ПЕРЕЙТИ на главную страницу творений преп. Андрея

(чтение: YouTube Духовный Молитвенник)

Песнь 1

Ирмос: Коня и всадника в море Чермное/ сокрушаяй брани мышцею высокою/ Христос истрясе, Израиля же спасе,/ победную песнь поюща.

Припев: Святи́телю о́тче Андрее́, моли́ Бо́га о нас.

Сон от веждей оттряс, тебе самаго Владыце добродетелию уготовал еси / светло жилище, Богоявленне преподобне, и Божественное покоище.

Пением всесличным твою цевницу движа, / Христову Церковь, песнословя, уяснил еси, Андрее чудне,/ Святаго Духа оглашаем Божественною благодатию.

Слава: Закону богописанному мудре повинуяся,/ телесныя страсти постнически умертвил еси,/ ум же возвысил еси крепким твоим желанием, / поя песни Божия, всемудре.

И ныне: Весь желание и пречисто наслаждение, / Сын и Бог Твой благих исполнение есть, Всенепорочная, / Егоже моли избавити верою ныне к Тебе притекающия.

Песнь 3

Ирмос: Водрузивый на ничесомже землю повелением Твоим/ и повесивый неодержимо тяготеющую / на недвижимем, Христе, камени заповедей Твоих,/ Церковь Твою утверди, Едине Блаже и Человеколюбче.

Припев:

У правил еси добродетелию житие твое, преподобне,/ и, Божественным желанием Богу соединяяся, орган явился еси словесен,/ всю вселенную уясняя песньми, Божественная сокровища почерпая.

Премудрости Небесныя был еси исполнен,/ душевная бо уста разширив, преподобне,/ всю приял еси яве зарю светоносную трисолнечныя светлости,/ яко священнодейственник священен.

Утвердив душевныя силы твоя, преподобне, и плоть удержав воздержанием,/ был еси весь пресветлая звезда, / украшая Церковь православными твоими учении и песненными пении.

Слава. И ныне

Избавити мя страстнаго пленения ныне молю Тя, Мати Божия Всенепорочная,/ и греховныя язвы вся очистити,/ грех Вземлющаго мира преславно рождшая.

Господи, помилуй (Трижды)

Седален

глас 4.

Яко камением, словесы твоими церковный, премудре, украсив венец, / священнодейственник священен, Андрее, был еси./ Темже по многих в житии трудех приял еси нестареемое Царство и славу,/ в немже поминающих тя, отче, поминай.

Слава: Дево Всенепорочная, Яже Пресущнаго Бога рождшая, / со Безплотными Того непрестанно моли/ оставление прегрешений и исправление жития дати нам прежде конца,/ иже верою и любовию поющим Тя по долгу, едина Всепетая.

И ныне: Дево Пренепорочная, Мати Христа Бога, / оружие пройде Твою пресвятую душу, / егда распинаема видела еси волею Сына и Бога Твоего, / Егоже, Благословенная, молящи не престай/ прощение прегрешений нам даровати.

Песнь 4

Ирмос: Божественное Твое разумев истощание прозорливо,/ Аввакум, Христе, со трепетом вопияше Тебе:/ во спасение людей Твоих/ спасти помазанныя Твоя пришел еси.

Припев: Святи́телю о́тче Андрее́, моли́ Бо́га о нас.

Слово Твое, житием украшено, Богословия известное правило показался еси, чудне,/ Препетыя Троицы славу сказуя ясно.

Деянием видения восход показав, мудре, и видением объемся, / жития образом, Андрее Богогласе, уподобился еси.

Яко Божествен святитель, пребогате, пастырски поборая,/ от Церкве отгнал еси львов нашествия, Андрее, мужеству тезоимените.

Велику похвалам вину, Богородицу обрет, тщание показал еси сугубо,/ превышшую похвал хвалами многообразными почитая, мудре.

Слава. И ныне: Кроме убо совокупления зачала еси нетленно во утробе, / и прежде болезни родила еси, / и по рождестве Девою, Бога плотию рождши, сохранилася еси.

Песнь 5

Ирмос: Одеяйся Светом, яко ризою,/ к Тебе утренюю и Тебе зову:/ душу мою просвет омраченную, Христе,/ яко Един Благоутробен.

Припев: Святи́телю о́тче Андрее́, моли́ Бо́га о нас.

Ныне красящийся твоими учении/ и песньми богодохновенными священно наслаждающеся, / Андрее всеблаженне, память твою почитаем.

Зарею просвещаем яве духовною,/ святых ликостояния пресвято похвалтл еси,/ с нимиже ныне радуешися, Андрее всеблаженне.

Ныне не чувствы тленнаго тела, ни мечтаньми зриши Божественная, / умно же, премудре, душевными действы соединяяся лучшим.

Слава. И ныне: Со слезами припадаю Ти, зело моляся,/ моих согрешений ныне избавитися Тобою, Всенепорочная,/ и вечныя радости сподобится.

Песнь 6

Ирмос: Неистовствующееся бурею душетленною,/ Владыко Христе, страстей море укроти/ и от тли возведя мя,/ яко Благоутробен.

Припев: Святи́телю о́тче Андрее́, моли́ Бо́га о нас.

Витии обличил еси безбожный усты светлыми, / честных бо икон уяснил еси воистинну, священнотайнниче, поклонение.

Священно украсил еси твою, отче славне, жизнь:/ страстное бо смущение угасил еси/ и к жизни безстрастия притекл еси.

Добротами словес твоих и учении/ вси вернии благочестно наслаждающеся, радуются,/ еретик языкоболия побеждающе.

Слава. И ныне: Весь примешается ми, Иже безначально возсияв от Отца, / воплощением, Пренепорочная, из Тебе бывшим, Богоневесто.

Господи, помилуй (Трижды)

Кондак

глас 2.

Вострубив ясно Божественная сладкопения, / явился еси светильник мира светлейший,/ светом сияя Троицы, Андрее преподобне. / Темже вси вопием ти:/ не престай моляся о всех нас.

Икос:

Восхвалити твое, отче, житие, окаянный, хощу, / ведый ныне, исправлений твоих ради, / ищу оттуду, якоже дарования, похвалы прийти твоих украшений/ и честному верху твоему, Андрее, исплести, / еже Ангели почитают, зовый: / моля не престай о всех нас.

Песнь 7

Ирмос: Превозносимый отцев Господь / пламень угаси, отроки ороси,/ согласно поющия:/ Боже, благословен еси.

Да светлость святых, преподобие, узриши, / светлостию дел просветил еси житие твое, зовый:/ Боже, благословен еси.

Телом обложен, Безплотных чином поревновал еси, преподобне,/ с нимиже согласно, радуяся, взываеши:/ Боже, благословен еси.

Иерусалим ныне светло веселится,/ светильника многосветла миру тя возсияв, блаженне, поя:/ Боже, благословен еси.

Слава. И ныне: Иже прежде убо Безплотный воплощается, Пречистая,/ за милосердие безчисленное из ложесн Твоих святых./ Емуже вси поем:/ Боже, благословен еси.

Песнь 8

Ирмос: Тебе, Вседетелю,/ в пещи отроцы, всемирный лик сплетше, пояху:/дела всякая, Господа пойте/ и превозносите во вся веки.

Новаго кивота Церковь, отче,/ ясно обвеселил еси, лики составль, взывая:/ вся дела Господня, Господа пойте/ и превозносите во вся веки.

Пение новое в Церкви, блаженне, преподобно взывал еси Вседержителю: / вся дела Господня, Господа пойте/ и превозносите во вся веки.

Воздая добродетели боголепно дела, страдания воспел еси, Андрее премудре, всех святых, / древле удивленных и совершенных Христу во веки.

Слава. И ныне: Приидите, Чистую Богоотроковицу воспоем,/ глаголюще, Божественными песньми:/ радуйся, Дево, Еяже ради радость дадеся естеству человеческому, Преблагословенная.

Песнь 9

Ирмос: Исайе, ликуй,/ Дева име во чреве и роди Сына Еммануила, / Бога же и Человека, Восток имя Ему,/ Егоже величающе, Деву ублажаем.

Глагол твоих вещание всю обтече землю, / учений же красота и светлость, Андрее блаженне,/ темже Христос, Иже всех Царь, тя венчал есть благолепия венцем.

Соединением лучшим наслаждаяся зари три сиянныя, / Андрее, тайнниче пачеестественных,/ любовию творящих твою святую память священно/ ныне молитвами твоими от бед сохрани.

Со Безплотными чинми веселишися ныне на Небесех:/ сих бо на земли житие неуклонно яко пожив / и правыя веры явлься проповедник изряден, Богоглаголиве досточудне.

Слава. И ныне:  Приносимое уставила еси смерти неуставное стремление,/ рождши плотски, воистинну паче ума, Жизнь вечную, / Ейже приразився усты, горький ад упразднися, / Пресвятая Дево Мати.