ПЕРЕЙТИ на главную страницу творений преп. Андрея
Примеч.: Ниже помещается канон свт. Андрея Критского (+740) на Св. Пасху, имевший общецерковное употребление с IX века, рано переведенный на славянский язык и исполнявшийся за богослужением в Русской Православной Церкви до XIV-XV вв. наряду с общеизвестным каноном прп. Иоанна Дамаскина. Изменение Устава повлекло за собой вытеснение этого сочинения свт. Андрея из богослужебной практики и книг. В основу настоящей публикации положено издание канона по двум славянским рукописям XI и XIII вв., выполненное прот. Сергием Правдолюбовым: «Пасхальный канон святителя Андрея Критского». М., 1996. Редакция ограничилась некоторыми поправками в изложении канона по-церковнославянски.
* * *
Песнь 1:
Ирмос:
Песнь победную поим вси Богу, сотворшему дивная чудеса мышцею высокою и спасшему Израиля, яко прославися.
Христос воскресе из мертвых.
Зиждитель и Избавитель мой на древе висит, и на судищи стоит, и Бог страждет, безстрастен сый, и терпит вся досаждения нас ради, да мы спасемся.
Егоже трепещут Ангели, волею распинается и погребается, и связует смерть, и терпит вся нас ради, и Страстию страсти убивает, Безстрастный стражда.
На Кресте распинался, солнце омрачил еси в полудни, Господи, и месяц яко в сени постави, и солнце потаи лучи, и потом свет возсия.
Велия дела Твоя, и дивны муки, Христе Боже наш. Страшна же чудеса Твоего Воскресения: Крестом бо ад разруши и гробы истощи.
Свыше сошед Ангел, камень от Гроба отвали, и на нем седя, мироносицам вопияше: не требует мира, ни плача Воскресый из мертвых.
Что плачетеся со Пречистою, что ужасаетеся? Воскресе Господь: шедше рцыте апостолом скоро, – Ангел женам плачущимся глаголаше.
Со Петром тецем и Иоанном ко гробу и видим ризу, идеже лежит, и убрус иже бе на главе Иисуса Воскресшаго.
Омертвеша стражие сущии пред Гробом: Христос востал есть, и иудее мятутся, земля же веселится и небо играется светло и вси роди земнии.
Светло празднующе веселимся: Пастырь пожреся, Агнец предлагается, Христос востал есть, всем просветившимся воскресением Его.
Слава, Троичен:
Поем и славим Тя, Безначальне Отче, Сыне и Душе Божественный, Свет Животворящий воистинну, Безначальную, Сродную, Троицу Нераздельную.
И ныне, Богородичен:
Во утробе вместила еси, Егоже земля во чреве прияла есть, и преисподняя ужасошася: Того родила еси без истления, Богородице Чистая.
Песнь 2:
Ирмос:
Видите, видите, яко Аз есмь Бог, порабощенныя люди Израилевы Моисеови поручивый, и в пустыни питавый, и спасый яко Силен властию Своею.
Видите, видите, яко Аз есмь Бог, Иже с мертвецы плотию бых мертв, и во гробе полежах, и мертвыя воскресих, и Адама оживих властию Своею.
Камень отвалити от дверий, Спасе, повелевый, плачущимся женам явился еси и плач уставил еси, послав я ко апостолом Своим по Воскресении Своем.
Приидите и видите место, идеже лежа, – мироносицам явлейся блистанием светлым Ангел рече яве: что плачете Живаго? Кого ищете в мертвых? Христос воскресе, якоже рече.
Мироносяще жены, приидоша заутра, Егоже паче всех аромат помазати хотяще, яко мертва: Емуже с миром хвалу изливаху песньми книжными.
Что плачеши, о жено? – Марии глаголет. Плачу, – рече, – яко Господа моего взяша из гроба, и ищу, камо преложиша Его? Ангел же рече: Христос воскресе, якоже рече.
Пасха днесь, и чисто есть торжество, Пасха Светлая, Весна Пресветла, Пасха Божия, Весна Христова. Приидите, людие празднолюбцы, в нарочитый день да веселимся тайно: Пасха, Господня Пасха.
Вся сподоби без осуждения, Владыко, светоносную и светлую тайну Воскресения Твоего, Христе, праздновати днесь и пети Тебе, Спасе: Пасха, Господня Пасха.
Слава, Троичен:
Безначальная и несозданная Троице нераздельная, Едина в триех Лицех сущая, разделяемая во Ипостасех верою и во Едину Силу хвалимая благоговейно: спаси Тебе поющия.
И ныне, Богородичен:
Ложесна освятил еси и рождество обновил еси, без семене зачатся, без истления же родился еси от Жены Святыя Девы, Пострадавый за ны.
Песнь 3:
Ирмос:
Камень, Егоже небрегоша зиждущии, сей бысть во главу угла: той есть камень, на немже утверди Церковь Свою Христос, Юже от язык искупи.
Видев, еже виде, солнце ужасеся и потаи лучи в полудне; како же не хоте заити, со страхом зря Владыку моего на Кресте? Сице бо мне и всем источает жизнь.
Камение како разседашеся, и земля како, ужасающися, трясяшеся; како же убо не разседашеся, како ли не трясяхуся горы и всяческая, страшным чудом висения Твоего на Кресте, яко Бог сый волею страждаше?
Соборище непокоривое и беззаконное иудейское, яко печати налагаете тогда камени Гроба, сами исперва неверующе Воскресшему из мертвых: и тако бысте сынове погибели и беззакония.
Ей убо, яко вы солгасте, яко Христос украден бысть. Како же и украден бысть, наг сый, злодеи? И тая чудеса се во гробе суть. И сударь Его ныне свидетельствует Воскресение Его.
Грядите, торжествуйте, сынове человечестии. Сей день, рече певец, Егоже сотвори Господь, воскрес из Гроба. Радуйтеся, земнии: всех бо Христос созывает.
Да станут плачевныя слезы и да отымется плач. Преста скорбь первыя Евы, Христу воскресшу. Жены быша благовестницы Ему, первыя Его сретша.
Несть, якоже вы вопиете: Христос украден есть. Како кустодия печатленна внутрьуду лежит на камени, имже печатлен есть, и отвален есть камень? Жив бо есть Христос, якоже воскресе.
Слава, Троичен:
Единому покланяемся Божеству в триех Лицех, Безначальному Отцу и Сыну и Духу: Троице во Единице нераздельней и несозданней в Существе Своем, Юже богословлю, и хвалю, и чту.
И ныне, Богородичен:
Единаго Тя Сына славим, яко от Девы плоть приимшаго и неизменнаго отнюдь, пострадавшаго волею и погребеннаго нас ради, и воскресшаго из мертвых, Единаго Христа Бога от Девы Матере.
Песнь 4:
Ирмос:
Духом провидя пророк Аввакум Словесе воплощение, проповедаше глаголя: егда приближатся лета познаешися, егда приидет время, явишися: слава силе Твоей, Господи.
Камения печати видяще распадение, что льститеся, беззаконнии, отметающеся Света? Се камень, се и кустодия, с теми же и гроби вопиют, яко воскресе и жив есть Христос.
О лесть, о неистовство, о беззаконное нечестие! Жизни отвергошася, солгавше Христу: воскресе бо, и свидетельствуют печати, и не украден бысть. Ризы вопиют, яко воскресе и жив есть Христос.
Жены, что ужасаетеся и плачете зело? Что миро носите Живому, яко мертвому? Яко воскресе, – Ангел вопияше мироносицам: приидите и видите место, идеже, яко мертв, положен бяше Живый.
Возсиял еси из Гроба, Свет от Света, и землю озарил еси Божественным Твоим Светом, и во аде держимыя мраком Своим Воскресением просветил еси, вопиющия: слава страшному Твоему Воскресению.
Начните Господеви, веселитеся людие и торжествуйте и хвалите Его: се бо прииде Спасый образ, погребенный Адамовым преступлением. Слава страшному Твоему Воскресению, Христе.
Слава, Троичен:
Троицу во Единице славим, людие, во Едином Божестве: Отца и Сына и Божественнаго Духа, и Сию Едину, естеством неразделиму, и неразлучиму, и нераздельну: Един бо в Троице Лиц Бог.
И ныне, Богородичен:
Во Пречистую Твою утробу вселися, Чистая, Бог и Творец мой, без семене воплощься, и Богородицу яви Тя, Дево. К Немуже непрестанно молящи не престай, да избавимся напасти лютыя.
Песнь 5:
Ирмос:
Твой мир даждь нам, Сыне Божий, иного бо разве Тебе бога не знаем, Имя Твое именуем, яко Бог живых и мертвых еси.
Во тьму преложися, страсть Твою, Христе, чудо страшно показуя, солнце. Како бо бяше не Светящему на земли светити? Тебе бо последоваше.
На Древе крестнем пригвоздился еси, Иисусе, и адовы вереи, и смертная шатания диаволя разрушил еси. Темже покланяемся Ти, на нем пригвождшемуся.
Пожерся, Безгрешне, волею за ны, непорочен сый, дал еси Ся всесожжение, яко овча совершено, яко Агнец сый, вземляй мира грехи.
Обвит Тело Твое плащаницею чистою, покадив е честными вонями, и со славою положи в новем гробе Иосиф Благообразный.
Затвориша гроб Твой затвором, Иисусе, внутрьуду утверждше, и внеуду стрегуще, и всюду печати утверждения. И како востал еси чудно, всяческая Обдержай?
Светло спразднуим: воскресе бо Христос, и Пасху тайную нам дарова святыя Страсти. Мы же, Спасе, человеческий род, от умерщвления избавлени быхом.
Слава, Троичен:
Троице Святая, слава Тебе, неразделимая, единая: Отче и Сыне и Душе Святый, во триех Ипостасех и во едином Естестве, спаси вся хвалящия Тя.
И ныне, Богородичен:
Образа зачатия Твоего никтоже разуме когда и страшныя рождества Твоего тайны: обое бо паче ума в Тебе совершися, Марие Богородице.
Песнь 6:
Ирмос:
Пророка Иону подражая, вопию: живот мой, Блаже, свободи из тли, и спаси мя, Спасе мира, милосердием Твоим.
Стараго злаго врага обличил еси Крестом, и державу разорил еси смертную, Христе, и возсиял еси нам свет Воскресения Твоего.
В мертвых вменился еси, оживляя мертвыя, и воскресл еси, Животе, возводя земныя, и разрушил еси узы адовы властию, Спасе.
Во ад сошед Неодержимый, всюду испытал еси, и воздвигл еси Адама, избавляя Своим Воскресением прадеда от тли.
Празднуим светло, веселящеся таинством, – на празднство Христово вернии призывают вопиюще: приидите, торжествуим.
Слава, Троичен:
Отцу и Сыну и Святому Духу поклонимся, вернии, во триех Ипостасех Естеством Нераздельному, вопиюще: слава в Троице Богу.
И ныне, Богородичен:
Како зачала еси, рцы, Егоже Отец не всея? Како пребыла еси чиста по рождестве, яко прежде? Рече: никтоже весть на земли, како есть.
Песнь 7:
Ирмос:
Отроки от пещи избавивый, быв Человек, страждет яко смертен, и страстию смертное в нетления облачи благолепие, един Благословен отцев Бог и Препрославлен.
Аще на Кресте пригвоздился еси, Христе, но пребыл еси по существу Отчу безстрастен: плотию бо страждаше и терпяше, Долготерпеливе, о всех, да мне яко Бог безстрастие подаси.
Ты мене ради возшел еси на Крест, Долготерпеливе, да мя избавиши клятвы, юже Моисей написав в Законе, властию повеле: проклят всяк, иже на древе пригвожден.
Желчи вкусил еси, Владыко Христе, обратив ми всякую горесть тленную на сладость, из ребр источив воду. Сего ради вопию Ти: благословен еси, Спасе, Очистителю душ наших.
Христос воскресе днесь, людие, радуйтеся и торжествуйте светло: прииде Свет, прииде Христос, прииде Благодать, прииде Истина, прииде всем Жизнь и Воскресение.
Где Мертвец, да рекут нам стражие: кто есть украдый Мертвеца? Где Украденный? Како распадеся ныне печать? Что ризы? Что же камень вам мнится, беззаконницы?
Что не веруете, беззаконнии, Христу воставшу? Приидите и прочтите ваша вся книги: аще Христос не сице востал есть, якоже ту? – вопияху живоноснии Гроб со Воскресением Его.
Невежествия покровение на вас належит: темже не видите Света. Отымите убо сущий в вас неверствия помысл, да просветит вас истинный Свет.
Да просветится земля днесь, и да взыграются Ангели и вси земнии: яко Христос воста от гроба, и Адама воздвиже, и оковы земныя разруши.
Светоносный сей праздник торжество явися торжества нам: Пасха честная, Пасха новая, Пасха Господня, от земли возводящая на Небеса верных, прежде преднаписанная нам.
Слава, Троичен:
Троическую воспоим песнь, славяще Безначальнаго Отца и Сына и Духа, правую во Единстве, Едину Сию, Юже Троицу поем: Свят, Свят, Свят еси, зовуще.
И ныне, Богородичен:
Паче ума Твоего рождества тайну кто исповесть, Чистая? Всестрашно, всекрасно и странно, всевыше ума: Бог бе и есть Твой, Дево, Сын.
Песнь 8:
Первый ирмос:
Егоже трепещут Ангельстии вои яко Творца и Избавителя всех, пойте, священницы, и превозносите во вся веки.
На древе повесиша, яко овча, Христа, прободоша же тогда беззаконныя с Ним, и потрясеся со страхом вся земля, и раздрася завеса в распятие, яже прежде бяше красна.
На Кресте Тя пригвожденна зрящи Пречистая, Сына Своего, вопияше Матерски: не безчадну яви Мя, рождшую Тя, но да вижду славу Твоих велений и деяний.
Ликуйте, Ангели, и веселитеся, земнии: Христос бо воскресе, совокупляя яко Бог вышняя с нижними, и страстию Своею убив, разори вражия мучения.
Мертвии, сретайте гробнаго в мертвых Христа, воздвигшаго из гроба Адама. Воста бо сице, и явися жив Христос, и прииде спасти нас во веки.
Богородичен:
Пресвятая Богородице, спаси нас.
Радостию вопием Ти мы, земнии, Дево Богоневестная: без семене бо нам родила еси Сына Божия, Егоже молящи не престай за всех нас.
Второй ирмос:
Премудростию небеса Утвердившаго, и на водах землю Основавшаго, и тварь всю Создавшего, благословите, пойте, священницы, Господа; людие, превозносите Его во вся веки.
Миро носяще жены и ароматы, иже паче над всею землею суть, благоухания воня носяще, приидоша рано заутра к страшному Гробу, идеже Христос востал есть.
На камени юноша седяй, священныя жены пригласи: не плачитеся, приидите, место видите, идеже лежа Тело Хотящаго обновити вас.
Светоносныя страсти Твоя светлоносно проповедает Воскресение, и мы о Бозе торжествуем великия Пасхи день, светло празднующе Христа во веки.
Прекрасное торжество праздников праздник является, в онь бо воскресл есть Владыка, и воскресил перваго Адама, и просветил всю вселенную.
Троичен: Благословим Отца и Сына и Святаго Духа, Господа.
Отец и Сын и Святый Дух, преначальный Свет, Живот наш, Троице сродная, вкупе чтомая, иже верою хвалят Тя, Своею Нераздельностию избави всех от тли.
И ныне, Богородичен:
Отеческаго благоволения сокровище, Сыновняго пришествия водворение, Святаго Духа одеяние явилася еси, Марие: Троица неизреченная о Тебе образовася.
Песнь 9:
Первый ирмос:
Сотвори державу мышцею Своею, низложи бо сильныя со престол и вознесе смиренныя Бог Израилев, в нихже посети нас Восток с высоты, и направил ны есть на путь мирен.
Вознес Себе пригвоздил еси на Древе крестнем: вознесл еси род человеческий. Принзел же еси на Кресте рукописание наше, имже написал еси, Спасе, нашу свободу, и оставил еси нам осуждения написание.
Погреблся еси, Безсмертне, и воскресл еси, в мертвых погребый наше прегрешение, и воздвигий Адамов падший образ. Темже поклонимся Погребению Твоему и Воскресению, Иисусе всех Царю: Тя прославляем.
Воскрес явился еси святым учеником: дана Ми есть всяка власть, – глаголя к ним, – на земли и на небеси. Темже и послал еси их в языки вся крестити, Иисусе, приходящия к ним.
Пасха велика и честна Христова светлый приготови день божественныя тайны Воскресения Его, воньже, празднолюбцы людие, светло торжествуйте восклицанием, и радостию, и добродетелию.
Богородичен: Пресвятая Богородице, спаси нас.
Обновила еси естества в рождестве Твоем, Чистая: Зиждителя бо миру воплощенна породила еси, земным – Бога Израилева, и пребыла еси без тли, якоже древле рай прадеда Адама, воздвигши его.
Второй ирмос:
Живоносный Источник приснотекущий, светоносный Светильник Благодати, Церкве Божия Покров славный, небесе и земли Пространнейшую, Богородицу Чистую величаем.
Приидите, празднолюбцы, приидите и видите величия Христа Бога нашего: распятием бо Своим воздвиже Адама падшаго, и в мертвецех вменися мертвецы Воставляяй, и воскресе из мертвых вся Спасаяй.
Вси язы́цы, восплещите руками днесь, якоже Давид воспет, и верно воскликнем, и согласно воспоим: яко воскресе Христос, якоже прежде рече, и сущия во гробех мертвыя вся воскреси.
Весна Господня светла и Воскресение, составльшия Пасхи торжество: сие празднуем таинство, празднолюбцы, яко Пасха наша Сам пожреся Христос, великий Пастырь, яко и Овча.
Христос воскресе, и жив есть Бог наш. Свет бо есть, и Жизнь, и Воскресение. Мироносицы радуются, ученицы веселятся, людие, колена земная радуются: яко воскресе Жизнь наша.
Благообразуйте вси просвещающеся, торжествуйте и верою ликуйте; священницы, возноситеся, царие, веселитеся, людие вси земнии, радуйтеся: яко воскресе Жизнь наша.
Слава, Троичен:
Преначальный Свете, Животе наш: Отче и Сыне и Душе Святый; в триех Ипостасех и во Едином Божестве Пресущнаго присно богословлю: Троицу приснородную и вкупечтомую.
И ныне, Богородичен:
Радуйся Мати Божия, Граде Одушевленный, в немже вместитися изволи: не оставив бо Вышних, в Тебе вселитися изволи, яко да на земли, Богородице, обновит мя утробою Твоею.