🎧Акафист и канон святому преподобному Паисию Святогорцу

Конда́к 1
Избрáннаго Панагýды подви́жника/ и аромáтницу благоухáнную, Каппадоки́йское прозябéние и предстáтеля неусы́пнаго, да воспои́м соглáсно. Áнгельскому бо житию́ подражáя, Тро́ице Святéй благоугоди́, те́м и зовéм:/ ра́дуйся, преподóбне Паи́сие,// ди́вный наро́да Бóжия утéшителю.

И́кос 1
А́нгел показáлся еси́ во удéле Богорóдицы избрáннем, и на́м ходáтай теплéйший пред Бо́гом, Паи́сие о́тче, тéмже тáко тя́ воспевáем:

Ра́дуйся, Каппадоки́и добровóнное ми́ро,

ра́дуйся, вы́шняго жи́тельства о́браз яви́вый,

ра́дуйся, Аси́и Мáлыя процветéние,

ра́дуйся, святáго Арсéния похвалéние,

ра́дуйся, в фарасиóтех приснопевáемый,

ра́дуйся, инокýющих прáвило,

ра́дуйся, вéлие Элла́ды и ве́ры храни́ло,

ра́дуйся, Каппадоки́йскаго ро́да свети́ло,

ра́дуйся, Византи́и божéственная óтрасле,

ра́дуйся, добрóто Афо́на и óрле,

ра́дуйся, земны́й áнгеле, вéстниче на земли́,

ра́дуйся, человéче небéсный, пребывáяй на Небеси́.

Ра́дуйся, преподо́бне Паи́сие, ди́вный наро́да Бóжия утéшителю.

Конда́к 2
Ви́дяще, я́ко от руки́ свящéннаго Арсéния в Фарáсе Каппадоки́йстей, роди́тельнице святы́х, Креще́ние прия́л еси́, и я́ко сегó моли́тва многоплóдну тя́ óтрасль Мáлыя Аси́и и Эллáды яви́, тя́ прославля́ем по достоя́нию, Бóгови плéщуще: Аллилу́ия.

И́кос 2
Разумéя и познавáя страдáния из отéчествия произгнáнных, стрáнствуя и печáля о до́ма роди́тельскаго разорéнии, в вéре укрепи́лся еси́ и богоразýмия прия́л еси́ све́т от благодáти Бо́жия, Паи́сие свя́те. Сего́ рáди и мы́, взирáюще на чудеса́ твоя́, восклицáем ти́ таковáя:

Ра́дуйся, Иисýсовых благослове́ний стяжáтелю,

ра́дуйся, удéла Богомáтерняго божéственный светодáтелю,

ра́дуйся, ве́трило многомýдрых благодея́ний,

ра́дуйся, аромáтнице Вы́шняго даровáний,

ра́дуйся, Бо́жия Ду́ха блажéннейшее сия́ние,

ра́дуйся, добродéтелей несказáнное благоухáние,

ра́дуйся, Афóнская лéторасле прекрáсная,

ра́дуйся, áки купе́ль Силоáмская, врачýяй вся́кия стрáсти,

ра́дуйся, Пресвяты́я служи́телю преблажéнный,

ра́дуйся, Святы́я Го́ры вождю́ и кли́че побéдный,

ра́дуйся, поста́ и моли́твы дéлателю неусыпáемый,

ра́дуйся, застýпниче стрáждущих и опечáленных.

Ра́дуйся, преподо́бне Паи́сие, ди́вный наро́да Бóжия утéшителю.

Конда́к 3
Си́лою Вы́шняго укрепля́емых мýчеников чтя́ жития́ и разумéя, ты́ душе́ю блажéнною к непрестáнному славослóвию Всетворцá восходи́л еси́. Мы́ же сиé воспоминáюще, вопиéм: Аллилу́ия.

И́кос 3
«А́з е́смь Воскресéние и Живóт. Вéруяй в Мя́ не ýмрет во вéки». Си́и словесá от Небе́снаго Жениха́ услы́шав и испóлнь сы́й све́та божéственна, невéрия прéлесть низвéргл еси́. Сегó ра́ди благодáрственно вопиéм ти́ тáко:

Ра́дуйся, во óтрочестве безбóжия се́ти препрéвый,

ра́дуйся, я́ве Христа́ узрéвый,

ра́дуйся, оби́тели Стомиóнския устрои́телю,

ра́дуйся, Кони́тских еретикóв победи́телю,

ра́дуйся, ми́лостыни потóче неисчерпáемый,

ра́дуйся, нéбесным сия́нием укрепля́емый,

ра́дуйся, Синáйския горы́ подви́жниче,

ра́дуйся, оби́тели великомýченицы Екатери́ны моли́твенниче,

ра́дуйся, мýдростию дéве се́й подражáтелю,

ра́дуйся, святы́м Галактиóну и Еписти́мии соседáтелю,

ра́дуйся, сáде, прозябы́й от горы́ Моисéевы кáмене,

ра́дуйся, моли́твы áнгельския на земли́ воспевáние.

Ра́дуйся, преподо́бне Паи́сие, ди́вный наро́да Бóжия утéшителю.

Конда́к 4
Рачéние боже́ственное к Богомáтери, чистéйший óтче, понéже имéя, Сию́ Предстáтельницу неусы́пную и Храни́тельницу стяжá. Сегó ра́ди и мы́, даровáний твои́х желáюще приобщи́тися, о тебе́ поéм: Аллилу́ия.

И́кос 4
Слы́шаша и́мя твое́ земни́и концы́, Паи́сие свя́тче, ты́ бо, я́ко сóлнце блистáяй во времена́ послéдняя и Правослáвие утверждáяй и́менем Го́спода Иису́са Христа́, показáлся еси́. Мы́ же, единомы́сленне памятýюще боже́ственная уче́ния твоя́, приношáем ти́ речéния таковáя:

Ра́дуйся, люби́мче изря́днейший Пресвяты́я,

ра́дуйся, ны́ ущедря́яй Ма́тере Бо́жия кри́не,

ра́дуйся, сомоли́твенниче Херуви́мом,

ра́дуйся, единонрáвниче Серафи́мом,

ра́дуйся, укреплéние Правослáвия,

ра́дуйся, ýтваре преизбрáнная,

ра́дуйся, чернори́зцев огрáдо и отéчествия хранéние,

ра́дуйся, Кóницы óтрасле, Стомиóна же заступлéние,

ра́дуйся, я́ко лозá Богома́тере, благоврéменный пло́д принося́й,

ра́дуйся, вертогрáде покая́ния благоухáяй,

ра́дуйся, бесéдуяй Бóжиими словесы́,

ра́дуйся, умащéние я́звам грéшничим.

Ра́дуйся, преподо́бне Паи́сие, ди́вный наро́да Бóжия утéшителю.

Конда́к 5
Богоприя́тну любóвь я́ко стяжáвый, жéртву ся́ брáтиям возложи́ и благословéнием Пречи́стыя оделя́ше все́х. Таковáго ся́ отвержéния рáди ны́не со А́нгелы Христá прославля́еши, мы́ же, в па́мять твою́ призывáемии, вопие́м: Аллилу́ия.

И́кос 5
Ви́девше тя́ ду́шу за бли́жняго полагáюща, блажéнне Паи́сие, к тебе́ прибегáем: ми́лостив бýди на́м и, Влады́це Христу́ предстоя́, Тогó умоли́, да отженéт у́м помрачáющую грехо́вную тьму́ от молéбными пéсньми хвáлящих тя́ сицевы́ми:

Ра́дуйся, Панагýды дóблественный ратобóрче,

ра́дуйся, Богорóдицы песнослóвче,

ра́дуйся, путевóдная заблýждшим звездó,

ра́дуйся, Афóнская зовýщая к Бо́гу трубó,

ра́дуйся, утешéние плáчущих,

ра́дуйся, помóщниче стрáждущих,

ра́дуйся, печáльных божéственное укреплéние,

ра́дуйся, не оставля́яй и́ноков попечéнием,

ра́дуйся, у Ми́лостивыя за ны́ предстáтелю,

ра́дуйся, недýжных безмéзднейший врачевáтелю,

ра́дуйся, подвизáющихся направля́яй,

ра́дуйся, изря́дне Врата́рницу Богоро́дицу восхваля́яй.

Ра́дуйся, преподо́бне Паи́сие, ди́вный наро́да Бóжия утéшителю.

Конда́к 6
Проповéдник богонóсен еси́ и сто́лп ве́ры, дáры Ду́ха Свята́го на́м испрошáяй, тéм и мы́ тебе́ рáди, ста́рче преди́вный, немóлчно пое́м: Аллилу́ия.

И́кос 6
Возсия́в я́ко лампа́да неугаси́мая све́том Трисо́лнечнаго Божества́, покая́ния наста́вник яви́ся, Паи́сие свя́те. Мы́ же, твои́ми предстáтельствы свы́шнее утешéние и благодáти познáние приéмлющии, хвáлим тя́, вопию́ще:

Ра́дуйся, ковчéже себе́ отвержéния и воздержáния,

ра́дуйся, Утéшителя благодáть на на́с изливáяй,

ра́дуйся, Со́лнца-Христа́ маловéрным провозвести́вый,

ра́дуйся, ми́лостию Человеколю́бца все́х удовли́вый,

ра́дуйся, о ми́ре моли́твою вы́ну благоухáяй,

ра́дуйся, я́ко вино́ сла́дкое, дýши рáдостию исполня́яй,

ра́дуйся, Богомáтере слáвие избрáнный,

ра́дуйся, приношáяй слéзы Христý я́ко ши́пок доброухáнный,

ра́дуйся, Фовéры предстáтельство и могýчее возглашéние,

ра́дуйся, откровéния громоглáсное возвещéние,

ра́дуйся, Та́йней Ве́чери чи́стою душéю приобщáвыйся,

ра́дуйся, помыслóв исповéданию прилежáвый.

Ра́дуйся, преподо́бне Паи́сие, ди́вный наро́да Бóжия утéшителю.

Конда́к 7
Хотя́щу тебé Спа́су послéдовати, мýченическаго жития́ ревни́тель показáлся еси́, душéю несквéрною же и те́лом, и любóвию божéственною ко Христу́. Сего́ ра́ди тя́ величáем, всесоглáсно пою́ще Бóгови: Аллилу́ия.

И́кос 7
Нóвое одолéние на неви́димыя и ви́димыя враги́ показáвый, егóже моли́твою и любóвию стяжá, и всеорýжие смирéния взе́м, истреби́л еси́ бесóвския кóвы и тщáния, Бóгови же благодáрственная возопи́. Те́м и мы́ принóсим ти́ сицевáя:

Ра́дуйся, све́та божéственное храни́лище,

ра́дуйся, благоутрóбия Христо́ва вмести́лище,

ра́дуйся, псалти́ри Дави́довы пéние,

ра́дуйся, свята́го Арсéния умолéние,

ра́дуйся, грéшников исправля́яй и ободря́яй,

ра́дуйся, ми́лование у Богоро́дицы испрошáяй,

ра́дуйся, главó подви́жников венценóсная,

ра́дуйся, сéне стрáждущим росонóсная,

ра́дуйся, водó живи́тельная претыкáющимся,

ра́дуйся, мóсте, в жи́знь изводя́й утопáющих,

ра́дуйся, стóлпе гре́шником пáдшим и укреплéние,

ра́дуйся, разслáбленным ти́хий óдре и упокоéние.

Ра́дуйся, преподо́бне Паи́сие, ди́вный наро́да Бóжия утéшителю.

Конда́к 8
Стрáнен бы́в в ми́ре, Паи́сие, Го́спода возлюби́в и стра́сти твоя́ укроти́в Бо́жиею благодáтию, ны́не же я́ко зарни́ца облиставáеши о тебé вопию́щих немóлчное: Аллилу́ия.

И́кос 8
Вся́к, к тебе́ притекáяй, николи́же, óтче Паи́сие, неутéшен оты́де. Но прося́й благодáти даровáние приимáше. Сегó рáди и мы́ воспевáем ти́ сицевáя:

Ра́дуйся, лученóсная омрачéнным звездó,

ра́дуйся, кáющихся настáвниче и главó,

ра́дуйся, афóнския брáтии тяготы́ взéмляй,

ра́дуйся, Всесвяты́я сáда цвéте преукрашéнный,

ра́дуйся, о благосты́ни Христóве сладковещáние,

ра́дуйся, моли́твы небéсныя мироухáние,

ра́дуйся, ми́рови Месси́ю провозвещáяй,

ра́дуйся, пе́снь архáнгелову ко Пресвяте́й воспевáяй,

ра́дуйся, надéждою, ми́лостию и любóвию пламенéяй,

ра́дуйся, во врáжией брáни божéственное омовéние,

ра́дуйся, прия́вый даровáние прорóческое,

ра́дуйся, благоутрóбием Отцу́ Небéсному подóбниче.

Ра́дуйся, преподо́бне Паи́сие, ди́вный наро́да Бóжия утéшителю.

Конда́к 9
Вся́кому естествý проповéдал еси́ слóво, апóстолом уподобля́яся, рачéнием же и любóвию к бли́жним просия́л еси́ я́ко сóлнце на земли́, прославля́я Святу́ю Тро́ицу: Аллилу́ия.

И́кос 9
Сле́з потóки от души́ мироточá, сéрдцем о человéцех, стрáждущих душе́ю и тéлом, боля́ше. Сегó рáди ны́не и мы́ от ду́ш на́ших песнопéния ти́ возсылáем, в смирéнии вопию́ще прилéжно:

Ра́дуйся, Евáнгелия служи́телю неутоми́мый,

ра́дуйся, свéщниче Трисóлнечнаго Божествá неугаси́мый,

ра́дуйся, я́ко пóстничества ристáлище соверши́вый,

ра́дуйся, я́ко смирéнием крáйним ины́х предвари́вый,

ра́дуйся, во Афóне вéры сия́ние,

ра́дуйся, Всесвяты́я слáдкое воспевáние,

ра́дуйся, учи́телю слáвный дея́ния же и зрéния,

ра́дуйся, я́ко велемýдре пости́же божéственное видéние,

ра́дуйся, Пречи́стыя вертогрáда неусыпáемый дéлателю,

ра́дуйся, святы́м Лукиллиáну, Пантелеи́мону и Евфи́мии собесéдателю,

ра́дуйся, я́ко гла́с Богоотрокови́цы слýхом услы́шал еси́,

ра́дуйся, я́ко Ту́ я́ве, áки на Иерусали́мстей икóне, узрéл еси́.

Ра́дуйся, преподо́бне Паи́сие, ди́вный наро́да Бóжия утéшителю.

Конда́к 10
Вели́чествие со Эллáдою Каппадоки́и и те́плый засту́пник еси́, Паи́сие свя́те. Добродéтелей бо лéствицу богоугóдно соверши́, к Тро́ице Святе́й непрестáнно поя́: Аллилу́ия.

И́кос 10
Стена́ еси́ ве́рным, о́тче Паи́сие, áнгельское бо житие́ возлюби́в, пóдвиги свои́ми Святе́й Трóице неустáннаго предстоя́ния скóро дости́же. Сегó рáди пéния благодáрственная возсылáюще из глубины́ сердéц и ду́ш нáших, смирéнно взывáем:

Ра́дуйся, от Афо́на богоявлéнно ми́ру сия́яй,

ра́дуйся, краснопéснивый глáсе, Сло́во провозвещáяй,

ра́дуйся, многочáдне, ми́луяй человéческая болéния,

ра́дуйся, ослеплéнным стезéй исправлéние,

ра́дуйся, Неневéстней Невéсте рáдование принося́й,

ра́дуйся, к Цáрству Небéсному пу́ть удовля́яй,

ра́дуйся, кади́лу Ду́ха Бо́жия соимéнне,

ра́дуйся, я́ко и зра́к тво́й на́м подаéт утешéние,

ра́дуйся, я́ко в ми́ра концéх вещáнием предвари́вый,

ра́дуйся, зми́я главý моли́твою сокрýшивый,

ра́дуйся, молéния и́менем Иисýсовым и среди́ ми́ра дéлателю неустáнный,

ра́дуйся, к Бо́жией Мáтери стяжáвый любóвь несказáнну.

Ра́дуйся, преподо́бне Паи́сие, ди́вный наро́да Бóжия утéшителю.

Конда́к 11
Пéние Зижди́телю и Приснодéве к борéнием я́же в нощи́ и во дни́ соплетáше смирéнно, те́м ся́ Бóжия Ду́ха сосýд показýя. Мы́ же, Тро́ице Святе́й припáдающе, тебе́ ра́ди поéм и вопиéм: Аллилу́ия.

И́кос 11
Све́т и мироухáние благочéстия, и любвé, и самоотвержéния неисчéтнаго, и исцелéний тóчит святáя па́мять твоя́, преподóбне. Сегó рáди потщáхомся вси́ молéбными гла́сы тебе́ возопи́ти:

Ра́дуйся, я́ко вся́кому указýяй пу́ть на небесá,

ра́дуйся, я́ко рáдости все́х исполня́ют медотóчная твоя́ словесá,

ра́дуйся, изоби́льная от Афо́на рекó искипáющая,

ра́дуйся, звездó от Святы́я Го́ры, вéрным пу́ть озаря́ющая,

ра́дуйся, при́сное за ны́ у Богоотрокови́цы ходáтайство,

ра́дуйся, áнгельскому житию́ прилежáщим предстáтельство,

ра́дуйся, добродéтелей плодонóснейшая лозó,

ра́дуйся, о ми́ре к Престо́лу достигáющая слезó,

ра́дуйся, но́вый апóстоле, к ве́ре Христо́ве вся́ призывáяй,

ра́дуйся, Правослáвия глáсе, мнóзи возсозидáяй,

ра́дуйся, дре́во всеплóдное, Ма́терию Небéсною напоя́емое,

ра́дуйся, элли́нов знáмя, в подсóлнечней распростирáемое.

Ра́дуйся, преподо́бне Паи́сие, ди́вный наро́да Бóжия утéшителю.

Конда́к 12
Благодáти Бо́жия истóк тя́ познáхом, о́тче, по успéнии твое́м, в нéмже ли́цы áнгельстии весéлия исполня́хуся. Те́м и мы́, ходáтая о спасéнии на́шем улучи́ти сподóбльшиися, рáдуемся, взывáюще: Аллилу́ия.

И́кос 12
Пою́ще бе́здну чуде́с твои́х и терпели́вныя твоя́ пóдвиги, свя́те, от серде́ц ти́ сплетáем áнгельская песнопéния, пáмять твою́ почитáем благоговéйно и вопиéм таковáя:

Ра́дуйся, надéжды отéчествию забвéнному вéстниче,

ра́дуйся, о свобожде́нии Святы́я Софи́и и гра́да Вели́каго проповéдниче,

ра́дуйся, Царьгра́д во уповáние нóвое ди́вно предуказáвый,

ра́дуйся, ходáтаю удéла слáвнаго от стра́н свои́х произгнáнным,

ра́дуйся, не тóкмо единоплемéнных путеводя́й, но и от ины́х язы́к приходя́щих,

ра́дуйся, я́ко сынóв Росси́йския Цéркве зелó любя́, благоувéтливо приимáше,

ра́дуйся, пленéнных óтчин прореки́й обновлéние,

ра́дуйся, ми́ру блистáние, вéры немóлчное возглашéние,

ра́дуйся, я́ко знáмения времéн разумéвый,

ра́дуйся, Откровéния Иоáннова таи́нниче богодухновéнный,

ра́дуйся, я́ко апо́стол, явлéй обетовáния,

ра́дуйся, избавлéния Аси́и Мáлыя уповáние.

Ра́дуйся, преподо́бне Паи́сие, ди́вный наро́да Бóжия утéшителю.

Конда́к 13
О преподóбне о́тче Паи́сие, новоцвéте благоухáнный, изрáстший во временá послéдняя, умоли́ Христа́ Бо́га спасти́ся душáм о тебе́ воспевáющих: Аллилу́ия.

[Се́й конда́к глаго́лется три́жды.]
[Далее повторяем 1‑е икос и кондак:]

Ра́дуйся, Каппадоки́и добровóнное ми́ро,

ра́дуйся, вы́шняго жи́тельства о́браз яви́вый,

ра́дуйся, Аси́и Мáлыя процветéние,

ра́дуйся, святáго Арсéния похвалéние,

ра́дуйся, в фарасиóтех приснопевáемый,

ра́дуйся, инокýющих прáвило,

ра́дуйся, вéлие Элла́ды и ве́ры храни́ло,

ра́дуйся, Каппадоки́йскаго ро́да свети́ло,

ра́дуйся, Византи́и божéственная óтрасле,

ра́дуйся, добрóто Афо́на и óрле,

ра́дуйся, земны́й áнгеле, вéстниче на земли́,

ра́дуйся, человéче небéсный, пребывáяй на Небеси́.

Ра́дуйся, преподо́бне Паи́сие, ди́вный наро́да Бóжия утéшителю.

Моли́тва
О, святы́й преподóбный и богоно́сный о́тче на́ш Паи́сие, возлю́бленный на́ш покрови́телю и богому́дрый наста́вниче, ле́ствицею доброде́телей от земли́ в Небе́сное Ца́рство восшéдый и благода́ть прия́вый во е́же хода́тайствовати о на́с пред Престо́лом Всеми́лостиваго Го́спода на́шего. Мо́лим тя́ отврати́ти ны́ от пути́ грехо́внаго и научи́ти ны́ Го́сподеви соверше́нны плоды́ покая́ния и обновлéния во Христе́ ду́ш на́ших приноси́ти.

Ты́, святы́й о́тче, во дни́ жития́ земна́го мно́зи тя́жки боле́зни и неду́ги неисцéльныя уврачева́вый и души́ грехми́ и скорбми́ стра́ждущих исцели́вый, ны́не предстоя́ Бо́гу, Того́ милосе́рдие к на́м приклони́, да твоего́ предста́тельства ра́ди любо́вию чту́щих святу́ю па́мять твою́ исцели́т, да́рует кре́пость во искуше́ниих, му́жество в борьбе́ с ду́хом зло́бы, и́щущим вéчней поги́бели на́шей, да да́рует на́м проще́ние все́х на́ших грехо́в, и́хже от ю́ности на́шея да́же до настоя́щаго дне́ по́мыслом, сло́вом и де́лом соверши́хом, да научи́т ны́, я́же на́м подоба́ет твори́ти, я́ко да вы́ну Ему́ и бли́жним с любо́вию и смире́нием послу́жим.

Е́й, о́тче святы́й, наста́ви на́с, во о́браз жития́ твоего́, и́же любве́ и милосе́рдия испо́лнено бы́сть, у́з грехо́внаго жи́тельства разреши́вшеся, к Небе́сным Чертогам взы́ти, идéже да восхва́лим Всемилосéрднаго Триипоста́снаго Го́спода на́шего во ве́ки веко́в. Ами́нь.

Канон святому преподобному Паисию Святогорцу

Пе́снь 1.

Ирмо́с: Колесницегони́теля фарао́ня погрузи́, чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́ пешехо́дца спасе́, пе́снь Бо́гови воспева́юща.

Да́ждь ми́ ра́зум, Христе́ Всеси́льне, да возмогу́ всеусе́рдно воспе́ти житие́ и мно́гая чудеса́ преподо́бнаго Твоего́, Паи́сия честна́го и многочу́днаго.

Благоче́стно, я́ко а́нгел, на земли́ пожи́в, сла́вне Паи́сие, пло́ть и страсте́й воста́ния ду́ху покори́л еси́ и даро́в Бо́жиих прия́телище яви́лся еси́, все́м потре́бная подава́я.

Всея́ тва́ри Созда́теля те́плою мольбо́ю умилостивля́я, ско́рый помо́щник стра́ждущим и в ско́рби су́щим яви́лся еси́, свя́те Паи́сие, святы́я Горы́ похвало́.

Богоро́дичен: В пучи́не страсте́й погружа́емь, утопа́ю, Ма́ти Богоро́дице, те́мже, я́ко ни́щий и окая́нный, взыва́ю: моли́твами Твои́ми бу́рю искуше́ний мои́х уста́ви, Горы́ святы́я Храни́тельнице.

Пе́снь 3.

Ирмо́с: Утвержде́й в нача́ле небеса́ ра́зумом, и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Христо́вою благода́тию победи́тель на ду́хи лука́выя показа́лся еси́, о́тче Паи́сие, зело́ кре́пко смири́в ю́ношу Гео́ргия, си́лою бесо́вскою одержи́ма и обольще́на бы́вша губи́тельным уче́нием.

Духоно́сный о́тче Паи́сие! Госпо́дь вся́ческих, красе́н добро́тою па́че сыно́в челове́ческих, Сво́й О́браз тебе́ не́когда откры́ и испо́лни тя́ благода́ти ве́лия.

Недоуме́ет у́м челове́ческий, ка́ко я́ве прия́л еси́ в твое́й ке́ллии многопе́тую великому́ченицу и ди́вную Евфи́мию, свя́те Паи́сие блаже́нне, отце́в похвало́.

Богоро́дичен: Исцеле́ний исто́чник и врачева́ние изря́дное Тя́, Ма́ти, ве́мы, удруча́емии вси́ боле́зньми теле́сными. Те́мже с ве́рою про́сим Твоея́, Богоневе́сто, боже́ственныя по́мощи.

Седа́лен, гла́с 4.

Непреста́нно в моли́тве пребыва́я, ду́шу твою́ хра́м Ду́ха Свята́го соде́лал еси́, Паи́сие преподо́бне, и сто́лп све́тел, ве́рныя просвеща́яй, яви́лся еси́, моля́ о все́х Христа́, И́же все́х Соде́теля и Вседержи́теля.

Сла́ва, и ны́не: Де́во Неискусому́жная, христиа́н Упова́ние и А́нгелов Весе́лие! Ве́лие дерзнове́ние пред Престо́лом Сы́на Твоего́ иму́щи, при́сно моли́ся, Влады́чице, о чту́щих Тя́.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Си́лу с Небесе́ прие́мь, тя́жкия боле́зни претерпева́л еси́, богому́дре Паи́сие, и славосло́вная пе́ния усе́рдно ко Христу́ возглаша́л еси́. Те́мже и да́р исцеле́ния ду́ш и теле́с прия́л еси́.

Уче́нию святы́х оте́ц тве́рдо сле́дуя, му́жественне в Солу́ни Христа́ испове́дал еси́, всеблаже́нне, и, я́ко а́нгел, с про́чими и́ноки в пу́ть богоразу́мный ше́ствовал еси́, о́браз ве́ры подая́ челове́ком.

Ру́це твои́ преподо́бнеи ко Го́споду воздева́я, земли́ отступа́л еси́, всехва́льне Паи́сие, и све́т невеще́ственный мно́жицею лице́ твое́ осеня́ше. Те́мже и зря́щии в сия́нии ли́к тво́й зело́ удивля́хуся.

Богоро́дичен: Во утро́бу Твою́ Вседержи́тель всели́ся, Богоро́дице, и челове́ков смеше́ние от тли́ обнови́, кля́тву же разреши́в и сме́рть упраздни́в, темнозра́чнаго проти́вника беззако́ннаго горды́ню смири́ до конца́.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́ окая́ннаго, но обрати́ мя́ и к све́ту за́поведей Твои́х пути́ моя́ напра́ви, молю́ся.

Ду́хом дея́ния приходя́щих к тебе́ прозрева́я и попече́ние ми́лостивное показу́я, вся́ потре́бная ко спасе́нию и́м подава́л еси́, богоно́се о́тче Паи́сие.

Кро́ток и нестяжа́телен, моли́твы де́латель приле́жный, тишины́ люби́тель и любве́ рачи́тель, Бо́га усе́рдный почита́тель и челове́ком ми́лостивый предста́тель яви́лся еси́, богому́дре Паи́сие.

Суесло́вия, зело́ ве́рныя соблазня́ющая, наставле́ньми и уче́ньми правосла́вными, зна́меньми и чудесы́ сокруши́л еси́, всеблаже́нне о́тче Паи́сие.

Богоро́дичен: Е́ва у́бо прама́ти кля́тву ро́да дре́вле прия́т, Ты́ же, Богоро́дице, ра́дость и ми́р Рождество́м Твои́м все́м принесла́ еси́. Те́мже Предста́тельницу челове́ком Твои́ раби́ Тя́ и́мамы, Влады́чице.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же, спасе́ния моего́.

Целому́дренно на земли́ пожи́в, ве́рных души́ словесы́ твои́ми бога́тно напита́л еси́, преподо́бне о́тче Паи́сие, и о́браз благоче́стия и чи́стаго жития́ все́м яви́л еси́.

Я́ко живи́тельный исто́чник, струи́ воздержа́ния излива́я, мно́жество ю́ных напои́л еси́, Паи́сие преподо́бне, и си́х от блуда́ и нечистоты́ к пото́ку благода́ти приве́л еси́.

Правосла́вия догма́ты мно́жицею в житии́ твое́м богому́дренно и умодержа́вно я́ве утвержда́л еси́, Паи́сие преподо́бне, Святы́я Горы́ богоно́сный учи́телю.

Богоро́дичен: Не и́мам да́ра сле́знаго, е́же пла́кати грехо́в мои́х мно́жество, ни умиле́ния, ни стена́ния спаси́тельнаго, Ма́ти, оба́че мольба́ми Твои́ми ко Христу́, лю́тое невоздержа́ние мое́ сокруши́.

Конда́к, гла́с 8.

Святы́я Горы́ подви́жника пресла́внаго и Це́ркве моли́твенника те́плаго восхва́лим в пе́снех всеусе́рдно, ве́рныя к жи́зни изря́дней наставля́юща и вся́кая проше́ния си́х исполня́юща, и та́ко ему́ возопии́м: ра́дуйся, о́тче Паи́сие.

И́кос:

Я́ко а́нгел в после́дняя времена́ на Горе́ Афо́нстей яви́лся еси́, преподо́бне Паи́сие, на земли́ бо благоче́стне пожи́в, подви́жников дре́вних равностоя́тель показа́лся еси́. Те́мже с любо́вию вопие́м ти́ такова́я:

Ра́дуйся, Каппадоки́и боже́ственное рожде́ние; ра́дуйся, Афо́на ве́лие бога́тство.

Ра́дуйся, Ко́ницы богодухнове́нная похвало́; ра́дуйся, кинови́и Суроти́йския украше́ние.

Ра́дуйся, реко́ многостру́йная боже́ственных дарова́ний; ра́дуйся, пото́че неистощи́мый спаси́тельных врачева́ний.

Ра́дуйся, я́ко прославля́еши оби́тели Афо́нския; ра́дуйся, я́ко обита́еши на горе́ Сина́йстей.

Ра́дуйся, мно́гих благода́тных даро́в прие́мниче; ра́дуйся, о людски́х неве́жествиих печа́льниче.

Ра́дуйся, изба́вителю лю́те стра́ждущих; ра́дуйся, прови́дче помышле́ний сокрове́нных.

Ра́дуйся, о́тче Паи́сие.

Пе́снь 7.

Ирмо́с: Бо́жия снизхожде́ния о́гнь устыде́ся в Вавило́не иногда́. Сего́ ра́ди о́троцы в пещи́, ра́дованною ного́ю, я́ко во цве́тнице, лику́юще, поя́ху: благослове́н еси́, Бо́же оте́ц на́ших.

Науча́л еси́ изря́дно наставле́ньми ю́ных сосло́вие, е́же супру́жество избра́ти или́ те́сный пу́ть и́ноческий предпочести́. Те́мже о́нии с тобо́ю вопия́ху, пою́ще: благослове́н Бо́г оте́ц на́ших.

Неду́ги теле́сныя терпели́вно подъе́м, в сла́дость тя́жкия боле́зни вмени́л еси́, преподо́бне о́тче Паи́сие, те́мже и прия́л еси́ от Бо́га благода́ть незави́стную, чудоде́йственне стра́сти многоразли́чныя исцеля́ти.

Весели́тся оби́тель деви́ческая, я́же в Суроти́, иму́щи, я́ко сокро́вище даро́в Свята́го Ду́ха, мо́щи твоя́, блаже́нне Паи́сие, и Вседержи́телю восклица́ет: благослове́н Бо́г оте́ц на́ших.

Богоро́дичен: Струя́ми чуде́с Твои́х, Пренепоро́чная Влады́чице, земноро́дных чи́ни от пре́лести велиа́ра, скорбе́й, многоразли́чных бе́д и боле́зней теле́сных, Пречи́стая, свобожда́ются.

Пе́снь 8.

Ирмо́с: Седмери́цею пе́щь халде́йский мучи́тель Богочести́вым неи́стовно разжже́, си́лою же лу́чшею спасе́ны, сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Собра́ния ве́рных на Святе́й Горе́ к тебе́, о́тче, усе́рдно притека́ху, прия́ти твою́, преподо́бне, благода́ть и си́лу: ты́ бо от Бо́га мно́гая дарова́ния стяжа́л еси́ и во времена́ сия́ му́дрый наста́вник челове́ком показа́лся еси́.

Позна́вшии, преподо́бне, жития́ твоего́ изря́днейшая на горе́ Афо́нстей и во ине́х страна́х, воспева́ют Го́спода Человеколю́бца: ты́ бо словесы́ и де́лы, я́ко звезда́, возсия́л еси́ и тьму́ челове́ком стра́ждущим разгна́л еси́.

Всено́щными твои́ми стоя́нии и мно́гими посты́ о́браз изря́дна подви́жника на Горе́ Святе́й и в Сина́и яви́л еси́, всесла́вне Паи́сие. Ты́ и ны́не ко Христу́ за лю́ди ру́це усе́рдно воздева́еши, дре́вним отце́м равноче́стне.

Богоро́дичен: Мно́гими согреше́ньми неду́гующии, жите́йскими попече́нии и душе́вными страстьми́ обдержи́мии, к Тебе́, Нескве́рней и Нетле́нней Влады́чице, смире́нно вопие́м: моли́твами Твои́ми из ро́ва прегреше́ний возведи́ на́с.

Пе́снь 9.

Ирмо́с: Ужасе́ся о се́м Не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее Небе́с. Те́м Тя́, Богоро́дицу, А́нгелов и челове́к чинонача́лия велича́ют.

От ти́ны прегреше́ний изба́влься, о́ко твое́ душе́вное очи́стил еси́ и те́м боле́зни челове́ков лю́тыя, душе́вныя и теле́сныя я́сно зре́л еси́, блаже́нне Паи́сие, и все́х, приходя́щих к тебе́, на лу́чшая наставля́л еси́.

Я́ко дре́вле отцы́, та́ко и ты́ неукло́нным путе́м Христо́вым богоуго́дно ше́ствовал еси́, Паи́сие чу́дне, и ра́вно с Ти́хоном и про́чими спо́стники Афо́нскими о́браз святы́ни во дни́ на́ши яви́л еси́.

Я́ко име́яй дерзнове́ние в Вы́шних, сохрани́ моли́твами твои́ми от вреда́ льсти́ваго, и злы́х жития́ находя́щих, и бу́ри прегреше́ний благоче́стно чту́щих па́мять твою́ и ра́достно пою́щих тя́, преподо́бне.

Богоро́дичен: Неи́стовствующия прило́ги лука́ваго отжени́ держа́вою Твое́ю, Богоро́дице Де́во, я́ко родила́ еси́ чу́дно Христа́, Победи́теля Сла́внаго, потреби́вшаго горды́ню дре́вняго зми́я и главу́ того́ сокруши́вшаго.

Свети́лен:

Преподо́бнаго Паи́сия, Горы́ Святы́я сла́ву, Суроти́йския оби́тели храни́теля, путевождя́ моля́щихся и ю́ных наста́вника в пе́ниих почти́м, славосло́вяще боже́ственне житие́ того́ и дея́ния.

Сла́ва, и ны́не: Де́во Пресла́вная, христиа́н утвержде́ние, благогове́йное предста́тельство немощны́м челове́ком, боля́щим исцеле́ние и стра́ждущим кре́посте, вселе́нныя покро́ве! Благоче́стно Тя́ воспева́ем, раби́ Твои́.