, во плодоносну паки претворила.

8. Сотворивый вся словом ныне меет руце
Присвязанны ко столпу. Давый себе муце
Христос тя от работы хощет свободити
Вечноя, человече: дает ся крепити.

9. Беззаконныи к столпу Христа привязаша,
Не внимающе тых благ, от него же взяша:
Се бо им от работы даде столп огненный
Во вожда ныне от них у столпа биенный.

10. Иногда во огненном столпе глаголати
Изволил ко евреом Христос; зде вязати
Даде себе ко столпу, нечто отвещавый,
Недостоин-бо словес Господних род жвавый.

11. Сладкую от камене источивый воду
Иногда іюде[о]м, ныне сего ж роду
Племя к столпу каменну Христа привязати
Дерзнуло, хотяще зло за благо воздати.

12. Егда камен о камен кто ли ударяет,
Скоро огнь во молніях от них воскрешает;
Но у каменна столпа мысленный той камень,
Ісус, біен, от Него любве горит пламень.

2.10. Венец от звезд дванадесяти, во страданіи (Христа) от венца терноваго восіявших

1. Се агнец Божий, грехи вземляй всего мира,
Увязе во терніи, яже ради пира
Райска земля израсти. Внимай, яко вина
Грех Твой ест, человече, и агнцу кончина.

2. Іже златыми венцы всех царей венчает,
Ныне терновый венец на Себе пріймает:
Тако Творец любимый созданію даде
Вся, Сам, обнищавше, во терніи седе.

3. Небесное в терніе семя упадает —
Христос, но в достойные плоды прозябает:
Егда бо от семене сего процветают
Цветы, тогда тернія грехов увядают.

4. Процветает в терніи крин небесна сада,
Рукою делателя райска винограда
Насажденный, егоже терніе покрыло
Сіе, еже от сердца грешных возраст мело.

5. Достоин ест делател мзды всегда, Своея,
Обаче мзду воспріят злу от іюдея
Христос, сей-бо делател в его винограде
Ныне в терновой зрится венчанный ограде.

6. Подножію ног Твоих — земля, но израсти,
Христе, терніе Тебе, им же главу бодсти
Дерзнули іюдее. Ах! Поруганіе,
Егда Творца терніем вечна созданіе!

7. Сей ест цар. Изыйдете, Іерусалима
Дщери, зрети, его же видесте очима
Входяща в Ерусалим. О жалю причина
Тяжкого, егда зрится такова отмена!
Прежде царя нынеже разбойника знают!
Судіи погибшии всех жизн убивают.

8. Исполненны тернія грехов Тя венчают
Терніем, Христе! Болезн в сердцу умножают
Твоем. Ты же, Христе мой, вся сія терпиши,
Да человека болезни вечноя лишиши.

9. Грозд винный Ісус егда дозре в вертограде,
Зрете, в коей ныне ест от еврей отраде!
Сіи от Него вино егда истачают,
Терніем весма Его острым избождают.

10. От неплодныя земли егда пожинает
Терніе Христос грехов, кончину вещает
Жатвы, понейже венец терновый на главу
Пріят, емуже даде злый род во неславу.

11. Чесо беззаконныи терніем венчают
Ісуса, егда на смерть люту осуждают;
Но паче недостойных хотяй попалити
Огнь — Ісус, и се начат в терніи горети.

12. Се з небесного гумна клас зело обфитий
Израсте в неоранной земле плодовитый,
Егоже плод хотяще враги умалити,
Терніем его острым начаша давити.

2.11. Венец от дванадесяти звезд, от (Христова) бремене крестнаго просиявших

1. Аки вторый Ісаак, истинный грядеши,
Христе, крест Твой воспріем, да ня нем пожреши
Себе жертву во воню благоуханія
Отцу твоему грешна ради созданія.

2. Ісусе уязвленный, градеши, мой, камо,
Крест воспрі[и]мше зело тяжчайшый на рамо?
На Голгофу ли, да Тя сіи распинают,
Иже Тебе Голгофу, сердце свое, знают?

3. Рекл еси, дабы, вземше крест, последовали
Тебе, Христе, и мира вси ся отрицали.
Ты же кому со крестом последуеш ныне?
Аз Тя, Христе, принудих в моей грешной вине.

4. Пріемше крест, восходит Ісус на Голгофу,
Аки Авел, принести хотяй Саваофу
Жертву: Ему же в сердцу огнь любве палает,
Имъже на кресте в жертву Отцу согаряет.

5. Благо всем даяй, іго Сам воспріят, бремя
На раму Свою тяжко, страсти Твоей время
Егда прийде, Христе мой! Вся словом носиши;
Наша грехи пріемше, ах! зело стениши.

6. Ах! Греховное бремя како отяготе
на раме твоем, Христе, егда ти восхоте
нас….
(Далее в рукописи нет листа).

Тем изшедше на мало, жалуйте за сію
Дерзость вашу. Се и аз молитву пролею
Ко Господу за вами, дабы призре на ны
И желаемое дал врачевство на раны.

2.12. Венец от звезд дванадесяти, от [распятаго Христа] на древе крестном всему миру просіявших

1. Истинное Ісус наш ста солнце во чине
На кресте, да просветит в подземной глубине
Всех бывших, иже его усердно желают,
Ныне радости своей начало взырают.

2. Простре Ісус на кресте руци собирати
Всех ко Себе, кто его, Творца, хощет знати.
О неизреченная, Христе, любов в Тебе,
Егда, страждущій, чада собераеш к Себе!

3. На крестное вознесен Ісус знаменіе,
Дабы пріят по делех успокоеніе.
Делал еси, Ісусе, но паче делали
На хребте твоем злыи, иже Тебе знали
Истинна наследника Отча винограда.
Се ныне ложе мееш от райскаго сада.

4. Истекает на кресте кров от ребр Ісуса.
Ныне на истиннаго взырайте Іруса,
Іже, хотяще вся нам сокровища дати,
Ребра, руце и нозе даде ископати,

5. Создавый землю и вся, небо, яко кожу,
Пропинаяй, пропятый Сам на крестном ложу.
Но зрете: не слезами Свою омочает
Постелю, реку крове от ран истачает.

6. Распятому Ісусу рану отверзают
Во ребрах: нест ли имат порока, взырают,
В сердцу. Аще нечто же, іудею, зриши,
Обаче неверствіем очеса слепиши.

7. Распятый новый Адам, ветха избавити
Хотяй Адама вины, же дерзнул вкусити
Возбраненнаго яблка. Ах! сладкояденіе!
Тя ли ради претерпе наше спасеніе?

8. Возшел еси, Ісусе, на крестное древо:
Сіе ли седалище имаши царево?
Но паче Тя истинна роду являеши
Пастыря, егда овца свышше взыраеши.

9. На древо Тя крестное, Христе, вознесоша,
Руце, нозе и ребра тебе прободоша,
Злату грывну Тя, Христе, царя веков, знают,
Вместо каменій драгих гвоздми украшают.

10. От Тебе в пяти тысящ пятми насыщенны
Хлебы людіе, но род, зело развращенный
Еврейский пят ранами, Христе, хлеб Тя крает:
Смыслов пяти не имий зло дело дерзает.

11. Простер еси, Ісусе, на крест твои руце,
Егда вся совершенна в Твоей горкой муце;
Лук напрягл еси, Христе, стрилу Тя твориши,
Да темныя вовеки враги победиши.

12. Ныне юже престани, сердечныя брани,
На Ісуса распятаго взырающе раны:
Сей бо ест знаменіе блаженна покою,
Сим небо примирися вовеки с Тобою.